Hebreos 3 - Nuevo Testamento Toba Sur

So Jesús napacalec da l'amaqchic so Moisés

¹ Qaq ÿoqo'oyi qami' ÿaqaÿa't mayi qami' lca'agui'shi ñi Dios qataq qami' iÿaxanalo da qami' lalamqa'te, qami' ÿataqta qauloichigui qome so Cristo Jesús, som qomi' qanamaxalo qataq qadataxala' da detaxaÿapegue' ñi Dios mayi sa'amaqtenaqtac.

² Cha'ayi so Jesús, somayi ÿataqta lpe'et ñi Dios, ÿoqo'oyi ÿanagui de'eda n'onataxanaxac, 'eeta'am da 'eetec so Moisés, da ÿataqta npe'et da ilo'ogue 'enauac so lma' ñi Dios.

³ Qaq so Jesús, somayi ÿataqta 'itchiguiñi da huo'o da l'amaqchic, qaq saq 'en'am so Moisés. Qaq somayi 'eeta'am da 'eetec cam i'ot ca noÿic da ÿataqta huo'o da ñi'oxonnataguec qanqoÿin, qaq saq 'en'am da ñi'oxonnataguec so noÿic.

⁴ Qaq ñi 'oonolec nam noÿicpi huo'o cam ÿataqta chigoqchigui da i'ot, qalaxayi ñim Dios mayi nachiñi ñim chigoqchigui 'enauac nam huetalecna.

⁵ Qaq de'eda 'eetec so Moisés da nlatac qataq ÿataqta npe'et da ilo'ogue 'enauac so lma' ñi Dios. Qaq somayi da l'onataxanaxac i'axat cam huotaique da 'enapec ñi Dios.

⁶ Qalaxayi so Cristo, somayi llalec ñi Dios qataq ÿataqta npe'et da ilo'ogue se'eso lma' ñi Dios, mayi nachiqomi', da ÿataqta qomi' qadamchiyiñi qataq da qadpi'iÿaxac chochi ivitta'a ca qadaloqo', nda'a't da ÿataqta samaqchiguiñi souaxat da qanaquitaxac.

Ca nmataxac nam lalamaxatpi ñi Dios

⁷ Qaq ÿoqo'oyi naua nanettrañi l'aqtaqa so Espíritu Santo 'eeta': Nagui da qami' qau'aqaichigui ca 'enapec ñi Dios,

⁸ qalaq sa ishit qome da qau'añaxachiiguilo naua qadquiyaqchilli' da qoñiita'am da 'eetec co'ollaxa som sa ishit da ÿalaq, nachi ÿi'iguen ñi Dios co'ollaq hualec so tojlec 'alhua.

⁹ Qaq hualec se'eso tojlec 'alhua co'ollaq aÿim ÿi'iguen som hua'au qadta'aipi, qaq nai'ctaxa da somayipi ivi' naua cuarenta vi'iyi da ÿauaachigui nam so'otpi.

¹⁰ Qaq ÿoqo'oyi aÿim salemataÿa se'eso shiÿaxauapi. Nachi shiita': “Namayipi ÿataqta nachi 'eetai'naxa da isomtac da lquiyaqteÿaxac, qataq sa ishit da ÿaÿaten ca llic na ñaqa'aiquiaxac.”

¹¹ Qaq ÿoqo'oyi aÿim salemataÿa somayipi, huaña, nachi aÿim setaxaÿa da somayipi sa ishit qome da inoxoneu'a ca ñimataxac.

¹² Qami' ÿaqaÿa't, maxatchaxa qome da qoñiita da sa ishit da huo'o ca sa ÿaÿamaxañi da lquiyaqteÿaxac da nshitaique da ca'ai ñi Dios mayi nachi 'eetai' nca'altauec souaxat da sa ishit da i'amaqten ñimayi.

¹³ Nachaqdato' da ñi 'oonolec quetot naua na'axa'te da i'añaqchittac ca lÿa, llaxatemallaxa da ñaq huo'o yi qaddaqa' na na'a'q, yaqto' sa ishit da huo'o ca 'oonolec da qoñiita da 'ico' ÿatenachit da ñi'itaxaloxo, nachi da lquiyaqteÿaxac sa ishit da ÿalaq.

¹⁴ Cha'ayi da ÿataqta qomi' qadamchiyiñi, chochi sevidaqta'a ca loga't da qanaquitaxac mayi saconaxaguet som hua'auchiguiñi, nachi ishit qome da ñiuanaqhua'a so Cristo.

¹⁵ Cha'ayi da n'aqtac 'eeta': Nagui da qami' qau'aqaichigui ca 'enapec ñi Dios, qalaq sa ishit qome da qau'añaxachiiguilo naua qadquiyaqchilli' da qoñiita'am da 'eetec co'ollaxa som sa ishit da ÿalaq.

¹⁶ Qaq ¿chaq négue't co'ollaxa som sa ishit da n'axaÿaxana da l'aqtac ñi Dios, qataq sa ishit da ÿalaq? Qomyi 'enauac som nqateeguesop co'ollaxa yi 'alhua Egipto so Moisés.

¹⁷ Qataq ¿chaq négue't som ivi' naua cuarenta vi'iyi da dalemataÿa ñi Dios? Qomyi som huo'o ca ÿasouaxat, nachi 'enauac somayipi ileu co'ollaq hualec so tojlec 'alhua.

¹⁸ Qataq ¿chaq négue't som detaxaÿa co'ollaxa ñi Dios da yaqto' sa ishit da inoxoneu'a ca nmataxac ñimayi? Qomyi som sa ishit co'ollaxa da ÿalaq.

¹⁹ Qaq qomi' seloqchigui da somayipi sa ishit co'ollaxa da inoxoneuo, souaxat da sa da'amqajnataxan.