Hebreos 2 - Nuevo Testamento Toba Sur

Sa ishit da sa qailo'ogue ca llic da nca'alaxa

¹ Qaq ÿoqo'oyi qomi' qome ÿataqta seloqtegue ca llic dam sa'axasoqchigui, yaqto' sa ishit da 'ico' selamaxataqhuec.

² Cha'ayi dam n'aqtac mayi qoÿan co'ollaxa soua hua'a'u vi'iyi, chigoqchigui qanqoÿin na namaxashic piguem l'ecpi, damayi qaÿachaxan da ÿataqta 'eesa. Qaq ÿoqo'oyi nam huo'o ca ÿasouaxat qataq sa ÿalaq, qalaq ÿataqta 'itchiguiñi da qaÿauo'o ca nhuaxanaguec.

³ Qaq ¿táloxochiyictoxo' da qomi' ÿi't ca qanhuaxanaguec da huo'otaq sa ishit da seloxogue ca llic dam lta'adaic nca'alaxa? Cha'ayi nachiso so qadataxala' so l'auaxanec da i'axat de'eda nca'alaxa, ime, qataq jec nam n'axaÿaxaatega somayi, nachi ÿataqta 'itchiguiñi naq'en de'eda n'aqtaxanaxac. Ime, nachi qomi' da'aqtaxanema.

⁴ Ñi Dios nataq'en ÿataqta 'itchiguiñi de'eda n'aqtaxanaxac. Ÿoqo'oyi ÿauo'oi naua l'anqa, qataq nam i'ot da n'aalaxa, qataq qalota nam i'ot nam sa qaÿauanapigui, qataq chigoqchigui naq'en so Espíritu Santo da ñimayi ÿotta'a't naq'en da 'eetec da qomi' ÿanema, qaq ipacchigui da maichi 'eetapeguec.

So Jesucristo 'eeta'am da lataxac na yi'oqchigui lqaÿañicpi

⁵ Cha'ayi ñi Dios sa ishit qome da ÿachito'ot naq'en ca lamaxasoxonaxac na lamaxashic piguem l'ecpi cam 'alhua mayi sa'axataqtac.

⁶ Cha'ayi naua nanettrañi l'aqtaqa huo'o so i'axat co'ollaxa da 'eeta': ¿Negue'tom ca chochi shiÿaxaua, 'am ita'a Dios, da huo'otaq 'auennata'a camayi? Qataq ¿negue'tom cam shiÿaxaua mayi huo'o ca loga't da huo'otaq qouapegue' camayi?

⁷ Qaq cada'acolec da 'am 'ai'anagui da na 'adamaxashic piguem l'ecpi nataÿaña naq'en namayipi. Qalaxayi 'ai'anagui da lli'oxoyic qataq da l'amaqchic, ime, nachi 'ai'anem da ilo'ogue 'enauac nam 'ad'onatacpi,

⁸ qaq 'enauac na 'ad'onatacpi 'eeta'am da 'auacho'oto naua lapia'te namayipi. Qaq ÿoqo'oyi co'ollaq mashi ime da qaÿacho'oto naua lchil na shiÿaxauapi 'enauac na n'onatacpi, nachi ñi Dios sa ishit da huo'o ca 'oonolec da daqaptauec da saq hueto'ot naq'en da lamaxasoxonaxac na shiÿaxauapi. Qamaq nagui saxanaxa da huo'otaq qomi' selaqa'a da huo'otaq 'enauac na n'onatacpi ishit da ÿalaxaguet na shiÿaxauapi.

⁹ Qalaxayi qomi' ishit da seloqchigui so Jesús som cada'ac da nataÿaña naq'en ñi Dios na lamaxashic piguem l'ecpi. Qalaxayi souaxat da lauotaxanaqtaic da shinaqta ñi Dios, nachi ÿan somayi, da yaqto' ileualec 'enauac na shiÿaxauapi. Qaq nagui somayi qoÿanagui da lli'oxoyic qataq da l'amaqchic souaxat da nque'etaxangui da l-leuaxa.

¹⁰ Cha'ayi 'enauac nam huetalecna, namayi lalamaxat ñi Dios, qataq maichi chigoqo'ot ñimayi. Qaq ñi Dios nshitaique da 'enauac na llalaqpi nhuanau'a de'eda lli'oxoyic. Qaq ÿoqo'oyi ñimayi naloqchiichiguiñi naq'en da lataxac so Jesucristo som lca'alaxaqui namayipi, ÿachigoxotchigui naq'en da nque'ejnaxac.

¹¹ Cha'ayi nam qaiÿo da nachaalataxac, qataq som deÿoxootac, naamayi 'oonolec ñi lta'a' Dios. Qaq ÿoqo'oyi so llalec ñi Dios, somayi sa ishit da da'aguelec da iÿaxana namayipi da ÿataqta lqaÿañicpi.

¹² Qaq nachi 'enapec naua ñiyigui'shi l'aqtaqa ñi Dios, 'eeta': Sa'axatem qome na ÿaqaÿañicpi da qoneta, qataq so'on ca n'onec da 'am shi'oxoden da sootangui ca lapoota'a't 'amqajnataxanaxaicpi.

¹³ Naua n'aqtaqa nataq'en 'eeta': Aÿim ÿataqta sepi'iÿa'a ñi Dios. Nataq'en 'eeta': Nagui soota'a ne'ena, sootangui na ÿalaqpi mayi aÿim ÿanem ñi Dios.

¹⁴ Ca ñalaqpi mayi 'oonolec ca qaÿachigoxoigui, camayipi 'eeta'a't da l'oquiaxac qataq naua ltago'q. Qaq nachi 'eetec nataq'en so Jesús, somayi da l'oquiaxac qataq naua ltago'q chigoqchiguilo na shiÿaxauapi, yaqto' somayi ishit da ileu, huaña, nachi nlaxajñi som hueto'ot da n'añaxac da dalaataxan, som shiÿaxaua mayi lma'na.

¹⁵ Qaq 'eda da 'eetec da huesouec naq'en 'enauac nam 'ico' l-latacpi da lcolanaxa da nleuaxa nagui da ña nca'altauec.

¹⁶ Cha'ayi ÿataqta 'eesa da somayi sa ishit da huo'otaq anac da yaqto' itauan nam namaxashic piguem l'ecpi, chaqdata da itauan na llalaqpi so Abraham.

¹⁷ Qaq nachida da huo'o mshi somayi iuen da ÿataqta 'eeta'am qanqoÿin da lataxac na lqaÿañicpi, da yaqto' ishit da ivida'a da npe'et qataq choxonnataxanaxaic lataxala' na ntaxaÿaxanaxanecpi da qaitaxaÿapegue' ñi Dios, qataq da yaqto' ÿapalaxat da lasouaxashit na shiÿaxauapi, ÿachigoxotchigui da nañanguet da nalaataguec.

¹⁸ Qaq ÿoqo'oyi nagui somayi ishit da itauan cam huo'o da ñi'iguenataguec, cha'ayi somayi nataq'en huo'o co'ollaxa da nque'ejnaxac qataq ñi'iguenataguec.