Hebreos 13 - Nuevo Testamento Toba Sur

Da 'eetec da yaqto' qomi' ÿaÿamaxadeete' ñi Dios

¹ Sa ishit qome da ÿaxaneec ñi 'oonolec da qoñiita da ÿauotec ca lÿa, 'eeta'am naq'en da lauotaxanaqtaic ca maichi lqaÿa.

² Qataq sa ishit qome da qaucouai'ai da ÿataqta qauloÿiiguet ca qanamaxasoxoiqui. Cha'ayi damayi nachida da chigoqchigui da huo'o co'ollaxa som saq noma da ÿauo'o ca l'ochaqa' nam namaxashic piguem l'ecpi.

³ Qataq qauennachiÿa'a qome na ncoñitaguishicpi, 'eeta'am qanqashiñi da huo'otaq qancoñitaxauaipi namayipi, qataq nam sa ishit da qaÿauo'o ca nyacnataguec, cha'ayi qami' nataq'en qauaÿajñi da ishit da huo'o da nque'etaxanaxac da qad'oquiaxaqui.

⁴ Qataq iuen da ÿataqta qantela'a qome 'enauac da nhuaÿaxac, qataq caua namoxo'u iuen da ÿataqta nde'n, cha'ayi ñi Dios ÿauo'o qome da nhuaxanaguec na quishiguetaxaicpi qataq na lauatapiguiñi' aca sa lhua.

⁵ Qataq sa ishit qome da qanmichiita'ai añi plata; chaqdata da qantoñiitapeguec cam huo'o. Cha'ayi ñi Dios 'eeta': “Sa ishit da 'am seÿoteec, qataq sa ishit da 'am salat.”

⁶ Qaq ÿoqo'oyi sa ishit da shi'iÿaqlec da shinaqta': Ñi qadataxala' Dios, nachiñi ñi aÿim itauan, qaq ÿoqo'oyi sa ishit da shi'itega ca aÿim i'otec ca chochi shiÿaxaua.

⁷ Qataq qauennachiÿa'a qome som qadataxala'aipi mayi qami' i'axatema co'ollaxa da l'aqtac ñi Dios; qauennachiÿa'a dam 'eetec da naigui da nachaalataxac, nachi ÿataqta qau'enaxachiichigui da 'eetec da lpi'iÿaxac.

⁸ So Jesucristo, somayi sa ishit da nqochinapec, somayi nachi 'eetai'.

⁹ Qataq sa ishit qome da chochi qami' ÿauecta'pe na ÿotta'a't napaxaguenataxanaxacpi mayi sa qaÿauanapega. Qaq nachaqdata da ÿataqta ÿaconguet qome da qadquiyaqteÿaxaqui da l'añaxac mayi chigaqaigui da lsoxoyic ñi Dios, mayi saq 'en'am da lataxac naua nalli'c da huo'o na qanallic qataq na sa qanallic. Cha'ayi de'eda lataxac da sa qanallica'acda', nam ÿataqta quetegue da i'ot, qalaq sa ishit da huo'o ca nshapeque.

¹⁰ Cha'ayi qomi' huo'o aso qadca'atoxonaxalate mayi sa ishit da huo'otaq chigueu'a ca laÿi na nachitaqtaxanaxatpi som ltaxaÿaxanaxanecpi na shiÿaxauapi da qaitaxaÿapegue' ñi Dios mayi ilotague' so toguishic lauo' ñi Dios.

¹¹ Cha'ayi som lataxala' na ltaxaÿaxanaxanecpi na judiopi, somayi idou'a na ltago'q na shiguiÿacpi som ndaqa' mayi sa qaishitapec nam nachitaqtaxanaxat, da yaqto' qanqat na nasouaxashitpi. Qalaxayi na lapat ne'ena shiguiÿacpi, da qaÿavigaxat, qalaq qaidouga cam qaÿoqteuga se'eso qanayiutaña.

¹² Qaq nachi 'eetec nataq'en so Jesús da nalaataguec huaña so qaÿoqteuga so la ciudad, da yaqto' ishit da iÿouec na lasouaxashit na shiÿaxauapi, deÿoxonalo soua maichi ltago'q.

¹³ Qaq ÿoqo'oyi ñoqo'onaxauga qome so Jesús mayi huetauga que'eca qaÿoqteuga se'eso qanayiutaña, da yaqto' nataq'en ñique'etaxanaxagui da sa qaÿauo'o ca qanyacnataguec, da shinaqta'am da nque'ejnaxac somayi.

¹⁴ Cha'ayi ana souaqtalec 'alhua qaica ca qadma' da huo'otaq nachi 'eetai', cha'ayi qomi' ñimitaqtaique cam la ciudad mayi ñaq naÿa'cna.

¹⁵ Qaq ÿoqo'oyi nachi 'eetai' qome da sachigoxotaqchigui so Jesucristo da shi'oxodenaqtac ñi Dios. Qaq de'eda qayi'oxonnataxanaxac, nachida dam 'ico' qadachitaqtaxanaqte mayi sanaqtacot ñimayi. ¡Shi'oxodenaqtac qome ñimayi naua qad'aqtaqa!

¹⁶ Qataq sa ishit qome da qaucouai'ai da qau'ochi ca ÿaÿamaqchiguiñi, qataq da qautauañiic ca qadÿai cam qami' hueto'oto, cha'ayi de'eda nachitaqtaxanaxac, nachida dam ÿataqta ÿaÿamaxadeeta ñi Dios.

¹⁷ Ÿataqta qaualaqailec qome na qadataxala'aipi qataq qanañañiiguet da qami' ilo'oguelo, cha'ayi namayipi nachina na ilotague' da qanachaalataxaqui, cha'ayi ÿaÿateeta'a da huo'o ca na'a'q, qaq ishit da inat ñi Dios namayipi. Qataq qanpogoxoiñiÿapegue', da yaqto' ÿataqta machiguiñi da l'onataxanaxac qataq sa ishit da ÿapacteec qapa'atta. Cha'ayi da nachi 'eetec de'eda, qaq sa ishit da huo'o ca qanqachi.

¹⁸ Qanqouagaxauñiitalec qome da shinaqta, cha'ayi qomi' saÿajnaqta da qaica ca da da qadvilÿaxac. Cha'ayi sauoqtaique da ÿataqta qaica ca da 'enauac da qoyiquiaxac.

¹⁹ Qaq ÿataqta seuen ca qanqouagaxaunaxaqui, yaqto' ñi Dios ishit da aÿim ÿanem da saqaÿaloq da qaltaq qami' soota'agueta.

Da nchoxonnataxanaxa qataq da pa'ateec nquinaxanaxac

²⁰ Qaq ñim Dios mayi i'ot da nlagaxayic, ñim nca'alaxateeguesop da nleuaxa so qadataxala' Jesucristo, mayi nachiso so 'oonolec lataxala' ana qagueta, souaxat soua ltago'q mayi ÿoqta 'itchiguiñi naq'en dam qanaÿamaxataxac mayi chochaq tateec,

²¹ ñimayi ÿataqta qami' naloqchiichiyiñi qome qataq n'onaxat 'enauac da qadataxaqui, yaqto' ishit da qau'ochi cam 'eetapeguec; qataq yaqto' ñimayi ishit da maichi ÿoiqueetac cam qomi' i'oteque, ÿachigoxotchigui naq'en so Jesucristo. ¡So Cristo ÿataqta nachi 'eetai' qome da ñi'oxonnataguec! Aja', nachi 'eetec.

²² Qami' ÿaqaÿa't, qami' ñachoxodeetoiguilo da ÿataqta qan'añaxachiiguet da ÿaqataxac da qoñiita, cha'ayi saq 'amaqtaq da shiyiñi i'aqtac mayi qami' samaxalo.

²³ Qaq qami' sa'aqtaxanema da so qadqaÿa Timoteo mashi sogote da qaisouec. Qaq qom saqaÿaloq da aÿim nvita, qaq sauec qome da qami' ñoqo'onalo.

²⁴ Qaq qai'añiim qome da iquinaxanaxac 'enauac na qadataxala'aipi, qataq 'enauac na qadqaÿañicpi mayi qad'amqajnataxanaxauapi. Qaq nam netaña na Italia qami' ÿamaxalo da lquinaxanaxac.

²⁵ Qaq ñim Dios qami' ÿanema qome ca no'on qoyiquiaxaqui. Aja', nachi 'eetec.