Hebreos 12 - Nuevo Testamento Toba Sur

Ÿataqta seloqchigui so Jesús

¹ Qaq ÿoqo'oyi qomi', cha'ayi ÿataqta qalota na qomi' datatau'alo shiÿaxauapi mayi ÿataqta ÿachaxaata da lpi'iÿaxac, nachi no'on da ñi'onaxataqchigui 'enauac nam qomi' sa'apiaqtapigui qataq nam ñi'itaxaloxo mayi qomi' nqanaxatta'pe. Nachi ÿataqta sauoqo'o da qadhualaxavic da ñaqalgoxosoq dam aloxoyaxac dam saqta'ague.

² Ÿataqta seloqchigui qome so Jesús, som chigoqo'ot da qadpi'iÿaxac, qataq nachiso so naloqchiichiguiñi. So Jesús ÿataqta n'añaxateguet da 'eetec co'ollaq qaiuaxaneuo, qalaxayi sa ishit da ÿoqocha'a da n'enaguec de'eda l-leuaxa. Cha'ayi somayi ÿaÿaten da huo'otaq mashi inoxonaqchitec de'eda nque'ejnaxac, nachi huo'o da ntonaxac qataq da lamaiquiaxac. Nachi somayi nso'ongue da aloic ñi Dios.

³ Qaq ÿoqo'oyi qami' qauennachiÿa'a da 'eetec da nque'ejnaxac so Jesús co'ollaq n'añaxateguet da lachoxonnataxanaxac na shiÿaxauapi 'itaxaloxoicpi, yaqto' da qan'añaxataxaqui nachi 'eetai' sa ishit da nlautapiguiñi.

⁴ Cha'ayi da qoñiita saxanaxa da huo'o ca ivita da qaÿalauat, souaxat da datata'aguet da ñi'itaxaloxo.

⁵ ¿Qami' peta'a mashi sa qantouñiic da lqataxac ñi Dios da 'eeta'am ca shiÿaxaua da huaqattega ca lalamaxat llalec? Naua ñiyigui'shi l'aqtaqa ñi Dios 'eeta': 'Am ÿalcolec, sa ishito' qome da saqca ca 'ai'anaigui da lapaxaguenataxanaxac ñi qadataxala' Dios qom 'eeta'am da 'ico' 'am nlaxa, qataq sa ishit da 'an'aloxootac qom 'eeta'am da 'am nhuogaxa.

⁶ Cha'ayi ñi qadataxala' ÿataqta nlaxaneec ca lauotaxat, qataq ÿataqta iuaxan 'enauac na lalamaxat llalaqpi.

⁷ Qaq ÿoqo'oyi qan'añaxachiiguet qome da qanhuaxanaguiiqui, cha'ayi ñi Dios 'eeteguema qami' naq'en ca maichi lalamaxat llalec. ¿Peta'a saqco' ca ñalec da sa ÿapaxaguen ca lta'a?

⁸ Cha'ayi ñi Dios da huo'otaq sa qami' ÿapaxague'n da 'eeta'am naq'en da 'eetec da nlaxaneec 'enauac na lalamaxat llalaqpi, nachi qami' sa ishit da maichi lalamqa'te llalqa. 'Eeta'am da chochi qami' n'aalec ñalqa.

⁹ Qataq da lÿa 'eeta': Co'ollaq saxanaxa da qomi' ÿi't, qalaq ÿataqta salaxasoxolguete soua yi'oqchiguilo qadta'al mayi qomi' ÿapaxagueeta'pe. Qaq ¿táloxochiyictoxo' da saq ÿacteec ñaqshinaq da qadalaxayic ñi qadta'a mayi saq cha'a, yaqto' sovidaqa'a da nca'alaxa?

¹⁰ 'Eesa da soua yi'oqchiguilo qadta'al cada'acolec da qomi' ÿapaxaguenque co'olloxochiyi cam ipeta'a da ÿaÿamaqchiguiñi qadataxac. Qalaxayi saq 'en'am ñi Dios mayi qomi' ÿapaxaguenque da ÿoqta 'eesa da qomi' ÿaÿamaxajyiñi, cha'ayi nshitaique da qomi' qui'itte', shinaqta'am ñimayi.

¹¹ 'Eesa da qaica ca qanhuaxanaguec da huo'otaq sa qui'aq da qomi' qanlaxaatrapeguec. Ÿataqta qui'aq da chita'ague. Qalaxayi da mashi lcopa'a, nachi yi'oq da alaÿaxac de'eda napaxaguenataguec ca shiÿaxaua da ÿoqta huelec da ÿalaq da qaÿapaxaguen. Da nachaalataxac ÿataqta qui'itta qataq huo'o da l-lagaxayic.

Da lchic ca shiÿaxaua da huo'otaq sa ÿoqocha'a da l'aqtac ñi Dios

¹² Qaq ÿoqo'oyi qami' qaltaq n'añaxat qome qanqashiñi' naua qadhuaxayilli' mayi mashi nqui'itreec qataq naua qadllictelli' mayi sa da'añiiguelo.

¹³ Nachi qanmichiÿaique so nqa'aic mayi ÿataqta ÿashicteec, yaqto' ca napia' mayi sa da'añiigue, qalaq ishit da no'oita, qataq sa ishit da vi'ita'a't.

¹⁴ Qaq ÿataqta qanpogoxoiñiÿapegue' da qaulaquiitapegue' 'enauac na shiÿaxauapi, ÿataqta qui'itta qanqashiñi da qadataxaqui. Cha'ayi ca sa qui'itta naq'en da nachaalataxac, nachi sa ishit da nauane' ñi qadataxala'.

¹⁵ Qataq maxatchaxa qome da qoñiita da sa ishit da huo'o ca ÿaxaneec da ltaunaxanaxac ñi Dios mayi ÿaatac, yaqto' sa ishit da huo'o ca 'oonolec da qoñiita da 'eeta'am aca huoue shinataxanaxai mayi ishit da n'aqchit ana laÿipi.

¹⁶ Qataq sa ishit qome da huo'o ca 'oonolec da qoñiita da ncachitapegue' aca sa lhua, qataq da i'otan cam chigoqo'ot ñi Dios. Cha'ayi damayi nachida da 'eetec so Esaú co'ollaq imen dam qaÿaqataxaatapigui' da talec, cha'ayi n'auaxanec ñalec.

¹⁷ Qaq qami' qauaÿajñi da co'ollaq imat da imen, nachi co'ollaq ivita so na'a'q da so Esaú nshitaique da ÿaconguet da no'on lliquiaxac mayi ÿami' so lta'a, nachi somayi qaimaqa'aguet. Nai'ctaxa da ÿataqta noÿiitac, qalaxayi mashi sa ishit da nadalaxat ca 'eetec dam mashi i'ot.

¹⁸ Qami' sa ishit da qoñiita'am so llalaqpi so Israel co'ollaq nqo'ona aso qasoxonaxa mayi ishit da qaipoteu'a, qataq 'ettaigui, qataq huaña da ÿataqta napanñi qataq so l'at lta'adaic.

¹⁹ Qataq sa ishit da qau'aqaÿa na l-lamaxa ana nashiide qataq da lavilÿaxac ñi Dios co'ollaq detaqtague' somayipi. Cha'ayi ne'ena hua'aqchigui co'ollaxa de'eda nvilÿaxac, namayipi nachoxodeetac, da yaqto' sa ishit da qaÿi'iguelaxalec da qaitaxaÿapegue'.

²⁰ Cha'ayi somayipi sa ishit da nalo'oguet da nqataxac mayi 'eeta': “Da huo'otaq huo'o ca chochi peu'a na laÿi ana'ana qasoxonaxa, qalaq camayi qaualauachi, qauauoita'a na coma', huo'otaq taquiaxai, nai'ctaxa da huo'otaq shiguiÿac.”

²¹ Qaq ÿataqta huo'o da lchic se'eso qailota'a, ivida'a so Moisés 'eeta': “Aÿim ÿataqta aÿim iviloxolaqchit da icolanaxa.”

²² Qalaxayi qami' qome, qalaq qanqo'oñiishiguemec aca qasoxonaxa l'enaxat Sión, yim naciudad ñi Dios mayi nachi 'eetai' da nca'altauec, yim Jerusalén mayi hueta'ague da piguem, yim hueta'a nam ÿataqta qalota namaxashic piguem l'ecpi,

²³ lapoota'a't da ÿi'oxodeetac ñi Dios, qataq cam lapoota'a't llalaqpi ñi Dios mayi qoÿittau'a aca nanedaxalate nam hueta'ague da piguem. Qataq qauataito'ot qome ñi Dios mayi nachiñi ñi nmit 'enauac na shiÿaxauapi, qataq cam hueta'a na lqui'ipi na shiÿaxauapi mayi no'on da lataxac mayi ÿataqta naloqchiichiguiñi ñi Dios,

²⁴ cam hueta'a so Jesús mayi nachiso so qadtaxaÿaxanaxanec nagui da dalaxaic qanaÿamaxataxac da qanaÿamaxate' ñi Dios, qataq cam hueta'a soua ltago'q so Jesús mayi qaichigoxosoxonalo. Soomayi ÿataqta napacalec da 'eetec soua ltago'q so Abel da qomi' da'aqtaxanema.

²⁵ Qaq ÿoqo'oyi maxatchaxa qome da qoñiita, sa ishit da huo'o ca sa ÿoqocha'a ñi Dios mayi qomi' detaqtacoto. Cha'ayi ÿataqta sa ishit da huo'o co'ollaxa ca qoÿit som sa ishit da hua'axaÿa ñi Dios co'ollaq huaqattega somayipi ana 'alhua, qaq ¿huá'aguectoxo' da ishit da qomi' qoÿi't da huo'otaq sa ñi'axaÿaxanaxa da lavilÿaxac ñim neto'ot na piguem da qomi' huaqattegalo?

²⁶ De'eda lavilÿaxac ñi Dios se'eso na'a'q ÿataqta ÿacholaxan ana 'alhua; qalaxayi nagui ñimayi 'eeta': “Aÿim sa ishit qome da chaqnata na 'alhua da qaltaq sacholaxan, nataq'en na piguem.”

²⁷ Qaq da naigui da 'eeta': “Aÿim qaltaq shi'iguelaxalec,” damayi naigui da qanqat qome 'enauac na ishit da qaÿayigot mayi maichi l'onatacpi ñi Dios, huaña, nachi n'oichigui nam sa ishit da qaÿayigot.

²⁸ Qaq cam l'onataxanaxac ñi Dios mayi qomi' ÿanema da yaqto' qomi' nta'al, camayi sa ishit da qaÿayigot. Qaq ÿoqo'oyi sanqot qome da qan'achiquiaxac ñimayi qataq ÿataqta huo'o da qayi'iÿaxa qataq qadtelaxa da shi'oxodenaq ñimayi mayi nachida da ÿaÿamaxadeeta;

²⁹ cha'ayi ñi qadta'a Dios, ñimayi 'eeta'am ca nodec mayi ishit da davigaqtaxan.