Hebreos 11 - Nuevo Testamento Toba Sur

Da npi'iÿaxac

¹ Da huo'o da qadpi'iÿaxac, qaq nachida da ÿoqta 'eesa naq'en da saconaxaguet cam seuataqtaique, qataq nachida da ÿoqta 'itchiguiñi naq'en da yi'oq cam sa ishit da cha'a.

² Som hua'au qadta'alpi co'ollaxa ÿataqta ÿaÿamaxadeeta ñi Dios, souaxat da huo'o da lpi'iÿaxac.

³ Qaq chigoqchigui da qadpi'iÿaxac da qomi' saÿajnaq da ñi Dios l'onata ana 'alhua, huota'ai naq'en naua l'aqtaqa. Qaq ÿoqo'oyi nam seloqtaigui nagui, namayi chigoqchigui cam saq cha'a co'ollaxa.

⁴ So Abel souaxat co'ollaxa da lpi'iÿaxac, nachi ÿanot ñi Dios aso lachitaqtaxanaqte, qaq asomayi ÿataqta napacalec som lachitaqtaxanaxat so Caín. Qaq ÿoqo'oyi ñi Dios ÿataqta ÿaÿamaxadeeta somayi da no'on da lataxac, nachi ÿaconguet aso lachitaqtaxanaqte. Qaq 'eda da 'eetec so Abel, da nai'ctaxa da mashi ileu, qalaxayi da lpi'iÿaxac ñaq queta da qomi' da'aqtaxaatapeguema.

⁵ So Henoc nataq'en souaxat da lpi'iÿaxac, nachi qaÿaueegue da piguem, nachi somayi sa nauane' da ileu. Nachi sa ishit co'ollaxa da qaÿanata, cha'ayi ñi Dios ÿauec. Qaq naua ñiyigui'shi l'aqtaqa ñi Dios i'axa't da somayi co'ollaq saxanaxa da qaÿauec nachi nal'ena da mashi ÿaÿamaxadeeta somayi ñi Dios.

⁶ Qaq ÿoqo'oyi sa ishit da huo'o ca chochi ÿaÿamaxadeeta ñi Dios da huo'otaq qaica ca lpi'iÿaxac. Cha'ayi da qanquigueu'a ñimayi, qalaq ñi 'oonolec iuen da ÿataqta i'amaqten ñi Dios da ÿataqta 'eesa da huo'o, qataq i'amaqten da ñimayi ishit da ishiiten cam nmitaique ñimayi.

⁷ So Noé nataq'en souaxat da lpi'iÿaxac co'ollaq ñi Dios huaqatot somayi da naÿa'a cam saxanaxa da yi'oq. Qalaq somayi ÿataqta ÿalaq, qataq i'ada't aso nnotaxaqui, da yaqto' ishit da nca'aleec so llalaqpi. Qaq souaxat da somayi huo'o da lpi'iÿaxac, nachi ÿachaxan da qaÿauo'o ca nhuaxanaguec nam huetalec ana 'alhua, qataq somayi ivida'a da ÿataqta qaÿaÿamaxadeeta. Cha'ayi ñi Dios ÿataqta ÿaÿamaxadeeta cam huo'o da lpi'iÿaxac.

⁸ So Abraham nataq'en chigoqchigui da lpi'iÿaxac co'ollaq ñi Dios iÿaxana, qalaq somayi ÿataqta ÿalaq da jec, nqo'ona so 'alhua mayi ÿachaxanapecot ñi Dios da ÿanem. Nachi somayi ca'ai so lma', sa ishit da ÿaÿaten cam dataigue.

⁹ Qaq cha'ayi huo'o da lpi'iÿaxac so Abraham, nachi somayi ishit da nalec som 'alhua mayi ÿachaxanapecot ñi Dios, qalaxayi 'eeta'am naq'en ca ÿaqa'a 'alhua da netalec. Nachi somayi netaigui so lpe'l. Qaq nachida da 'eetec nataq'en so Isaac qataq so Jacob mayi nataq'en ÿacoodeguet de'eda qaÿachaxanapec co'ollaxa.

¹⁰ Cha'ayi so Abraham iuatta'a cam la ciudad mayi sa ishit da nlaguiñi, cam la ciudad mayi maichi l'enaqtac ñi Dios qataq maichi n'oxooshiguem.

¹¹ Aso Sara nataq'en chigoqchigui da lpi'iÿaxac da yaqto' huo'o ca llalec, nai'ctaxa da mashi ÿi'axaina'. Qaq asomayi ÿaconguet da l'añaxac, da yaqto' ishit da deco'o. Qaq ishit da huo'o so llalec, cha'ayi asomayi i'amaqten ñi Dios da ishit da ipacchigui cam ÿachaxanapec.

¹² Nataq'en so Abraham, nai'ctaxa da mashi yaqta'a da ivita ca laloqo' da nachaalataxac, qataq somayi ÿataqta ivida'a da qalota so llalaqpi, 'eeta'am ana huaqajñi mayi neto'ot na piguem, qataq na lsochi na 'alhua mayi hueto'ot na loigue aso auaxai, da sa ishit da huo'o ca naloqten.

¹³ Qaq 'enauac se'eso shiÿaxauapi chochi ivitta'a da ileu da sa ishit da ÿaconguet cam ÿachaxanapecot co'ollaxa ñi Dios. Qalaxayi souaxat da huo'o da lpi'iÿaxac, nachi somayipi 'eeta'am da chochi ilota'a, qataq ÿataqta i'amaqten, qataq huo'o da lqopichi da tatapigui yi lauel. Qaq de'eda 'eetec somayipi 'eeta'am da i'axattac da sa ishit da ÿoqta lma' ana 'alhua.

¹⁴ Cha'ayi nam 'eetec de'eda da ña nmittaique cam ÿoqta lalamaxat lma'.

¹⁵ Cha'ayi somayipíctaxa da huo'otaq ñaq tatapigui yi lauel yim 'alhua mayi chigoqchiguiña, qaq sogotéctaxa da ishit da ÿi'iguelaxa.

¹⁶ Qalaxayi somayipi ña ipactega cam ÿataqta no'on lalamaxat lma', cam nma' mayi hueta'ague da piguem. Qaq ÿoqo'oyi ñi Dios sa ishit da n'aloxootac da namayipi ÿamata'ac ñimayi da ÿataqta lta'a Dios, cha'ayi ñimayi sogote da ÿaqataxaatapigui' cam naciudad namayipi.

¹⁷ So Abraham nataq'en souaxat da lpi'iÿaxac da co'ollaq ñi Dios ÿauo'o da ñi'iguenataguec, nachi somayi ÿauec so Isaac da ÿalauat, nachi ÿavigaxat da ÿanot ñi Dios. Somayi ÿataqta qaica ca ÿiga da ÿaneuo so 'oonolec llalec, nai'ctaxa da nachiso som ÿachaxanapecot co'ollaxa ñi Dios, 'eeta':

¹⁸ “Chigoqchigui qome ñi Isaac da 'am huo'o ca 'ai'alaqpi.”

¹⁹ Cha'ayi so Abraham ÿaÿateeta da ñi Dios ÿataqta huo'o da l'añaxac, ivida'a da ishit da qaltaq nca'alaxateec na leuaxaicpi. Qaq da naigui de'eda, 'eeta'am da so Abraham qaltaq ÿaconguet so llalec da chigaqaigui na leuaxaicpi.

²⁰ So Isaac nataq'en souaxat da lpi'iÿaxac, nachi somayi ÿanem ca no'on lliquiaxac so Jacob qataq so Esaú.

²¹ So Jacob nataq'en souaxat da lpi'iÿaxac, nachi somayi co'ollaq yaqta'a da ileu, nachi ÿanem ca no'on lliquiaxac soua llalqa so José. Nachi ÿashiltalec co'ollaxa aso lashilte da ÿi'oxoden ñi Dios.

²² So José nataq'en souaxat da lpi'iÿaxac, nachi somayi da'aqtaxanem so llalaqpi so Israel da huo'o ca na'a'q, qaq ca'ai yi 'alhua Egipto. Nachi somayi ÿan da l'aqtac, da yaqto' sa ishit qome da qan'onaxatrañi soua lpi'inqa.

²³ Nataq'en souaxat da lpi'iÿaxa'c soua lta'al so Moisés co'ollaq ñiguiñi somayi, nachi soomayi ivi' naua tres ca'agoxoiqa da ÿoxojyiñi, souaxat da iloda'a somayi da ÿataqta 'onaxaic, qataq sa ishit da ñi'itrega da l'aqtac mayi ÿan so nta'a da qaÿalauat na ñaqpiolec.

²⁴ So Moisés nataq'en souaxat da lpi'iÿaxac, nachi somayi co'ollaq mashi ÿi, nachi sa ishit da ÿaÿamaxaden da qoÿiitega llalec aso llale so lta'a na netaña yi Egipto.

²⁵ Chaqdata da somayi ipacapega da nque'ejnaxaua qanqoÿin som lalamaxatpi ñi Dios, qaq sa ishit da cada'ac da taigui da tonaxac souaxat da nqopitaxanaqtaic da ñi'itaxaloxo.

²⁶ Qataq 'eeta'am da ÿataqta sallaxanec naq'en da huo'otaq sa ishit da qaiyacnapec souaxat da huasoilec so Cristo, qaq sa ishit da 'eeta'am naq'en 'enauac na yi'oqchigui nsallaxa yi Egipto. Cha'ayi somayi ÿataqta ilota'a que'eca lshiitenaxanaxac ñi Dios mayi ÿami' qominchiyi somayi.

²⁷ So Moisés nataq'en souaxat da lpi'iÿaxac, nachi somayi ca'ai yi 'alhua Egipto, sa ishit da ñi'itega da layiloxo so nta'a. Nachi somayi ÿataqta quetelec da lhuennataxac, 'eeta'am da ÿataqta iloto'ot ñi Dios mayi saq cha'a.

²⁸ So Moisés nataq'en souaxat da lpi'iÿaxac, nachi damaxasoxoolec so nqui'axac mayi naigui da qanqateeguesop somayipi yi Egipto. Qataq damaxasoxoolec da qai'ame'n naua laso'mi na ntago'q, yaqto' so namaxashic piguem l'ec mayi laataxanaxaic sa ishit da huo'o ca ÿalauat nam l'auaxanec llalec nam llalaqpi so Israel.

²⁹ So llalaqpi so Israel nataq'en souaxat da lpi'iÿaxac, nachi i'axasoxoolec aso auaxai togaxadai, 'eeta'am naq'en da daqaqtelec. Nachi so Egipto l'ecpi co'ollaq nshitaique da i'axasoxoolec asomayi, nachi 'ogaxaicpi.

³⁰ Nataq'en souaxat da npi'iÿaxac, nachi ishit da hualolaguiñi so lcopaqtaxat so la ciudad Jericó, co'ollaq so Israel llalaqpi mashi imat da coleesop somayi soua siete na'axa'te.

³¹ Nataq'en souaxat da lpi'iÿaxac aso Rahab mayi quishiguetaxai, nachi asomayi sa ishit da l-leuaxaua som sa ishit co'ollaxa da ÿalaq. Cha'ayi asomayi ÿataqta ÿaÿamaxatte' co'ollaq ÿacongueta soua lmejnaxanaxanqa so llalaqpi so Israel.

³² Qaq ¿chaq négue't ca lÿa sa'axat? Cha'ayi mashi qaica ca ldaqa' da sa'axat so Gedeón, Barac, Sansón, Jefté, David, Samuel, qataq so l'aqtaxanaxanecpi ñi Dios,

³³ da 'enauac somayipi chigoqchigui da lpi'iÿaxac da huo'o mshi ishit da loxonqa naua lÿa't 'ale'u, qataq da qaÿachiguiñi da ltaunaxanaxac ñi Dios mayi ÿachaxanapec co'ollaxa, qataq da qaÿapogui na alap nam shiguiÿac mayi dequi'iÿapecpi,

³⁴ qataq da qaÿalamat na lta'adaic nodec, qataq da nañitaguec da huotaique da qaÿalauat. Qataq nam qaica ca l'añaxacpi, qalaq ivida'a da ÿataqta 'añaxaicpi da huo'o na alaataxac, nachi ishit da loxonec nam npa'aguenaxauapi.

³⁵ Huo'o na 'alpi nataq'en ishit da qaltaq nauane' na lqatacpi da qaltaq qanca'alaxateec. Qataq huo'o na ileu souaxat da nque'ejnaxac, cha'ayi sa ÿaconguet da yaqto' qoÿaxaneec. Cha'ayi nshitaique da ivida'a qom qaltaq qanca'alaxateec na leuaxaicpi mayi qaica ca 'en'am qome ca achaalataxac.

³⁶ Qataq huo'o na laÿipi ÿataqta nque'etaxangui da n'enaguec, qataq da nhuaxanaguec, qataq da qaicoñida't naua lhua'q, qataq da qoÿanaigui ana ncoñitaxanaxaquipi.

³⁷ Qataq huo'o na qaÿalauat, qaidota'a na coma'. Qataq huo'o na qaiquesoxogui na lasot, qataq huo'o na ÿataqta qaÿi'iguen, qataq huo'o na qaidota'a na ÿilonec da qaÿalauat, qataq huo'o na chochi tateu'alo, ÿaatrañi naua anogo chigaqaiguilo na l'oc ana qagueta qataq na quetaq, ÿataqta huo'o da lachoxoyic qataq da nque'ejnaxac, qataq qaica ca nyacnataguec.

³⁸ Qaq se'eso shiÿaxauapi ÿataqta saq taiguet da lauodeua nam shiÿaxauapi qauemaicpi mayi huetalec ana 'alhua. Nachi somayipi chochi quetalec na tojlec 'alhua, qataq naua qasoxonaxa, qataq huetaigui na auac qataq ana llimiaxañipi na 'alhua.

³⁹ Qaq 'enauac se'eso shiÿaxauapi, nai'ctaxa da ÿataqta ÿaÿamaxadeeta ñi Dios souaxat da lpi'iÿaxac, qalaxayi sa ishit da ÿaconguet cam ÿachaxanapec co'ollaxa ñimayi,

⁴⁰ cha'ayi ñimayi huo'o cam ÿacteec da lyaquiaxac mayi ÿaqataxaatapigui'. Cha'ayi ñimayi tachigui yi lauel da shinaqta, yaqto' se'eso shiÿaxauapi ishit da qadÿateuo qom inoxoneu'a da ÿataqta naloqchiichiguiñi da nachaalataxac.