Hebreos 10 - Nuevo Testamento Toba Sur

¹ Cha'ayi na nqataxacpi mayi chigoqo'ot co'ollaxa so Moisés, namayi 'eeta'am da chochi lpaqal cam naÿa'cna mayi ÿoqta ÿaÿamaqchiguiñi, qaq sa ishit da nachina namayi na ÿoqta 'eesa. Qaq ÿoqo'oyi ne'ena nqataxacpi sa ishit da ÿoqta nalochiguiñi naq'en da lataxac nam nachaateu'a ñi Dios, chigoqchigui ne'ena qoÿaatapegueuo mayi qaÿi'iguelaqtalec yi 'oonolec vi'i.

² Cha'ayi ne'ena nqataxacpi da ishíttaxa da naloqchiichiguiñi da lataxac na shiÿaxauapi, nachi ne'ena nachitaqtaxanaxatpi sa ishíttaxa da qaltaq qoÿaneuo. Cha'ayi nam dachitaqtaxaatacpi, da huo'otaq mashi qaiÿouec na lasouaxashitpi, nachi namayipi ÿataqta nomta da qaica ca lasouaxashit.

³ Qalaxayi ne'ena qoÿaatapegueuopi, namayi chochi naigui da yaqto' namayipi iuennata'a da huo'o na lasouaxashitpi yi 'oonolec vi'i,

⁴ cha'ayi ne'ena ltago'q na huaca lhuadaicpi qataq na quetaq lhuadaicpi, namayi sa ishit da ÿañoxot da nqat na nasouaxashitpi.

⁵ Qaq ÿoqo'oyi so Cristo, co'ollaq huotaique da anaÿa ana 'alhua, nachi 'eetega ñi Dios, 'eeta': 'Am sa 'auaconguet na nachitaqtaxanaxatpi, qataq na qoÿaatapegueuo shiguiÿacpi, chaqdata da 'am 'auqataxaatapigui cam i'oquiaxac.

⁶ Nataq'en sa ishit da 'auaÿamaxaden ana nachitaqtaxanaqte mayi qaÿavigaxat, qataq anam qoÿaatapegueuo mayi naigui da yaqto' qanqat na nasouaxashitpi.

⁷ Nachi aÿim shiita': “Aÿim nagui ñanac, da yaqto' so'ot ca qonetapeguec, 'am ita'a Dios, cha'ayi nachida da qoÿittañi ÿiquiaxac nam 'ad'aqtaqa mayi nanettrañi.”

⁸ Qaq somayi hua'auchiguiñi da 'eetega ñi Dios da sa ishit da ÿaconguet qataq sa ÿaÿamaxaden na nachitaqtaxanaxatpi, qataq nam qoÿaatapegueuo shiguiÿacpi, qataq na qoÿaneuo mayi naigui da yaqto' qanqat na nasouaxashitpi, qaq nai'ctaxa da nachina nam damaxasoxoolecpi na nqataxacpi.

⁹ Ime, qataq 'eeta': “Aÿim ñanac, da yaqto' so'ot cam qonetapeguec, 'am ita'a Dios.” Qaq damayi da naigui 'eeta': Nqat ne'ena nachitaqtaxanaxatpi mayi qaÿavigaxat, nachi nañigui de'eda dalaxaic nachitaqtaxanaxat.

¹⁰ Qaq ñi Dios mashi sogote da qomi' iqui'itaxatte', cha'ayi so Jesucristo i'ot co'ollaxa da 'eetapeguec ñi Dios co'ollaq ÿan da maichi l'oquiaxac da 'oonolec da qaÿi'iguelaxalec da qaÿalauat.

¹¹ Qaq 'enauac nam ltaxaÿaxanaxanecpi na judiopi da qaitaxaÿapegue' ñi Dios, namayipi i'ot da l'onataxanaxac na na'axa'tesa'chi qataq queto'ot da ÿi'iguelaxattalec da ÿaatapegueuo nam nachitaqtaxanaxatpi, qaq nai'ctaxa da ne'ena nachitaqtaxanaxatpi sa ishit da nqat na nasouaxashitpi.

¹² Qalaxayi so Jesucristo nañan da qaÿalauat souaxat na nasouaxashitpi, nachi sa lÿa da qaltaq nañan. Ime, nachi nso'ongue da aloic ñi Dios.

¹³ Huaña, nachi iuatta'a ca na'a'q qom mashi qaÿacho'oto na lapia'te na npa'aguenaxauapi.

¹⁴ Cha'ayi ÿachigoxotchigui aso 'oonole lachitaqtaxanaqte da somayi chochaq tateec naq'en da nalochiguiñi da lataxac nam mashi iqui'itaxatta.

¹⁵ Qaq so Espíritu Santo ÿataqta 'eesa naq'en de'eda da qomi' da'aqtaxanema, cha'ayi da hua'auchiguiñi n'aqtac 'eeta':

¹⁶ Ñim qadataxala' 'eeta': Ca ñaÿamaxataxac qom ñaÿamaxate' namayipi qom mashi inoxoodeec que'ecaua na'axa'te, nachi aÿim sachaiguilo qome naua ÿaqataxaco naua lquiyaqte namayipi, qataq sedelguete naua lhuennataxaco.

¹⁷ Ime, qataq 'eeta': Sa ishit qome da qaltaq seuennatapega na lasouaxashitpi qataq nam i'o't qauema namayipi.

¹⁸ Qaq ÿoqo'oyi da huo'otaq mashi qaÿapalaxat na nasouaxashitpi, nachi sa ishit da iuen da qaltaq qaÿauo'o aca lÿa nachitaqtaxanaqte souaxat na nasouaxashitpi.

Ñiquigaxau'a ñi Dios

¹⁹ Qaq ÿoqo'oyi, qami' ÿaqaÿa't, nagui sa ishit qome da huo'o ca shi'oqtaique da senoxonaxau'a yi ndaqa' mayi sa ishit da qaishitapec, sachigoxosoqchiguilo so qaicoldeec ltago'q so Jesucristo,

²⁰ soqolaqtegue so qanqa'aic dalaxaic mayi chigaqaigui da nca'alaxa, som nqa'aic mayi taÿaueegue da laÿi so napoxonaxat, chigoqchigui da maichi nachaalataxac co'ollaq nañan.

²¹ Qaq so Jesús nachiso so 'oonolec qadtaxaÿaxanaxanec mayi ilotague' cam lauo' ñi Dios.

²² Qaq ÿoqo'oyi qomi' ishit da ñiquigaxau'a ñi Dios, qalaxayi ÿataqta huesote' ñaq'enaq naua qadquiyaqte, qataq ÿataqta 'eesa ñaq'enaq da qadpi'iÿaxac. Cha'ayi ñimayi mashi iqui'itaxatte' naua qadquiyaqte, yaqto' qomi' sa ishit da 'eeta'am da ñaq huo'o ca qadasouaxashit qataq mashi sogote da qaiÿota da qad'oquiaxac, qaÿauota'a na ndoteec 'etaxat.

²³ Qaq ÿataqta ñi'añaxataqtec qome da qanaquitaxac da qad'amqajnataxanaxac, cha'ayi ñi Dios ÿataqta ipacchigui qome da qomi' ÿachaxanapeguema.

²⁴ Qataq qomi' no'on da ñi 'oonolec ipacapegue' ca lÿa da ñaq huo'o naq'en da lsoxoyic, qataq da i'ot ca ÿaÿamaqchiguiñi.

²⁵ Sa ishit qome da soqolaxague da lliquiaxac na huo'o da n'onataxac da sa ishit da dataÿapegueu'a da qadaponaxac. Chaqdata da ñi 'oonolec i'añaqchittac ca lÿa, lamaaxa nagui da selaqa'a da mashi sa qaÿapeque ca na'a'q da ñi'iguelaq so qadataxala'.

²⁶ Cha'ayi da nachi qadhuennataxa da soqolaqto'ot da so'otaq ca qadasouaxashit, da huo'otaq mashi sauattonaq dam 'eesa lataxac, nachi sa ishit qome da qaltaq huo'o ca qoÿan da qaÿalauat, da yaqto' qaÿapalaxat ca nasouaxashit.

²⁷ Chaqdata da qomi' seuataqta'aguet cam qaica ca 'en'am lchiquiaxac qom qanmit 'enauacna, qataq cam qaica ca 'en'am na l'edaxa nodec mayi ÿavigaxat qome na npa'aguenaxauapi ñi Dios.

²⁸ Da huo'otaq huo'o ca sa ishit da ÿalaxaguet na lqataxacpi so Moisés, qaq da huo'otaq huo'oi caua dos huo'otaq tres da nateeta't ca l'aqtaxanaxa'c da i'axa't camayi, nachi camayi ÿataqta sa qaichoxonnai' da qaÿalauat.

²⁹ Qaq ¿táloxochiyictoxo' da saq taÿapigui yi qadvilli qami' da ÿataqta 'itchiguiñi da ÿacteec qome da nhuaxanaguec cam 'ico' petapigui so llalec ñi Dios, qataq ÿataqta saqca ca ÿanaiguilo soua ltago'q, qataq da ishiuen so n'Espíritu ñi Dios mayi ÿauotec camayi? Cha'ayi se'esoua ltago'q nachisoua soua ÿataqta 'itchiyiñi naq'en dam aÿamaxataxac dam chigoqchigui da qui'itta qanqoÿin namayipi.

³⁰ Qaq qomi' saÿajnaq da ñi qadataxala' co'ollaxa 'eeta': “Aÿim mayi nachaÿim so'ot ca nhuaxanaguec ca shiÿaxaua, nachaÿim mayi seshiitenaxan.” Nataq'en 'eeta': “Na qadataxala'ai, namayi ishiiten qome na lalamaxatpi.”

³¹ Qaq ¡ÿataqta lta'adaic da lchiquiaxac da lhuaqÿaxac ñi Dios mayi nachi 'eetai' da nca'altauec, da huo'otaq huo'o ca ÿaconeu'a!

³² Qalaxayi qami' qauennachi qome da 'eetec soua hua'a'u vi'iyi co'ollaq qami' chita'ague da qami' qaicoÿadelguete. Huaña, nachi ÿataqta huo'o da qadhualaxaviqui da qan'añaxachiiguet da qanque'ejnaxaqui souaxat da qanloquiaxaqui.

³³ Cha'ayi da qoñiita huo'o na qaishiueetac, qataq qaÿauana'a't da sa qaiyacnapec, qataq huo'o da qoñiita nam nhuanau'a da nque'ejnaxac nam nachi 'eetec de'eda da nque'ejnaxac qanqoÿin.

³⁴ Qataq qami' ÿataqta huo'o da qadchoxonnataxanaxai nam qaicoñittai', qataq ivida'a da ÿataqta huo'o da qantonaxaqui da qan'añaxachiiguet da qaiuotaxanec na qadalamaxachiipi, cha'ayi qami' qauaÿajñiita da huo'o cam hueta'ague da piguem mayi ÿacteec da lyac qataq qaica ca loga't.

³⁵ Qaq ÿoqo'oyi sa ishit qome da huo'o ca qayi'iitaique, cha'ayi ÿataqta lta'adaic qome ca qanshiitenaguiiqui.

³⁶ Qami' iuen da ÿataqta huo'o ca qadhualaxaviqui, da yaqto' qau'ochi cam 'eetapeguec ñi Dios, qataq da yaqto' qauacoñiiguet cam ÿachaxanapec ñimayi.

³⁷ Cha'ayi naua ñiyigui'shi l'aqtaqa ñi Dios 'eeta': Ÿataqta saqaÿaloq da anac qome cam naÿa'cna, qataq sa naÿaloxon da anac.

³⁸ Qalaxayi cam aÿim saÿamaxadeeta da nachica ca no'on da lataxac, camayi da lca'alaxa chigoqchigui da lpi'iÿaxac. Qalaxayi camayi da huo'otaq ÿi'iguelaq, qaq sa ishit da saÿamaxadeeta camayi.

³⁹ Qalaxayi qomi' sa ishit qome da nachiqomi' da shi'iguelaxasoq qataq da 'ico' qomi' qanlaxajyiñi. Chaqdato' da qomi' ÿataqta huo'o da qadpi'iÿaxac, yaqto' ishit da qaÿaÿamaxat da qanachaalataxac.