Gálatas 4 - Nuevo Testamento Toba Sur

¹ Qaq da shiitega, 'eeta': Ca ñalec mayi qaÿauotaique da talec da lsallaxa ca lta'a, da huo'otaq ñaq nogotolec, qaq camayi ÿataqta 'eeta'am ca chochi nlatac, qaq nai'ctaxa da camayi nachica ca 'aco'.

² Qataq huo'o nam shiÿaxauapi mayi ilotague' somayi, qataq huetapegue' nam l'onatacpi, chochi ivitta'a cam na'a'q mayi ÿicchigui so lta'a.

³ Qaq 'eda da 'eetec qomi'. Co'ollaq ñaq souaqtaigui da qannogotshic, nachi qomi' souaqto'ot nam lhuennataxac nam shiÿaxauapi mayi huetalec ana 'alhua.

⁴ Qalaxayi co'ollaq ivita so na'a'q mayi naloqnec, nachi ñi Dios namaq so llalec da nañaxatoigui naq'en aso 'alo, da chigoqtoigui naq'en na judiopi mayi hueto'ot da lapaxaguenataxanaxac na nqataxacpi.

⁵ Qaq 'eda da 'eetec da lvidaxac somayi, yaqto' ishit da qomi' huesodeec naq'en da yaqto' sa ishit da souaqto'ot na nqataxacpi, nachi ñi Dios ishit da qomi' ÿacongueta da ÿataqta qomi' llalqa.

⁶ Qaq dam ichoxot da ÿoqta qami' llalqa ñi Dios 'eeta': Ñimayi qami' namaxalo so n'Espíritu so llalec da taiguilo naua qadquiyaqchilli'. Qaq so Espíritu deÿaxan, 'eeta': “¡'Am ita'a!”

⁷ Qaq ÿoqo'oyi nagui ÿataqta 'am llalec ñi Dios, qaq sa ishit da chochi 'am nlatac. Qaq nagui da ÿoqta 'am llalec, nachi ñimayi 'am ÿami' qome da lsallaxa mayi ÿachaxanapec da ÿan, chigoqchigui naq'en so Cristo.

So Pablo ÿataqta huo'o da lhuogoxo souaxat na 'amqajnataxanaxaicpi

⁸ Qami' co'ollaq saxanaxa da qauauattoñi ñi Dios, qalaq qami' lcoñitagui'shi nam saq cha'api qanatameetacotpi mayi saq 'en.

⁹ Qalaxayi nagui da qauauattoñi ñi Dios, huo'otaq da ñimayi qami' ÿauatto'n, nachi ¿táloxochiyictoxo' qami' da qaltaq qavi'iguelaqaitega dam napaxaguenataxanaxac mayi qaica ca l'añaxac qataq qaica ca naigui da qaltaq qoviito'ot, da yaqto' qami' l-lataqa?

¹⁰ Yi qami' ñaq huo'oi naua na'axa'te mayi qau'ochiita'pe, ca'agoxoiqa qataq naua vi'iyi.

¹¹ Qaq ÿoqo'oyi aÿim ÿataqta lta'adaic da icolanaxa da sa iuena'a da qaica ca naigui da i'onataxanaxac mayi huaigui da qoñiita.

¹² Qaq qami' ÿaqaÿa't, qami' ñachoxodeetoiguilo da no'on da aÿim qau'enaxachiichigui, cha'ayi aÿim nachiqami' shiita'ama. Cha'ayi sa ishit da huo'otaq qami' huo'o ca aÿim qau'ochiic.

¹³ Cha'ayi mashi sogote da qami' qauaÿajñiita da 'eetec co'ollaq chita'ague da qami' sa'axatema da n'aqtac mayi chigaqaigui da nca'alaxa. Qaq shiitec de'eda co'ollaxa, souaxat so ÿalolaxa.

¹⁴ Qaq se'eso ÿalolaxa mayi aÿim hueta'ac, somayi chochi ñi'iguenaxat. Qalaxayi ñaqaiyita qami' sa ishit da aÿim qau'otañi, qataq sa ishit da aÿim sa qauacoñiiguet. Chaqdata da qoñiita'am qanqashiñi aÿim ca chigaqshiguem Dios lamaxashic, qataq 'eeta'am qanqashiñi da nachaÿim Jesucristo.

¹⁵ Qalaq ¿táigue que'eca qantonaxaqui mayi qauanomiiteguet co'ollaxa? Qamaq aÿim shinapec da huo'o da no'on qan'aqtaguiiqui, 'eeta': ishíttaxa da qauañoxochi da qanqachi' naua qad'ai'chilli' da aÿim qai'añiima da huo'otaq ishit da qaica ca lqalaic.

¹⁶ Qaq nagui, ¿peta'a qami' ñipa'aguenaxa'u souaxat da aÿim 'eesa da qami' sa'axatema?

¹⁷ Cha'ayi ne'ena shiÿaxauapi ÿataqta qalota da naquitaxac da qoñiita, qalaxayi sa ishit da no'on ca naquittaique. Cha'ayi namayipi chochi nshitaique da qomi' qoquiÿa'aisalo. Qaq da ime, nachi qami' qauatailec ca 'eetapeguec namayipi.

¹⁸ 'Eesa mque' da no'on da qanaquitta'a ca nÿa. Qalaxayi da no'on ca qoÿiitapeguec, qaq damayi no'on da nachi 'eetai' da qanayicto'ot. Qaq sa ishit da chaqdata da qami' soota'agueta.

¹⁹ Qami' ÿalqolqa, nagui qaltaq ipactegue da ñiqui'ic, souaxat da qoñiita, shiita'am aca 'alo da dachitattac, souaxat da huotaique da deco'o. Qaq nachi shictot qome da ñique'ejnaxac, chochi ivitta'a so Cristo da qami' quichiguilo da lataxac.

²⁰ ¡Da iyaxa da nachiqami' sootaiguilo nagui, da yaqto' ñadalaxat ca itaxaÿaxac da qami' setaxaiguilo, cha'ayi aÿim ÿataqta sa saÿaten ca shiitec, souaxat da qoñiita!

Qaÿaloqnaxana aso Agar qataq aso Sara

²¹ Qami' mayi qauauoitaique da qoviito'ot na nqataxacpi mayi chigoqo'ot so Moisés, qaq aÿim qau'axachiim nagui de'eda 'eeta': ¿Sa ishito' peta'a da qan'axaÿaxañiitegacnaxa da 'enapec na nqataxacpi?

²² Cha'ayi damayi nanettañi, 'eeta': So Abraham dos soua llalqa. So 'oonolec llalec, late'e aso nlata. Qaq so lÿa, qalaq late'e asom lalamaqte lhua mayi sa ishit da nlata.

²³ Som llalec mayi late'e aso nlata, da lañoxoc nachida dam lañoxoc 'enauac nam yi'oqchigui ñaqpiolec. Qaq som llalec asom sa ishit da nlata, qalaq somayi da lañoxoc ipacchigui dam ÿachaxanapec co'ollaxa ñi Dios.

²⁴ Qaq damayi chochi qaÿaloqnaxangui. Cha'ayi se'esoua dos 'alo nachi naiguilo naua dos aÿamaxataxaco. Se'eso 'oonolec naua aÿamaxataxaco, somayi chigoqchiguiña asom qasoxonaxa mayi l'enaxat Sinaí. Qaq somayi nachiso so naigui aso Agar. Qaq ÿoqo'oyi nam hueto'ot se'eso aÿamaxataxac, namayipi da nañoxoc taÿa'a da nlatacpi.

²⁵ Cha'ayi aso Agar nachaso asom naigui aso qasoxonaxa Sinaí mayi naña yi Arabia. Qaq asomayi nachaso asom naigui yi nagui Jerusalén, cha'ayi nagui yi'iyi la ciudad 'eeta'am aca chochi nlata, nataq'en 'enauac nam llalaqpi.

²⁶ Qalaxayi yim Jerusalén mayi hueta'ague da piguem, yimayi ÿataqta huesochiguiñi. Qaq qomi' mayi nachiqomi' llalaqpi yimayi.

²⁷ Cha'ayi nam ñiyigui'shi l'aqtaqa ñi Dios 'eeta': Ÿataqta 'auamachiguiñi qome, 'am 'alo mayi sa ishit da 'auco'o, 'am mayi sa ishit da huo'o ca 'ai'alaqpi; ÿataqta 'au'alaq qome souaxat da 'antonaxac, 'am mayi sa 'anauane' ca lqui'ic da 'auco'o. Cha'ayi aca 'alo mayi qaÿalat ÿataqta ÿacteec qome ca llalaqpi, qaq sa ishit da 'eeta'am acam 'alo mayi huo'o ca lhua.

²⁸ Qaq qami' ÿaqaÿa't, qomi' shinaqta'am so Isaac, nachi qomi' llalqa ñi Dios mayi qomi' ÿachaxana'pe co'olloxochiyi.

²⁹ Qalaxayi de'eda 'eetec som ñalec mayi yi'oqchigui de'eda lañoxoc co'ollaq ÿataqta icaatac som lÿa ñalec mayi chigoqo'ot da lañoxoc so Espíritu Santo, qaq nachida da 'eetec nataq'en nagui.

³⁰ Qalaxayi ¿huá'ague cam 'eetec naua ñiyigui'shi n'aqtaqa? Qomyi 'eeta': “'Au'odauec qome añi nlata qataq ñim llalec, cha'ayi ñim llalec añi nlata sa ishit da nhuanau'a da nsallaxa mayi qaÿaqataxaatapigui' da talec ñim llalec añi 'alo mayi sa ishit da nlata.”

³¹ Qaq ÿoqo'oyi qami' ÿaqaÿa't, qomi' sa ishit da shinaqta'am som llalaqpi aso nlata. Cha'ayi qomi' shinaqta'am som llalaqpi asom 'alo mayi sa ishit da nlata.