Filipenses 4 - Nuevo Testamento Toba Sur

Nachi 'eetai' qome da qantoñiitapeguec so qadataxala'

¹ Qaq ÿoqo'oyi qami' ñauochaxa'u ÿaqaÿa't, aÿim ÿataqta huo'o da iyaxa da qami' ñauaneto, cha'ayi qami' mayi nachiqami' qau'ochi da ñitonaxac qataq qami' ÿi'oxode'te. Qaq nachi 'eetai' qome da qoquiitague' so qadataxala', qami' ñauochaxa'u.

² Qaq huo'o da ÿaqataxac aca Evodia qataq nataq'en aca Síntique da caamayi no'on da ÿataqta nhuoteeta't, cha'ayi caamayi 'eeta'ama da maichi nqaÿa't naq'en so qadataxala'.

³ Qataq 'am i'onataxanaxaua mayi saq aÿim 'auÿoteec, 'am shinapega da 'autaua'n qome que'ecaua qadqaÿa't, cha'ayi caamayi ÿataqta qalota da ltaunaxanaxa'c aÿim da sa'axataqtac da nca'alaxa, nataq'en ca Clemente qataq nam laÿipi i'onataxanaxauapi. Qaq ñi Dios mashi ÿidelec acam nanedaxalate nam nca'aleec na l'enaxatpi namayipi.

⁴ Qaq ÿataqta qantoñiitapeguec qome so qadataxala' 'enauaque naua na'axa'te. Qaq shi'iguelaxattalec de'eda i'aqtac da ÿataqta qantoñiitapigui' qome.

⁵ Qaq 'enauac qome na shiÿaxauapi ÿataqta qami' ÿauattoote' da qami' huotaxanaqtaqaiqa. Cha'ayi so qadataxala' mashi sa qaÿapeque da nvi'.

⁶ Qataq sa ishit qome da huo'o ca qami' ÿaquicoqchitta'pe. Chaqdata da ÿataqta qau'aqtaxañiitem ñi Dios da ivita da qanqouagaxauñiitacot. Qauÿaxañiÿot ñimayi, nataq'en qai'añiitacot da qan'achiquiaxaqui.

⁷ Qaq yaqto' ñi Dios qami' ÿanema da l-lagaxayic mayi ÿataqta napacalec 'enauac nam laÿajneguesat ca shiÿaxaua. Qataq de'eda nlagaxayic, damayi ntela'a da qadquiyaqteÿaxaqui qataq da qadhuennataxaqui da qan'ayiitau'a so Cristo Jesús.

Qailotegue da lataxac ca ÿaÿamaqchiguiñi

⁸ Qami' ÿaqaÿa't, qataq da lÿa 'eeta': ÿataqta qauloitegue qome da lataxac cam ÿataqta 'eesa, qataq 'enauac cam iuen da huo'o naq 'enec qanqoÿin, qataq cam no'on nataxac, qataq cam qaica ca ÿalecta'aguet, qataq 'enauac cam qaÿaÿamaxadeeta, qataq cam no'on da n'aqtaguec. Qataq qauloiteguet 'enauac nam i'ot da ÿaÿamaqchiguiñi, qataq cam i'ot da ñi'oxonnataxanaxac.

⁹ Qataq ÿataqta qau'ochi qome 'enauac nam qami' sapaxaguenque, qataq nam ÿaqataxacpi mayi qami' sanema, qataq nam i'aqtacpi mayi qau'aqaichigui, qataq nam so'otpi mayi qauauañiichigui. Nachina qau'ochi qome. Qaq ñim Dios mayi chigoqo'ot da nlagaxayic qami' hueta'agueta qome.

Aso ltaunaxanaqte so Filipos l'ecpi mayi ÿamaxa so Pablo

¹⁰ Qaq aÿim ÿataqta qalota da ñitonaxac so qadataxala' souaxat da qoñiita da qaltaq aÿim qauennachiÿa'a. Qaq sa ishit da huo'otaq shiitega da aÿim qaucouai'ai, cha'ayi chochi qaica ca qaddaqa'ai da aÿim qautauañi.

¹¹ Qaq sa ishit da shinapec de'eda souaxat da aÿim huo'o da iuenaxanaxa, cha'ayi aÿim saÿaten da ñitootapeguec cam huo'o.

¹² Aÿim sanai'ac da sootaigui da iuenaxanaxa, qataq sanai'ac da sootaigui da qaica ca seueetac. Qataq aÿim saÿaten da ñala'aguet ca camachicague't, nai'ctaxa da huo'otaq ncomadaxa, huo'otaq nqouaxa, huo'otaq da qaica ca qaiuen, huo'otaq da nhuenaxanaxa.

¹³ Aÿim ishit da ñala'aguet 'enauac na chochaqna, cha'ayi so Cristo aÿim ÿanem da i'añaxac.

¹⁴ Qalaxayi qami' ÿataqta ÿaÿamaqchiguiñi da aÿim qautauañi souaxat da iuenaxanaxa.

¹⁵ Qataq qami' mayi qoñiitaña na Filipos, nataq'en qauaÿajñiita co'ollaq chita'ague da sa'axat da n'aqtac mayi chigaqaigui da nca'alaxa, qaq co'ollaq shica'ai yi Macedonia, qalaq nachiqamiita 'enauac na 'amqajnataxanaxaicpi da aÿim qanamaqaÿa aso qadtaunaxanaqchi souaxat da qantoñiitapeguec da itaunaxanaxac da qami' sapaxague'n.

¹⁶ Cha'ayi aÿim co'olla ñaq soota'a yi Tesalónica, qalaq qami' aÿim qanamaqaitega ana qadtaunaxanaqchi, souaxat da iuenaxanaxa.

¹⁷ Qalaxayi aÿim sa ishit da chaqdata da iuennataxa da saconguet aca ñitaunaqte. Cha'ayi chaqdata da aÿim ñishitaique da nquictashiguem da qad'onataxanaxaqui, da yaqto' qami' ishiite'n qome ñi Dios.

¹⁸ Cha'ayi aÿim mashi sogote da saconguet da ñitaunaguec, qaq damayi ÿataqta ÿapacauec. Cha'ayi aso aÿim qanamaqaÿa mayi aÿim nda'a so Epafrodito, asomayi ÿataqta nalaigui 'enauac na iueneguesat. Qaq asa'aso qadtaunaxanaqchi, asomayi 'eeta'am ca nchinaxanaxat ama na laita mayi qaÿavigaxat da qoÿanot ñi Dios, qaq ÿataqta ÿaÿamaxadeeta ñimayi.

¹⁹ Qaq ñim ita'a Dios qami' ÿanema qome 'enauac nam qaviñiitaique da ÿachigoxotchigui dam qaica ca 'en'am da lli'oxoyic lsallaxa mayi hueto'ot naq'en so Cristo Jesús.

²⁰ ¡Qaq ñim qadta'a Dios ÿataqta nachi 'eetai' qome da ñi'oxonnataguec! Aja', nachi 'eetec.

Da pa'ateec nquinaxanaxac

²¹ Qaq qami' mayi qoquiitague' so Jesucristo, qai'añiim qome da iquinaxanaxac 'enauac nam lalamaxatpi ñi Dios. Qataq nam qadqaÿañicpi mayi aÿim hueta'aguet nataq'en qami' ÿamaxalo da lquinaxanaxac.

²² Nataq'en qami' ÿamaxalo da lquinaxanaxac 'enauac nam hueta'a ne'ena nam lalamaxatpi ñi Dios. Qataq ÿataqta lta'adaic da lquinaxanaxac nam nallippi ñim lta'a na nta'alpi mayi netaña na Roma.

²³ Qaq so qadataxala' Jesucristo qami' ÿanema qome da lqouagaxanaqtaic. Aja', nachi 'eetec.