Filipenses 1 - Nuevo Testamento Toba Sur

So Pablo qaicoñittai' co'ollaq ÿamaxa aso lede so 'amqajnataxanaxaicpi mayi netaña yi Filipos

¹ Aÿim Pablo qataq ñi Timoteo, qomi' l-lataqa so Jesucristo. Qomi' samaxasaxa ana qodede 'enauac na 'amqajnataxanaxaicpi mayi netaña yi la ciudad Filipos, nam lalamaxatpi ñi Dios qataq n'attau'a so Cristo Jesús. Ana qodede nataq'en taÿa'a na lataxala'pi namayipi qataq na ltauapi.

² Qami' qauacoñiiguet qome da lqouagaxanaqtaic qataq da l-lagaxayic ñi qadta'a Dios qataq so qadataxala' Jesucristo.

So Pablo nqouagaxaueetapeguelec na 'amqajnataxanaxaicpi

³ Aÿim naxa da tachigui yi iuel da qoñiita, nachi qaltaq saatacot da ñi'achiquiaxac ñi Dios.

⁴ Qaq da ñoqouagaxaueetac, qalaq ÿataqta huo'o da ñitonaxac, souaxat 'enauac da qoñiita.

⁵ Cha'ayi qami' nataq'en qanhuañiÿau'a da qau'axachi da no'on qad'axaÿaxac, chigoqchiguiña so na'a'q co'ollaq chita'ague da qauacoñiiguet, chochi ivitta'a nagui.

⁶ Qaq aÿim ÿataqta 'eesa ñaqshin da ñi Dios mayi chigoqchigui da qami' i'oteque da no'on dalaxaic qadataxaqui, ñimayi queto'ot da i'ottac damayi, chochi ividaxatta'a ca na'a'q qom ñi'iguelaq so Jesucristo.

⁷ Qaq damayi sela'a da nachi lataxac da aÿim seuennatapega 'enauac da qoñiita, cha'ayi aÿim ÿataqta qami' sauoteque, qataq cha'ayi qanhuañiÿau'a da lqouagaxanaqtaic ñi Dios, nai'ctaxa da huo'otaq aÿim qaicoñittai', huo'otaq da aÿim ñachaateu'a na nta'alpi da setaqlec da n'aqtac mayi chigaqaigui da nca'alaxa, da sa'axat da ÿataqta 'eesa damayi.

⁸ Qaq ñi Dios ÿaÿateeta da ÿataqta sauotec 'enauac da qoñiita, da shiita'am da lauotaxanaqtaic so Jesucristo da qoñiita.

⁹ Qataq naxa da ñoqouagaxaueetac, qalaq seÿaxaataique da ña qanquigaxatshiguem da qadauotaxanaqtaiqui qataq na qadaÿajñiqui qataq da qadauattonaxanaxaqui,

¹⁰ yaqto' ishit da qauaÿajñi da qalca'aiua'a ca ÿataqta ÿaÿamaqchiguiñi. Qataq yaqto' ishit da qui'itta da qanachaalataxaqui, qataq sa ishit da huo'o ca qami' qaÿasaxalguete qadasouaxashichi qom ivita da ñi'iguelaq so Cristo.

¹¹ Qaq yaqto' so Jesucristo ÿataqta nlaxatchigui da qanachaalataxaqui ca no'on nataxac, da yaqto' huo'o da ñi'oxonnataguec qataq da lli'oxoyic ñi Dios.

Da ñachaalataxac nachattaigui so Cristo

¹² Qami' ÿaqaÿa't, aÿim ñishitaique da qauaÿajñiita da souaigui, da damayi 'eeta'am da itauan da n'aqtaxanaxac mayi i'axat da nca'alaxa.

¹³ Cha'ayi 'enauac na allippi mayi ilotague' na lma' ñi lta'a na nta'alpi, qataq 'enauac na hueta'a ne'ena, ÿaÿaten da aÿim qaicoñittai' souaxat da sasoilec da shictague' so Cristo.

¹⁴ Qaq can qaÿaÿaten da aÿim qaicoñittai', nachi huac da 'enauac na qadqaÿañicpi da n'añaxat da i'axat da l'aqtac ñi Dios, qataq ÿataqta pi'iÿa'a so qadataxala'. Qaica ca ñi'itaique.

¹⁵ Qaq 'eesa da huo'o na i'axattac so Cristo, qalaxayi huo'o na laÿipi ÿataqta ÿaÿamaqchiguiñi da lhuennataxac.

¹⁶ Qataq huo'o na 'eeso'oyi i'axattac so Cristo, qalaxayi chochi huo'o cam naquittaique. Qaq sa ishit da 'oonolec ca lhuennataxa, cha'ayi namayipi nshitaique da nquigaxateec da ñique'ejnaxac nagui da aÿim qaicoñittai'.

¹⁷ Qalaxayi nam laÿipi ÿataqta quetaigui da lauotaxanaqtaic, cha'ayi namayipi ÿaÿaten da aÿim soota'a ne'ena, da yaqto' setaqlec da n'aqtac mayi chigaqaigui da nca'alaxa.

¹⁸ Qalaxayi nachi 'en'am sa seteetega namayipi da tateu'a da dos naua lhuennataxaco, huo'otaq sa ishit, cha'ayi da i'axattac so Cristo. Qaq nachida da i'ot da aÿim samachiguiñi. Qataq lamaaxa qome da ÿacteec naq'en da ñitonaxac damayi,

¹⁹ cha'ayi aÿim saÿaten da saqca ca da da ñachaalataxac, cha'ayi qami' aÿim qanqouagaxauñiitalec, qataq da ltaunaxanaxac so Espíritu Santo mayi netanguit co'ollaxa so Jesucristo.

²⁰ Cha'ayi aÿim da shiitapeguec qataq dam ñaquitta'a da sa ishit qome da huo'o ca ñi'aloxootaique. Chaqdata da qaica ca shi'itaique da sa'aqtaxaatac, da yaqto' 'eeta'am nagui, huo'otaq dam sata'ague, da aÿim chigoqchigui da nquictashiguem da qaila'a da l'amaqchic so Cristo, nagui da ña ñica'altauec, huo'otaq da mashi seleu.

²¹ Cha'ayi da ñachaalataxac mashi nachattaigui so Cristo, qaq ÿoqo'oyi da seleu, qataq ÿacteec ñaq'en da 'onaxaic.

²² Qalaxayi da ña ñica'altauec, nachi ishit da so'onataxanot so qadataxala'. Ÿoqo'oyi aÿim sa saÿaten cam ÿoqta llica'ateu'a naamayi.

²³ Ÿataqta huo'o da lqalaic ñaq'en cam ÿoqta llica'ateu'a naamayi. Cha'ayi da lÿa iuennataxa 'eeta': Aÿim ñishitaique da seleu, yaqto' nachi 'eetai' da soota'aguet so Cristo. Cha'ayi damayi ÿataqta ÿacteec da 'onaxaic ñaqshin.

²⁴ Qalaxayi da lÿa iuennataxa 'eeta': Da huo'otaq ña ñica'altauec, qaq damayi nataq'en ÿacteec da no'on, souaxat da qoñiita.

²⁵ Qaq cha'ayi ÿataqta 'eesa ñaq'en damayi, qataq saÿateeta da ña qami' soota'agueta, da yaqto' qami' setauanque da qanquiquiitashiguem qataq huo'o da qantonaxaqui, souaxat da qadpi'iÿaxaqui,

²⁶ da yaqto' qaltaq aÿim qoviita'aguet, nachi 'eeta'am da so'ot da qantonaxaqui da qavi'oxoyiñiitac so Cristo Jesús.

²⁷ Qaq chaqdato' da qami' qanpogoxoiñiÿapegue' da yaqto' da qadataxaqui nateeteguet da l'aqtac so Cristo. Qaq yaqto' da ishit da qami' sevitalo, huo'otaq da sa ishit, qalaxayi ñaqaiyita ñishitaique da aÿim ivida'a qome ca i'axaÿaxac da qoñiita da sa ishit da qanañaxañiiñi, qataq sa ishit da qami' huesoguilo da qauloquiitapeguelec da qadpi'iÿaxaqui mayi qauachigoxochiÿaigui da n'aqtac mayi chigaqaigui da nca'alaxa,

²⁸ qataq sa ishit qome da qami' icolanaqchi't nam qami' ipa'agueeta'pe. Cha'ayi damayi l'anaxat da namayipi taÿa'a da qanlaxajñi, qalaxayi damayi nataq'en l'anaxat da qami' qanca'alaxatreec. Qaq damayi maichi chigoqchigui ñi Dios.

²⁹ Cha'ayi qami' qoÿanema da qan'achiquiaxaqui, da yaqto' qau'amaqchiñi so Cristo, qataq da huo'o da qanque'ejnaxaqui, souaxat somayi.

³⁰ Qaq qami', nataq'en aÿim, 'eeta'a't da qanloquiaxac. Qaq sogote co'ollaxa da qauauañiichigui da 'eetec da ñiloquiaxac, qaq nagui qataq huo'o da qad'axaÿaxaqui da ñaq shicto'ot da seloctac.