Filemón 1 - Nuevo Testamento Toba Sur

So Pablo ÿamaxa aso lede so Filemón

¹ Aÿim Pablo, aÿim qaicoñittai' souaxat da sasoilec so Cristo Jesús. Aÿim qataq ñi Timoteo 'am samaxa ana ÿide, 'am qanauochaxaua qadqaÿa Filemón mayi 'am qad'onataxanaxaua,

² qataq 'enauac nam 'amqajnataxanaxaicpi mayi laponqa' na 'adma', nachi 'en'am aca qadqaÿa Apia, qataq ca Arquipo mayi nataq'en ale, 'eeta'ama qomi'.

³ Qaq qauacoñiiguet qome da nqouagaxanaqtaic qataq da nlagaxayic mayi chigoqo'ot ñi qadta'a Dios qataq so qadataxala' Jesucristo.

Da lsoxoyic qataq da lpi'iÿaxac so Filemón

⁴ Aÿim nachi 'eetai' naxa da saatacot da ñi'achiquiaxac ñi Dios da tachigui yi iuel da qoneta da ñoqouagaxaueetac.

⁵ Cha'ayi aÿim huo'o da i'axaÿaxac da 'adauotaxanaqtaic qataq da 'adpi'iÿaxac so qadataxala' Jesús qataq da 'adauotaxanaqtaic 'enauac nam lalamaxatpi ñi Dios.

⁶ Nataq'en seÿaxaatacot ñi Dios, da yaqto' nam da'amqajnataxanpi mayi chigoqchigui da 'adpi'iÿaxac, da yaqto' namayipi ÿataqta ÿaÿateetegue ca lataxac 'enauac na nqouagaxanaqtaicpi mayi chigoqo'ot so Cristo Jesús.

⁷ Qaq ÿoqo'oyi aÿim ÿataqta samachiguiñi qataq huo'o da i'añaxac souaxat da 'adauotaxanaqtaic, cha'ayi 'am ÿaqaÿa, ÿataqta 'am chigoqchigui da huo'o da l'añaxac da lquiyaqteÿaxac 'enauac na qadqaÿañicpi.

So Pablo iÿaxanaique ca nchoxonnataguec so nlatac Onésimo

⁸ Qaq ÿoqo'oyi aÿim nai'ctaxa da aÿim lamaxashic so Cristo qataq huo'o naq shinec da huo'o ca 'am samaxalec da 'au'ot,

⁹ qalaxayi aÿim sepacapegue' da 'am ñachoxodeetot, souaxat da nsoxoyic. Aÿim Pablo nagui mashi aÿim ÿi'axaiqui qataq aÿim qaicoñittai', souaxat da sasoilec so Cristo Jesús,

¹⁰ qaq nagui 'am seÿaxanot da 'auchoxoden qome na Onésimo. Namayi mashi ivida'a da 'eeta'am ñaq'en ca yi'oqchigui ÿalec ana'ana sootaigui ncoñitaxanaxaqui.

¹¹ Ne'ena Onésimo soua lÿa't na'axa'te namayi chochi 'adlatacolec qaica ca taiguet, qalaxayi nagui namayi ÿataqta ipe'et nataq'en 'am.

¹² Qaq nagui namayi qaltaq 'am samaxa, qaq 'auaconguet qome, qalaxayi qoneta'am qome da nachaÿim da aÿim 'auaconguet.

¹³ Qaq aÿim ishíttaxa da ñillañi namayi, da yaqto' aÿim neto'ot, da yaqto' 'anmenguet da namayi aÿim do'onataxanot nagui da ñaq aÿim qaicoñittai' souaxat da n'aqtac.

¹⁴ Qalaxayi aÿim sa ishit da huo'o ca sa'aulec, cha'ayi sa iuena'a da huo'otaq sa 'auaÿamaxaden, yaqto' que'eca 'adqouagaxanaqtaic da shiita, sa ishit da 'ico' 'am qaÿamaqtalec. Chaqdata da maichi 'am chigoqchigui.

¹⁵ Cha'ayi sa iuena'a da na Onésimo cada'ac da saq 'am no'ot, yaqto' nagui da 'am ÿi'iguelqot, nachi sa ishit da 'am ca'ai.

¹⁶ Qaq nagui namayi sa ishit da 'ico' 'adlatac. Cha'ayi namayi saq 'en'am ca chochi nlatac, cha'ayi namayi 'eeta'am ca 'anauochaxaua 'adqaÿa. Namayi ÿataqta sauotec, qalaxayi ÿataqta ÿacteec 'anqa'en qome da 'adauochi. Sa ishit da chaqdata da 'auauotec, cha'ayi qoneta'am shiÿaxaua, cha'ayi namayi 'eeta'am ca 'adqaÿa 'ad'amqajnataxanaxaua so qadataxala'.

¹⁷ Qaq ÿoqo'oyi qom ÿoqta 'eesa da aÿim 'adÿa, qaq ÿataqta qoneta'am aÿim da 'auaconguet namayi.

¹⁸ Qaq da huo'otaq huo'o ca 'am i'otec co'ollaxa sa ÿaÿamaxañi, huo'otaq huo'o aca lavigaxaiste, qaq no'on da aÿim 'auÿaxanot da seshiiten.

¹⁹ Qaq aÿim maichi semapegue' da shiyiñi de'eda i'aqtac da aÿim 'am seshiiten qome, nai'ctaxa da huo'otaq 'am ishit da tachigui yi 'adhuel ñaqshin da aÿim neto'ot nataq'en añi 'adavigaxaiste, souaxat da maichi 'anachaalataxac.

²⁰ Aja', 'am ÿaqaÿa, 'auauo'o qome ca 'adqouagaxanaqtaic da shiita, cha'ayi 'am mashi 'au'amaqteetac so qadataxala'. 'Au'añaqchit qome da iquiyaqteÿaxac, cha'ayi maichi qomi' n'amqajnataxanaxa'u so Cristo.

²¹ Qaq aÿim 'am samaxa ana'ana ÿide, cha'ayi saÿateeta da ÿataqta huo'o da 'adalaxayic, qataq ishit da 'ai'agaqteeteec da 'an cam seÿaxanaique.

²² Nataq'en soqopitaxanapec da 'am shinapega da 'auqataxanai' qome ca i'ochaqa', cha'ayi aÿim seuattaique da huo'otaq qaÿasateguet que'eca qanqouagaxaunaxaqui. Nachi ñi Dios ishit da aÿim ÿanem da yaqto' qami' ñoqo'onalo.

Da pa'ateec nquinaxanaxac qataq da nqouagaxanaqtaic

²³ Qaq 'am ÿamaxa da lquinaxanaxac ñi Epafras, ñim ñicoñitaxaua souaxat da sasouaxalec so Cristo Jesús,

²⁴ qataq ñi Marcos, Aristarco, Demas qataq ñi Lucas mayi aÿim itauaata'pe de'eda i'onataxanaxac.

²⁵ Qaq so qadataxala' Jesucristo qami' ÿanema qome ca no'on qoyiquiaxaqui. Aja', nachi 'eetec de'eda.