Efesios 3 - Nuevo Testamento Toba Sur

So Pablo qaipataxalec da i'axatem da n'aqtac nam sa ishit da judiopi

¹ Qaq aÿim Pablo, 'eda da huo'o mshi aÿim ñoqouagaxaueetac. Qaq aÿim qaicoñittai' souaxat da sasoilec so Cristo Jesús, qalaxayi damayi naigui da yaqto' qauaÿamqaiñi qami' mayi sa ishit da qami' judío lashi'.

² Qaq ÿoqta da mashi sogote da qauaÿajñi da 'eetec ñi Dios da maichi ÿachigoxotchigui da lqouagaxanaqtaic da aÿim ipataxalec de'eda i'onataxanaxac, da yaqto' qami' qauaÿamqaiñi.

³ Cha'ayi ñi Dios ÿachaxan da lataxac da lapaxañi co'olloxochiyi mayi saq cha'a da aÿim ÿaÿajnaxanaxanec. Qaq damayi sogote da shiyiñi da cada'ac sa'axatapec.

⁴ Qaq da qautaxaÿaxañi, nachi qami' ishit da qauloÿa'a da aÿim ÿataqta sauattoota dam saq cha'a lataxac mayi chigoqo'ot so Cristo.

⁵ De'eda lataxac mayi saq cha'a sa ishit co'ollaxa da huo'o ca qaÿaÿajnaxanaxanec som hua'a'u vi'iyi. Qalaxayi nagui ñi Dios ÿachigoxotchigui so n'Espíritu da ÿaÿajnaxanaxanec nam iÿotaugapi mayi lamaxashicpi so Jesús qataq na l'aqtaxanaxanecpi.

⁶ Qaq de'eda lataxac saq cha'a 'eeta': Chigoqchigui qome da n'aqtac mayi chigaqaigui da nca'alaxa da na sa ishit da judiopi ÿaconguet cam ÿachaxanapec ñi Dios da 'eeta'am qanqoÿin na judiopi. Namayipi nataq'en nhuanau'a da l'oquiaxac so Cristo, qataq nataq'en Jesús.

⁷ Qaq aÿim ÿataqta sa ñauapeguela't. Qalaxayi aÿim qoÿanagui da yaqto' sa'axat de'eda n'aqtac, qaq damayi chigoqchigui da l'añaxac ñi Dios.

⁸ Cha'ayi aÿim ÿataqta qaica ca i'amaqchic, sa ishit da shin'am ca ÿapacteec qaica ca l'amaqchic na lalamaxatpi ñi Dios. Qalaxayi ñimayi aÿim ÿanagui de'eda ñi'achiquiaxac da yaqto' sa'axatem nam sa ishit da judío l'ecpi da no'on qad'axaÿaxac mayi i'axat dam sa ishit da qanaloqten lsallaxa so Cristo.

⁹ Qataq ñi Dios mayi l'onatac 'enauacna, ñimayi aÿim ipataxalec da yaqto' sa'axattem 'enauac na shiÿaxauapi da lataxac dam saq cha'a mayi lapaxañi co'olloxochiyi som hua'a'u vi'iyi.

¹⁰ Qaq qoÿiitec de'eda nagui, yaqto' ishit da chigoqchigui qanqoÿin na 'amqajnataxanaxaicpi da 'enauac nam 'añaxaicpi qataq nam damaxasoxonapecpi mayi hueto'ot na piguem ishit da ÿaÿaten 'enauac na ÿotta'a't laÿajneguesat ñi Dios.

¹¹ Qaq de'eda i'ot ñi Dios, damayi nateeteguet da nal'ena lhuennataxa co'olloxochiyi mayi ÿachigoxotchigui naq'en so qadataxala' Jesucristo da i'ot.

¹² Qaq ÿoqo'oyi so Cristo nachiso so chigoqchigui da huo'o mshi selagaqtapiguiñi da senoxonaxau'a ñi Dios, cha'ayi huo'o da qadpi'iÿaxac somayi.

¹³ Qaq ÿoqo'oyi aÿim qami' saqatalo da sa ishit da qanlaviitapiguiñi, souaxat da aÿim huo'o da ñique'ejnaxac souaxat da qoñiita, cha'ayi damayi naigui da yaqto' qami' ÿi'oxoda'q.

Da lauotaxanaqtaic so Cristo

¹⁴ Qaq 'eda da huo'o mshi aÿim sa'alyiñi naua illicte da ñatameetacot ñim lta'a so qadataxala' Jesucristo,

¹⁵ ñim chigoqo'ot na l'enaxat nam ÿotta'a't nhuo' l'ecpi mayi netalec ana 'alhua qataq nam lamaxashicpi mayi hueto'ot na piguem.

¹⁶ Qataq seÿaxaatacot ñi qadta'a Dios, da yaqto' ÿachigoxotchigui dam qaica ca 'en'am lsallaxa da qami' ÿanema da l'añaxac, da ÿachigoxotchigui so n'Espíritu da ÿanem da l'añaxac da qadvilÿaxaqui.

¹⁷ Qataq seÿaxaatacot ñi qadta'a, da yaqto' so Cristo ishit da netaiguilo naua qadquiyaqchilli' souaxat da huo'o da qadpi'iÿaxaqui somayi, qataq yaqto' qami' ÿataqta qanañaxachiitalec qataq qan'ayiitalec da nsoxoyic,

¹⁸ da yaqto' qami' qataq 'enauac na laÿipi 'amqajnataxanaxaicpi ishit da qauaÿajñiita yi lcachiguiñi qataq yi locta qataq da lalogaxa qataq yi lshicchiguiñi da lauotaxanaqtaic so Cristo.

¹⁹ Qataq seÿaxaatacot ñimayi, da yaqto' qami' ÿataqta qauauattoñiita de'eda nauotaxanaqtaic mayi ÿataqta napacalec 'enauac na qadauattonaxanaxacpi, yaqto' qami' ÿataqta qami' nlaqchiguilo da lataxac ñi Dios.

²⁰ Qaq ÿoqo'oyi nagui qaÿi'oxoden qome ñi Dios ñim 'añaxaic mayi ishit da ÿacteec naq'en da qomi' ÿanema cam seÿaxanaqaique, huo'otaq cam tatapigui yi qadhuel, da chigoqchigui naq'en da l'añaxac mayi do'onataxaatapoigui da qanachaalataxac.

²¹ Qaq ÿoqo'oyi 'enauac qome na 'amqajnataxanaxaicpi ÿi'oxoden ñi Dios souaxat da n'attau'a so Cristo. Qaq damayi nachi 'eetai' qome da qaica ca loga't. Aja', nachi 'eetec.