Colosenses 4 - Nuevo Testamento Toba Sur

¹ Qaq qami' 'aco'pi, ÿataqta qau'ochi qome ca ÿaÿamaqchiguiñi, qataq ÿataqta qaupagaqchiñiichigui da nshiitenaguec ca qadlataqui. Qami' qauennachiÿa'a da nataq'en huo'o ñi qan'aco'oi mayi neta'ague da piguem.

² Qami' ÿataqta qoquiitot qome da qanqouagaxaunaxaqui. Qanloiteec, qataq qai'añiitacot da qan'achiquiaxaqui ñi Dios.

³ Qataq nataq'en qomi' qanqouagaxauñiitalguete qome, yaqto' ñi qadataxala' Dios qomi' ÿanema ca qaddaqa' sa sa'axataq da n'aqtac qataq dam sa ishit co'ollaxa da qaÿaÿaten n'aqtaguec so Cristo, cha'ayi nachida da huo'o mshi aÿim qaicoñittai'.

⁴ Qaq qanqouagaxauñiitac qome, yaqto' aÿim ÿataqta ishit da sa'axattegue ca lataxac de'eda n'aqtac, cha'ayi damayi nachida da i'onataxanaxac.

⁵ Qataq ÿataqta qanaÿajnaxanaqchiñi da qautaqaitague' nam saxanaxa da da'amqajnataxan. Ÿataqta qauqopitaxañiÿapec naua no'on na'axa'te, da huo'o ca qaddaqa'ai.

⁶ Naua qadtaxaÿaxacolli' ÿataqta qaÿaÿamaxadeete' qome qataq ÿataqta qanqopitalo. Ñi 'oonolec da detaxaÿapegue' ca lÿa, qalaq ÿaÿaten da ÿaÿamaxatchiguiñi ca lataxac.

Da pa'ateec nquinaxanaxac

⁷ Qaq ñim qanauochaxaua qadqaÿa Tíquico mayi ÿataqta qadpe'et qataq qad'onataxanaxaua da so'onataxanqot so qadataxala', ñimayi qami' i'axatema qome ca qad'axaÿaxaqui da shiita.

⁸ Qaq ÿoqo'oyi qami' samaxalo ñimayi, da yaqto' qami' i'axatema da 'eetec da shinaqta, qataq da yaqto' qami' i'añaqchi't.

⁹ Qaq ñimayi nnaictague' qome ñi Onésimo ñim qanauochaxaua qadqaÿa qataq qadpe'et. Ñimayi maichi qami' chigoqtoiguilo co'ollaxa. Qaq ñiimayi qami' da'aqtaxanema qome 'enauac nam hueta'a ne'ena souaqta'a.

¹⁰ Qaq ñim Aristarco mayi ñicoñitaxaua, ñimayi qami' ÿamaxalo da lquinaxanaxac, qataq ñi Marcos ñim l'ac lqaÿa ca Bernabé. Qaq qami' mashi sogote da qauaÿajñi da ÿaqataxac da saqattapeguelec ñimayi. Qaq ÿoqo'oyi da ivita da qami' namaqtegalo, qalaq ÿataqta qauloÿiguet.

¹¹ Nataq'en qami' ÿamaxalo da lquinaxanaxac ñi Jesús, da l'enaxat lÿa Justo. Nam 'amqajnataxanaxaicpi judío l'ecpi, nachaqnauate' naamayi da aÿim itauaata'pe sa'axataqtac da ilo'ogue 'enauacna ñi Dios qataq da aÿim i'añaqchitta'pe.

¹² Nataq'en qami' ÿamaxalo da lquinaxanaxac ñi Epafras. Ñimayi nataq'en lamaxashic so Jesucristo, qaq ñimayi maichi qami' chigoqtoiguilo co'ollaxa. Qaq ñimayi nachi 'eetai' naxa da qami' nqouagaxaueetalguete, da yaqto' qaica ca da da qadhuennataxaqui, qataq da yaqto' ÿataqta qanañañiÿot da qau'ochi ca 'eetapeguec ñi Dios.

¹³ Cha'ayi aÿim ÿataqta sauaachigui da ñi Epafras ÿataqta qalota da lhuogoxo, souaxat da qoñiita, nataq'en nam netaña yi la ciudad Laodicea qataq yi Hierápolis.

¹⁴ Qataq ñim qanauochaxaua Lucas mayi natannaxanaq nataq'en qami' ÿamaxalo da lquinaxanaxac, qataq ñi Demas.

¹⁵ Qataq qai'añiim qome da iquinaxanaxac ca qadqaÿañicpi mayi netaña yi Laodicea. Qataq qai'añiim nataq'en da iquinaxanaxac aca Ninfa qataq na 'amqajnataxanaxaicpi mayi laponqa' yi lma'.

¹⁶ Qaq qom qami' ime da qautaxaÿaxañi ana'ana ÿide, nachi qauamaqaÿa qome na 'amqajnataxanaxaicpi mayi netaña yi Laodicea, da yaqto' nataq'en itaxaÿaxan. Qataq nataq'en qautaxaÿaxañi qome aca ÿide mayi chigaqa'a yimayi.

¹⁷ Nataq'en qoñiÿapega qome ca Arquipo, qoñiita': “Ÿataqta 'aupactelco' qome da 'ad'onataxanaxac mayi 'am ÿami' so qadataxala', da yaqto' 'au'onataxanot.”

¹⁸ Qaq aÿim Pablo maichi semapegue' da shiyiñi da iquinaxanaxac da qami' samaxalo. Qaq qauennachiÿa'a qome da aÿim qaicoñittai'. Qaq ñi Dios qami' ÿanema qome ca qanchoxonnataguiiqui. Aja', nachi 'eetec.