Colosenses 2 - Nuevo Testamento Toba Sur

¹ Qaq aÿim ñishitaique da qami' qauaÿajñiita da ÿataqta lta'adaic da ñiloquiaxac souaxat da qoñiita, qataq nam netaña yi la ciudad Laodicea, qataq 'enauac nam saxanaxa da aÿim ÿauatton.

² Qaq huo'o da ñiloquiaxac, cha'ayi ñishitaique da namayipi da'añi da lquiyaqteÿaxac, qataq ntaungui da nsoxoyic, qataq qaica ca iueetac dam aquitaxac mayi chigaqaigui da nauattonaxanaxac, da yaqto' ÿauattoota dam saq cha'a mayi ÿachaxan ñi Dios, mayi nachiso so Cristo.

³ Cha'ayi somayi nachiso so imatta't 'enauac na ÿotta'a't naÿajneguesat qataq na nauattonaxanaxacpi mayi chochaq huañi.

⁴ Qaq qami' sa'axatema de'eda, yaqto' sa ishit da huo'o ca qami' ÿatenachi't souaxat naua chochi n'onaxa't ltaxaÿaxaco mayi dashaxanataxa'n.

⁵ Cha'ayi aÿim, nai'ctaxa da sa ishit da yi'oqchigui da qami' salectaiguilo, qalaxayi da iqui'iÿaxac qami' ÿalecta'agueta. Qaq ÿataqta ñitootapeguec da no'on qadataxaqui, qataq da sa ishit da qai'axañiiuec da qadpi'iÿaxaqui so Cristo.

⁶ Qaq ÿoqo'oyi de'eda 'eetec co'ollaq qauacoñiiguet so qadataxala' Jesucristo, qaq nachida qome qoviita'a da qan'ayiitau'a somayi,

⁷ cam lpa'a'q da qanachaalataxaqui n'attalec somayi, qataq n'oxootalec somayi da qadpi'iÿaxaqui. Cha'ayi nachida da qami' qaÿapaxaguenque co'ollaxa, yaqto' nachi 'eetai' da qai'añiitacot da qan'achiquiaxaqui ñi Dios.

Da nachaalataxac dalaxaic ca n'attau'a so Cristo

⁸ Qaq maxatchaxa qome, sa ishit da qoquiigue nam nshitaique da qami' ÿatenachi't da qami' idolguete nam naÿajnec lma'na qataq nam nhuennataxacpi mayi saq 'en. Cha'ayi namayipi sa ishit da chigoqchigui so Cristo; chaqnata nam n'onataxacpi na shiÿaxauapi qataq nam lhuennataxacpi da tatapigui lauel na chochi yi'oqchigui.

⁹ Cha'ayi 'enauac da lataxac ñi Dios ÿataqta imattaigui da nachaalataxac so Cristo.

¹⁰ Qaq nagui ÿataqta qami' nlaqchiguilo da lataxac ñi Dios, cha'ayi qan'ayiitau'a so Cristo. Somayi nachiso so napacalec 'enauac da namaxasoxonapecpi qataq nam 'añaxaicpi mayi saq cha'a.

¹¹ Qaq nataq'en nagui qami', da qan'ayiitau'a so Cristo, nachi qaÿauo'o ca qan'anaxachi. Qalaxayi sa ishit da nachida da yi'oqchigui qai'an da n'oquiaxac; mayi nachida da qadca'alqai co'ollaq qami' qanca'alaxateeguesopa da n'onataxac da qadapachiyaxaqui. Qaq 'eda da n'anaxanaxac mayi chigoqo'ot so Cristo.

¹² Cha'ayi co'ollaq qami' qanachilaxa'n, nachi 'eeta'am da qadÿaichiguiñi' so Cristo co'ollaq qailayiñi. Qataq co'ollaq qanca'alaxateec, nachi qaltaq qadÿaitchiguem, cha'ayi qami' ÿataqta qau'amaqchiñi da l'añaxac ñi Dios mayi nca'alaxateeguesop da nleuaxa somayi.

¹³ Cha'ayi qami' co'ollaxa soua ÿoxoguelo vi'iyi, qalaq 'eeta'am da qami' leuaxaiqa, souaxat na qadasouaxashichi, qataq souaxat da sa ishit da qaÿauo'o ca qan'anaxachi. Qalaxayi nagui ñi Dios qami' ÿanema da qadca'alaxauai naq'en so Cristo, qaq nachi ÿapalaxat 'enauac na qadasouaxashichi.

¹⁴ Nachi ñi Dios ÿapalaxat aso qadavigaxaiste mayi saqalanaqtac qataq i'ottac da qanhuaxanaguec souaxat da sa salaxasoxoguet naua 'ena'pe naua qoÿittrañi nqataxaco. Huaña, nachi tachiguiña naq'en asomayi co'ollaq qaiuaxanguet so npe'enaxaqui.

¹⁵ Cha'ayi so Cristo co'ollaq ileu da qaiuaxanguet so npe'enaxaqui, huaña, nachi loxonec na nta'alpi qataq na 'añaxaicpi mayi saq cha'a. Huaña, qaÿauaachigui naq'en da ÿataqta qaica ca 'enec co'ollaq ÿauec da 'eeta'am naq'en da lcoñitaguishicpi co'ollaq dauegaxan.

Qanmichiÿaique qome ca hueta'ague da piguem

¹⁶ Qaq ÿoqo'oyi qami' sa ishit qome da qauqochiitega ca qami' quetapeguelguete souaxat cam yi'oqchigui qanallic, huo'otaq cam qanÿomgui, huo'otaq cam na'a'q mayi sa qaishitapec, huo'otaq da dalaxaic so ca'agoxoic, huo'otaq ca na'a'q mataxaqui.

¹⁷ Cha'ayi 'enauac ne'enapi chochi 'ico' lqui'i cam ñaq naÿa'cna, qalaxayi dam lataxac mayi ÿoqta 'eesa, nachiso so Cristo.

¹⁸ Qaq sa ishit qome da qauauaqaita'a da sa qami' talguete naq'en ca qanshiitenaxachi nam shiÿaxauapi mayi chochi huomoigui da 'ico' qaica ca n'amqajnaxac qataq natameetacot na namaxashic piguem l'ecpi. Cha'ayi namayipi taigui da i'ot cam sa ishit da ÿoqta ÿauaachigui, qataq chochi ÿashittagui da ñi'oxonnaxac, souaxat naua maichi lhuennataxaco da lapachiyaxac.

¹⁹ Cha'ayi namayipi sa ishit da n'attau'a so Cristo mayi nachiso so lqaic de'eda n'oquiaxac. Qaq somayi nachiso so nquictashiguem naq'en da i'añaqchit de'eda n'oquiaxac, qataq ÿataqta n'atta't naq'en nam ÿotta'a't logoxoshitpi da ipacchigui naq'en dam 'eetapeguec ñi Dios.

²⁰ Cha'ayi qami' sogote da qadleuaxauai so Cristo, qaq mashi qai'axañiiuec nam lhuennataxacpi na shiÿaxauapi da tatapigui lauel nam chochaqna. Qaq ¿tá'ainco' yi 'eeta'amo' da ña qoviitaigui da qau'ochiitac nam 'onataxacpi mayi huetalec ana 'alhua? Yi qanañañiiguet da qau'ochi ne'ena napaxaguenataxanaxacpi

²¹ mayi 'eeta': “Sa 'aupoteu'a de'eda, qataq sa ishit da 'avi'iguen yi'iyi, qataq sa ishit da huo'o ca 'alasaqa'a.”

²² Qaq 'enauac ne'ena qaÿapaxaguenataxaatapeguecpi, namayipi tai'a da imeuo. Qataq ne'ena napaxaguenataxanaxacpi maichi lamaxasoxonaxac qataq lapaxaguenataxanaxac nam chochi shiÿaxauapi.

²³ Qaq 'eesa da 'enauac ne'ena 'eeta'am da ÿataqta huo'o na ÿaÿaten ca shiÿaxaua da i'ot. Cha'ayi namayipi ÿamaxalec da natamnaxac, qataq da sa n'amaqten, qataq da ÿauo'o da nque'ejnaxac da l'oquiaxac. Qalaxayi namayipi sa ishit da itauan camayi da nala'aguet da lqopitaxanaqtaic da lapachiyaxac.