Apocalipsis 9 - Nuevo Testamento Toba Sur

¹ Qaq so lÿa namaxashic piguem l'ec, can ÿashiiyigui aso lashiide, nachi sela'a aso huaqajñi mayi chigoqo'ot co'ollaxa na piguem da talec ana 'alhua. Nachi asomayi qoÿami' aso lvinaqte ca lasom cam laponqa' na leuaxaicpi.

² Ime, nachi asomayi ÿauatoigui so lasom so laponqa' na leuaxaicpi. Huaña, nachi nnoxooshiguem so lmala'q, 'eeta'am na lmala'q ana qatelaxanaxaqui. Nachi se'eso lmala'q i'ot so napalaxa, cha'ayi ÿapolec aso nala' qataq na piguem.

³ Nachi se'eso lmala'q chigoqtoigui aso shiiquioxoi, nachi huaÿolec ana 'alhua. Nachi asa'aso shiiquioxoi qoÿanem da lshinataxanaxa mayi 'eeta'am da l'añaxac na pelaqtoit mayi huetalec ana 'alhua.

⁴ Nachi qaÿamaxalec asomayi da sa ishit da huo'o ca 'en'ac na 'auaqpi mayi huetalec ana 'alhua qataq ana qo'ipaq, huo'otaq camachicague't dadala, chaqnata nam shiÿaxauapi mayi sa ishit da huetalec na latap aca l'anaxanaqte ñi Dios.

⁵ Qalaxayi sa ishit da qaÿashinem da ÿoqta ÿalauat, chaqdata da chochi ÿauo'o da nqui'ic, ividaxatreec naq'en caua cinco ca'agoxoiqa. Qaq de'eda nqui'ic 'eeta'am naq'en da nqui'ic ca shiÿaxaua da huo'otaq inac na pelaqtoit.

⁶ Nachi que'eca na'a'q na shiÿaxauapi nmittaique qome da l-leuaxa, qalaxayi sa ishit da ÿanata. Qaq nai'ctaxa da nshitaique da ileu, qalaxayi da nleuaxa ca'ai qome namayipi.

⁷ Qaq asa'aso shiiquioxoi 'eeta'am da lataxac na caaÿo da qaÿaqataxaatai' da nalaat. Qaq na lqaic netagui ana 'eeta'am ana nta'a nado'o. Qaq na lashic, qalaq 'eeta'am na lashic na shiÿaxaua.

⁸ Qaq na laue, qalaq 'eeta'am na laue ana 'alo. Qaq naua lhue, qalaq 'eeta'am ana lhue na león.

⁹ Qaq na l'oc, qalaq npaxattalec na alaataxaqui lcat. Qaq da l-lamaxa naua laua, qalaq 'eeta'am da l-lamaxa na ÿataqta qalota lauegaxala' ana naigonapi mayi taÿa'a ca alaataxac.

¹⁰ Qaq na l'adaxashit, qalaq 'eeta'am na l'adaxashit na pelaqtoit, huo'o ana l'adaxanaqte. Qaq ne'ena l'adaxashit huo'o na lshinataxanaxa, da yaqto' huo'o ca 'en'ac na shiÿaxauapi, ividaxattreec caua cinco ca'agoxoiqa.

¹¹ Qaq asa'aso shiiquioxoi nachi lataxala' som ilotague' cam laponqa' na leuaxaicpi. Qaq se'eso nataxala', somayi l'enaxat Abadón nam l'aqtac na hebreo l'ecpi. Qaq nam griego l'ecpi, qalaq ÿamata'ac Apolión. Damayi naigui da laataxanaxaic.

¹² Qaq inoxoneec som hua'auchiguiñi nqui'ic, qalaxayi ñaq natai'salo caua lÿa't dos.

¹³ Qataq so lÿa namaxashic piguem l'ec ÿashiiyigui aso lashiide. Nachi sa'axaÿa so n'aqtac chimaqchiguingui na laiñi soua cuatro lcoue aso nca'atoxonaxalate oro mayi netaña ca naloteuga ñi Dios.

¹⁴ Nachi se'eso n'aqtac 'enapega se'eso namaxashic mayi ÿashittapigui aso nashiide, 'eeta': –'Ausodeec qome ñiua cuatro namaxa'shi piguem lashi' mayi qaicoñittai'salo, ñim netraña yi loigue aso tala l'enaxat Éufrates.

¹⁵ Huaña, nachi qaisodeec se'esoua cuatro namaxa'shi, da yaqto' ÿalauat ñi 'oonolec naua tres nam shiÿaxauapi. Cha'ayi soomayi nachi qaÿaqataxaatai'salo, da yaqto' da ivita que'eca naloqnec na'a'q mayi huetoigui ca ca'agoxoic qataq vi'i, qaq lhuottai'salo.

¹⁶ Qaq sa'axaÿa so lcata so nallippi soomayi mayi netalec na caipi, qaq ivi' na doscientos millones.

¹⁷ Qaq 'eda da 'eetec da ÿauanaqchic can sela'a som caipi qataq som netalecpi. Qaq se'eso netalecpi lapaqtalguete naua ltogue naua alaataxaqui' mayi togaxadaic, malaxadaic, ÿoqovi da l'oguiaxac. Qaq se'eso caipi naua lqaigo 'eeta'ama na lqaic na león. Qaq naua ala'pi natapoiguilo na nodec, qataq na lmala'q, qataq na 'ico' quiquiaxadaic.

¹⁸ Huaña, nachi ileu ñi 'oonolec naua tres nam shiÿaxauapi souaxat se'eso nodec, lmala'q, qataq na 'ico' quiquiaxadaic mayi chigoqtapoigui na alap so caipi.

¹⁹ Cha'ayi de'eda l'añaxac se'eso caipi huetaigui na alap qataq na l'adaxashit. Cha'ayi na l'adaxashitpi 'eeta'am na n'adaxanaq. Huo'o na lqaicpi, da yaqto' ishit da denagaxan.

²⁰ Qalaxayi nam n'onañi shiÿaxauapi mayi sa ishit da ileema se'esoua napaxaco ñaqaiyita sa ishit da ÿaxaayiñi naua qauema mayi i'otta'pe. Qataq sa ishit da ÿaxaañi da natameetacot nam saq cha'api qauemaicpi, qataq nam nqolacpi mayi chigaqaigui qanqoÿin na oro, plata, bronce, coma', qataq na qo'ipaq mayi sa ishit da demejnaxan, qataq sa ishit da hua'aqa, qataq sa ishit da queuoÿapigui'.

²¹ Nataq'en sa ishit da ÿaxaañi da dalaataxan, qataq da l'enaxanaxac, qataq da nquishishaxac, qataq da lcachaxac.