Apocalipsis 8 - Nuevo Testamento Toba Sur

Aso n'anaxanaqte pa'ateec qataq so nchinaxanaxat lmala' mayi chigaqaigui na oro

¹ Qaq se'eso qagueta llalec can qaltaq nqat aso lÿa n'anaxanaqte mayi ÿapotagui aso nede, nachi cada'ac da ntochiguiñi, ivi' media hora.

² Ime, nachi sela'a so siete namaxashic piguem l'ecpi nachattañi, datatau'a yi nso'onqa' ñi Dios. Nachi somayipi qoÿami' aso siete nashiidepi.

³ Ime, qataq anac so lÿa namaxashic piguem l'ec, lasoqta'a so lmala' na nchinaxanaxat mayi chigaqaigui na oro. Nachi nachatteu'a aso nca'atoxonaxalate. Nachi qoÿanem so ÿataqta qalota na nchinaxanaxat, da yaqto' ÿaneuo, lÿateuo naq'en da nqouagaxaunaxac 'enauac na lalamaxatpi ñi Dios, da ÿachalec aso nca'atoxonaxalate chigaqaigui na oro mayi netaña yi naloteuga so so'onqa'.

⁴ Nachi na lmala'q se'eso nchinaxanaxat chigoqtelec na lhuaq so namaxashic da taÿot ñi Dios, qaq lÿatchiguem da nqouagaxaunaxac nam lalamaxatpi ñi Dios.

⁵ Nachi se'eso namaxashic ÿacona so lmala' na nchinaxanaxat, nachi ÿimaxaigui ana lpoqo so nodec mayi huetalec aso nca'atoxonaxalate. Ime, qaq icodelec ana 'alhua. Nachi huo'o so nalataxa, nlamaxa, nqashilgaxa, qataq so nacholaxanaxa.

Aso nashiidepi

⁶ Nachi som siete namaxashic piguem l'ecpi mayi lasoqta'a aso nashiidepi nachi naÿamaxajñi da yaqto' dashiidaxan.

⁷ Nachi som hua'auchiguiñi namaxashic can dashiidaxan, nachi anac aso lachi qataq so nodec ÿalecteguet na ntago'q mayi qaicodelec 'enauac ana 'alhua. Nachi ÿavic añi 'oonole naua tres qo'ipa, nataq'en ana 'alhua, qataq na 'auaqpi dadala.

⁸ Qaq so lÿa namaxashic can ÿashiiyigui aso lashiide, nachi qaÿamaxangui aso auaxai aso 'ico' qasoxonaxa 'ettaigui. Nachi añi 'oonole ñiua tres ana auaxai nachi nañigui na ntago'q,

⁹ qataq ileu ñi 'oonolec naua tres 'enauac nam huetangui ana auaxai, qataq dolagui añi 'oonole naua tres barco.

¹⁰ Qataq so lÿa namaxashic can ÿashiiyigui aso lashiide, nachi najñi aso late'edai huaqajñi. Asomayi 'ettaigui, 'eeta'am ana ncoÿadaxanaxaqui. Qaq asomayi tachiguingui añi 'oonole naua tres tala, qataq anam npaxaatashiguempi na l'ec.

¹¹ Qaq asa'aso huaqajñi l'enaxat Chimaxadai. Nachi añi 'oonole naua tres tala nachi ÿataqta chim. Nachi ÿataqta qalota na ileu na shiÿaxauapi, cha'ayi na 'etaxat ÿataqta chim.

¹² Qaq so lÿa namaxashic can ÿashiiyigui aso lashiide, nachi 'om na laÿi aso nala' qataq so ca'agoxoic. Qataq 'om añi 'oonole naua tres huaqajñi, nachi huo'o na huaña da napanñi. Qataq cada'ac da sa ishit da yi'oxolec yi na'a'q qataq yi pe.

¹³ Qaq can ime, nachi qaltaq ñamatashiguem, nachi sa'axaÿa so namaxashic piguem l'ec huaÿotac, hueto'ot na piguem ÿataqta nlamaxaden da detaqtac. 'Eeta': –¡Aicoue! ¡Ÿataqta choxodaxaso' na netalec ana 'alhua, qom ivita da ÿashiiyigui aca nashiide caua lÿa't tres namaxa'shi piguem lashi'!