Apocalipsis 7 - Nuevo Testamento Toba Sur

So n'anguishicpi nam llalaqpi so Israel

¹ Qaq can ime de'eda, nachi sela'alo soua cuatro namaxa'shi piguem lashi', nachattrañi, hueta'alo naua cuatro llico na l'at. Soomayi nllitrañi naua l'a'chi, da yaqto' sa ishit da ÿashiidelec ana 'alhua, qataq ana auaxai, qataq ana qo'ipaq.

² Nataq'en sela'a so 'oonolec namaxashic piguem l'ec chigaqa'ague da nala' lliguishiguem, qaq lasoqta'a aso l'anaxanaqte ñi Dios mayi nca'altauec. Nachi se'eso namaxashic ÿataqta nlamaxaden da 'enapegalo soua lÿa't cuatro namaxa'shi mayi qoÿanema da n'añaxac da yaqto' huo'o ca 'en'ac ana 'alhua qataq aso auaxai. 'Eeta' da l'aqtac somayi:

³ –Sa ishit qome da huo'o ca qoñiÿa'ac ana 'alhua qataq aso auaxai qataq ana qo'ipaq, to' qom mashi ime da sa'anaq na latap 'enauac na l-latacpi ñi qadta'a Dios.

⁴ Ime, qaq aÿim sa'axaÿa so lcata yi ivi' na n'anguishicpi. 'Eeta': ciento cuarenta y cuatro mil da ima'a't na n'anguishic na llalaqpi so Israel.

⁵ Qaq ivi' na doce mil na n'anguishic na llalaqpi so Judá, qataq doce mil so n'anguishic na llalaqpi so Rubén, qataq doce mil so n'anguishic na llalaqpi so Gad,

⁶ qataq ivi' na doce mil so n'anguishic na llalaqpi so Aser, qataq doce mil so n'anguishic na llalaqpi so Neftalí, qataq doce mil so n'anguishic na llalaqpi so Manasés,

⁷ qataq ivi' na doce mil so n'anguishic na llalaqpi so Simeón, qataq doce mil so n'anguishic na llalaqpi so Leví, qataq doce mil so n'anguishic na llalaqpi so Isacar,

⁸ qataq ivi' na doce mil so n'anguishic na llalaqpi so Zabulón, qataq doce mil so n'anguishic na llalaqpi so José, qataq doce mil so n'anguishic na llalaqpi so Benjamín.

So qalota shiÿaxauapi mayi lapagaxaiqa naua alogo

⁹ Qaq can ime de'eda, nachi sela'a so ÿotta'a't shiÿaxauapi mayi ÿotta'a't na l'aqtacpi. Somayipi nachattañi, datatau'a so so'onqa' qataq som qagueta llalec. Qaq somayipi ÿataqta qalota, qaica ca ishit da naloqten. Qaq somayipi lapagaxaiqa naua alogo, qataq lasoqta'a ana chaic laue.

¹⁰ Qaq 'enauac somayipi i'alaqtagui, 'eeta': Da qadca'alaxa chigoqo'ot ñi qadta'a Dios, mayi nso'ootangui añi so'onaxaqui, qataq ñim qagueta llalec.

¹¹ Qaq 'enauac nam namaxashic piguem l'ecpi nachattañi, qaicoleesop aso so'onaxaqui, qataq som nquedoxonecpi, qataq soua cuatro shiguiÿac. Nachi somayipi i'alyiñi naua l-llicte, ÿataqta ividaxata'agueta naua lata'pi naq'en ana 'alhua. Nachi qaÿi'oxoden ñi Dios,

¹² qoÿiita': ¡Aja', nachi 'eetec! Da ñi'oxonnataxanaxac, ñi'oxoyic, qataq da naÿajnec, tonaxac, qataq n'amaqchic, namaxasoxonaxac, qataq da n'añaxac, damayi qoÿanot ñi qadta'a Dios, qaq damayi qaica qome ca loga't qanqoÿin. Aja', nachi 'eetec.

¹³ Nachi so 'oonolec so nquedoxonecpi aÿim inat, 'eeta': –¿Négue't ne'ena shiÿaxauapi mayi lapagaxaiqa naua alogo? ¿Chaq huá'ague ca chigaqa'ague?

¹⁴ Nachi aÿim shiita': –Aque', 'am ÿataxala', 'am mayi 'auaÿaten. Nachi somayi 'eeta': –Qomyi ne'ena, nachina na chigoqtoigui da lta'adaic que'ejnaxac. Nachina na iÿoi' naua alogo qataq ÿataqta qui'itta, souaxat da deÿoxonalo naua ltago'q ñi qagueta llalec.

¹⁵ Qaq ÿoqo'oyi namayipi datatau'a na nso'onqa' ñi Dios, qaq do'onataxaatacot ñimayi na na'axa'te qataq na pesa'chi añi l'onaxanaxaqui. Qaq ñim nso'ootangui añi so'onaxaqui, ñimayi ipelteetalec namayipi.

¹⁶ Huaña, nachi sa ishit da nque'etaxangui na lqouaxa qataq na laquip. Qataq sa ishit da ÿavigaxat añi nala', qataq da nque'etaxangui na napaxaÿaxa.

¹⁷ Cha'ayi ñi qagueta llalec mayi netangui na laiñi yi so'onqa', ñimayi ilo'ogue qome namayipi, 'eeta'am naq'en ana qagueta, qataq ÿauega cam chochi npaxaatashiguem na 'etaxat mayi chigaqaigui da nca'alaxa. Huaña, nachi ñi Dios iÿouec 'enauac na lachi' namayipi.