Apocalipsis 6 - Nuevo Testamento Toba Sur

Aso siete n'anaxanaqtepi

¹ Qaq sauaachigui se'eso qagueta llalec can nqat aso 'oonole asa'aso n'anaxanaqtepi, nachi sa'axaÿa so 'oonolec se'esoua cuatro shiguiÿac da lavilÿaxac 'eeta'am na nalataxa, 'eeta': –¡'Ayala, ña 'ameten!

² Nachi samata'a, qaq sela'a so caaÿo lapagaxaic. Qaq so netalec huo'o so lchicnec lasoqta'a. Nachi somayi qoÿami' aso nado'o na nta'a. Nachi jec, da yaqto' dauegaxan, qataq da yaqto' nachi 'eetai' da dauegaxaatai'.

³ Nachi se'eso qagueta llalec, can qaltaq nqat aso lÿa n'anaxanaqte, nachi sa'axaÿa so lÿa shiguiÿac, 'eeta': –¡'Ayala, ña 'ameten!

⁴ Nachi nnoxoneec so lÿa caaÿo togaxadaic. Qaq som netalec somayi qoÿanem da l'añaxac, da yaqto' deuotaxanec da nlagaxa ana 'alhua, qataq da yaqto' i'otec da ñi 'oonolec shiÿaxaua ÿalauat ca lÿa. Nachi somayi qoÿanem so lta'adaic lailonec.

⁵ Qaq se'eso qagueta llalec can qaltaq nqat aso lÿa n'anaxanaqte, nachi qaltaq sa'axaÿa so lÿa shiguiÿac, 'eeta': –¡'Ayala, ña 'ameten! Qaq samata'a, nachi sela'a so lÿa caaÿo laidaxaic. Qaq so netalec somayi lasoqta'a aso naloqnaxanaxaqui.

⁶ Nachi sa'axaÿa so n'aqtac chimaxangui na laiñi soua shiguiÿac, 'eeta': –Ca un kilo na trigo naÿa'aguet qome aca lashiue ca shiÿaxaua da do'onataxan yi 'oonolec na'a'q, qataq tres kilo na cebada. Qalaxayi sa ishit qome da huo'o ca qon'ac na aceite qataq na lataxa.

⁷ Qaq so qagueta llalec can qaltaq nqat aso lÿa n'anaxanaqte, nachi qaltaq sa'axaÿa so lÿa shiguiÿac, 'eeta': –¡'Ayala, ña 'ameten!

⁸ Qaq samata'a, nachi sela'a so lÿa caaÿo qoñoxoic. Qaq som netalec l'enaxat nleuaxa. Qaq so nca'attauo, somayi nachiso so lqui'i cam laponqa' na leuaxaicpi. Nachi se'eso nleuaxa qoÿami' da l'añaxac, da yaqto' ÿalauat ñi 'oonolec na cuatro shiÿaxauapi na huetalec ana 'alhua, da idolec ca alaataxac, qataq ca nqouaxa, qataq na nalolaxa, qataq nam shiguiÿacpi dequi'iÿapec mayi huetalec ana 'alhua.

⁹ Qaq se'eso qagueta llalec can qaltaq nqat aso lÿa n'anaxanaqte, nachi sela'a na lqui'ipi nam qaÿalauat co'ollaxa, souaxat da ipacchigui da i'axattac da l'aqtac ñi Dios. Qaq namayipi hueto'ot na pa'aguiñi aso nca'atoxonaxalate.

¹⁰ Nachi somayipi ÿataqta nlamaxaden, 'eeta': –'Am qadataxala' Dios mayi ÿataqta 'am qui'itta qataq 'aupactelec cam 'auachaxanapec, ¿chaq laguio', qaq ivita ca laloqo' da 'anmit qataq 'auauo'o ca nhuaxanaguec nam i'ot da qanalaataguec mayi huetalec ana 'alhua?

¹¹ Nachi qoÿanema naua alogo lapagaxaiqa somayipi. Nachi qoÿiitega da ñaq cada'ac da deuataxanapec, to' qom ivita da ÿataqta nalota't na lqaÿañicpi mayi l'onataxanaxauapi mayi ña do'onataxaatacot so Cristo, da nachi 'eeta'am qome namayipi da qaÿalauat.

¹² Qaq se'eso qagueta llalec can qaltaq nqat aso lÿa n'anaxanaqte, qaq samata'a, nachi huo'o so lta'adaic nacholaxanaxa. Qaq aso nala' nachi 'om, qaq ÿataqta napanñi. Qaq so ca'agoxoic qalaq ÿataqta 'eeta'am na ntago'q na ltogaxa.

¹³ Qaq ana huaqajñipi qalaq najñi, talec ana 'alhua, 'eeta'am ana higo da huo'otaq nmetapiguiñi ana ala mayi ña dadala, souaxat da ÿacholaxan na l'at lta'adaic.

¹⁴ Qaq na piguem qalaq nlagaxatapec, 'eeta'am da qainana't. Qaq anam qasoxonaxapi qataq anam delecpi qalaq 'enauac ca'aisalo naua lma'te qanqoÿin.

¹⁵ Qaq nam nta'alpi mayi ilotague' nam netalec ana 'alhua, qalaq 'enauac nqañoxotoiguilo naua auaco, nataq'en nqañoxototo naua coma'yi mayi netaiguilo ana qasoxonaxapi. Nataq'en nqañoxojñi 'enauac na 'amaqtaqaicpi, sallaxanecpi, qataq na huataxanaq lta'alpi, qataq na 'añaxaicpi, qataq 'enauac nam nlatacpi qataq nam sa nlatacpi.

¹⁶ Qaq namayipi detaqtacot ana qasoxonaxapi qataq na coma'pi, 'eeta': –Ña qomi' 'aupataxayiñi qome, qataq qomi' 'ai'oxochiisopa qome da lmejnaxanaxac ñim nso'ootangui añi so'onaxaqui, qataq dam lta'adaic nhuaxanaguecna naq'en ñim qagueta llalec.

¹⁷ Cha'ayi mashi ivita yi laloqo' dam ÿataqta lta'adaic nhuaxanaguecna. Qaq, ¿négue't ca ishit da nachaata'aguet?