Apocalipsis 5 - Nuevo Testamento Toba Sur

Asom nede qataq som 'ico' qagueta llalec

¹ Ime, qaq aÿim sela'a aso nede hueta'ague na lhuaq aloic so nso'ootangui aso so'onaxaqui. Asomayi 'eeta'am ana naqta, qoÿittalec na pa'auo qataq na pa'auec. Qaq asomayi qaitoqootalguete soua siete n'anaxanaqte da qaÿapotagui.

² Qaq sela'a so namaxashic piguem l'ec, ÿataqta qaica ca 'en'am da l'añaxac. Qaq ÿataqta nlamaxaden da denataxaatac, 'eeta': –¿Negue'tom ca ishit da ÿauachigui ada nede qataq da nqa't soua n'anaxanaqte?

³ Cha'ayi sa ishit da huo'o ca 'oonolec nam hueto'ot na piguem da huo'otaq ishit da ÿauachigui da imeten, qataq nam huetalec ana 'alhua, qataq nam huetaigui anamayi.

⁴ Qaq aÿim ÿataqta ñiÿiitac, souaxat da qaica ca ishit da ÿañoxot da ÿauachigui da itaxaÿaxan, huo'otaq da chochi imeten asa'aso nede.

⁵ Nachi so 'oonolec so nquedoxonecpi aÿim 'enapega, 'eeta': –Sa ishit qome da 'anoÿiitac. Cha'ayi ñi qoÿiitega León mayi chigoxoigui na llalaqpi so Judá, nataq'en chigoxoguet so nta'a David, ñimayi dauegaxan. Qaq ñimayi ishit da ÿauachigui ada'ada nede qataq da nqa't soua siete qaiuaxaatalguete n'anaxanaqte.

⁶ Nachi sela'a so huetangui na laiñi som so'onqa', huetanguilo soua cuatro shiguiÿac qataq so nquedoxonecpi. Somayi 'eeta'am na qagueta llalec. Qaq somayi nachattañi, qaq yi'oqta da 'eetec co'ollaq qaÿalauat. Qaq somayi siete ana lcouepi qataq siete naua l'ai'te. Qaq ne'enaua l'ai'te nachinaua naua siete saq cha'alo mayi namaxalo 'enauac ana 'alhua ñi Dios.

⁷ Qaq se'eso qagueta llalec ÿacona asa'aso nede mayi huetaigui na lhuaq som nso'ootangui aso so'onaxaqui.

⁸ Nachi somayi co'ollaq mashi ÿacona aso nede, nachi soua cuatro shiguiÿac qataq som veinticuatro nquedoxonecpi i'adoto naua l-llicte so qagueta llalec. Qaq ñi 'oonolec se'eso nquedoxonecpi huo'o ana lvique, qataq lasoqta'a ana ÿomaxaquipi mayi chigaqaigui na oro. Qaq anamayipi huetagui na nchinaxanaxat. Qaq ne'ena nchinaxanaxat nachina na nqouagaxaunaxac na lalamaxatpi ñi Dios.

⁹ Qaq somayipi i'ootac da dalaxaic n'onec, 'eeta': 'Am ÿataqta 'itchiguiñi da 'auacona ana nede qataq da 'anqa't naua qaiuaxaatalguete n'anaxanaqte; cha'ayi 'am qaÿalauat co'ollaxa, qaq soua 'adtago'q nachi lashiue da qomi' 'aushijnaxanalo, qomi' 'auachigoxottoiguilo na ÿotta'a't shiÿaxauapi mayi ÿotta'a't naua l'aqtaqa, da yaqto' 'enauac qomi' lalamqa'te ñi Dios.

¹⁰ Qataq qomi' 'ai'anaguilo da qomi' nta'al qataq da qomi' ltaxaÿaxanaxanqa na shiÿaxauapi da so'onataxanqot ñi qadta'a Dios. Qanachi seloxogue 'enauac na huetalec ana 'alhua.

¹¹ Ime, qaq aÿim ñamatashiguem, nachi sa'axaÿa da lavilÿaxac so ÿataqta qalota namaxashic piguem l'ecpi coleesop aso so'onaxaqui qataq soua shiguiÿac qataq soua nquedoxonqa. Qaq ÿataqta qaica ca ishit da naloqten somayipi.

¹² Qaq ÿataqta nlamaxaden da lavilÿaxac, 'eeta': Ñim qagueta llalec mayi qaÿalauat co'ollaxa da qaÿauo'o nachitaqtaxanaqte, ñimayi ÿataqta 'itchiguiñi da qoÿanem da damaxasoxonapec qataq da nsallaxa, naÿajnec, qataq da n'añaxac, n'amaqchic, ñi'oxoyic, qataq ñi'oxonnataguec.

¹³ Qataq sa'axaÿa nataq'en 'enauac nam l'onatacpi ñi Dios mayi hueto'ot na piguem qataq na huetalec ana 'alhua qataq nam huetaigui anamayi, qataq nam huetangui aso auaxai. Qaq 'enauac namayipi 'eeta': Da ñi'oxonnataxanaxac, qataq da n'amaqchic, ñi'oxoyic, qataq da n'añaxac, qoÿanot qome ñim nso'ootangui añi so'onaxaqui, qataq ñim qagueta llalec. Qaq damayi chochaq tateec qome.

¹⁴ Qaq soua cuatro shiguiÿac 'eeta': –¡Aja', nachi 'eetec! Qaq som veinticuatro nquedoxonecpi nachi i'alyiñi naua l-llicte, nachi ÿi'oxoden ñim qaica ca loga't da nachaalataxac.