Apocalipsis 4 - Nuevo Testamento Toba Sur

Da ñi'oxonnataxanaxac mayi hua'ague da piguem

¹ Qaq aÿim Juan can ime de'eda, nachi ñamatashiguem, nachi sela'a so lasom na piguem nauattaigui. Qaq se'eso nvilÿaxac mayi 'eeta'am ana nashiide som hua'auchiguiñi da aÿim ntaqtega nachi aÿim 'enapega, 'eeta': –Ña 'annotshiguema ne'ena, yaqto' 'am sachaxana nam huotaique da nachaxan qom mashi ime de'eda.

² Huaña, nachi aÿim souaigui da l'añaxac so Espíritu Santo, nachi sela'a aso nta'a nso'onaxaqui neto'ot na piguem. Qaq asa'aso so'onaxaqui huo'o so nso'ootangui.

³ Qaq se'eso nso'ootangui asa'aso so'onaxaqui ÿataqta 'eeta'am da l'oguiaxac na coma' l'enaxat jaspe, huo'otaq na cornalina, da ÿataqta qashilec. Qaq naua laÿil aso so'onaxaqui coleesop so 'ico' qomoxonalo. Na lqashilgaxa qalaq 'eeta'am na coma' esmeralda.

⁴ Qataq naua laÿil asa'aso so'onaxaqui, qalaq sela'a aso veinticuatro nso'onaxaqui so nquedoxonecpi. Somayipi ÿataqta lapagaxaiqa naua alogo, qataq naua nado'ol ndoteec ana chigaqaigui na oro.

⁵ Qaq asa'aso so'onaxaqui chigoqtapegueu'a na nqashilgaxa, nlamaxa, qataq na nalataxa. Qataq soua siete ncoÿadaxanaxaqui', na l'edaxa 'eeta'am na nodec. Qaq soomayi nachisoua soua siete saq cha'alo mayi chigoqo'oto ñi Dios.

⁶ Qaq yi'iyi naloteuga asa'aso so'onaxaqui nataq'en huo'o aso 'eeta'am ana lapel ÿataqta chañi na l'ec qataq chauec. Qaq ne'enaua laÿil aso so'onaxaqui, nachi hueta'alo soua cuatro shiguiÿac mayi nca'altrauec. Qaq soomayi ÿataqta nlaqchiguilo na l'oc ana l'aitepi.

⁷ Qaq so l'auaxanec se'esoua shiguiÿac, somayi 'eeta'am na león. Qaq so lÿa qalaq 'eeta'am na huaca. Qaq so lÿa qalaq 'eeta'am na shiÿaxaua na lashic. Qaq so lÿa qalaq 'eeta'am na vi'ic da huaÿotac.

⁸ Qaq se'esoua cuatro shiguiÿac, ñi 'oonolec ivi' seis ana lauapi. Qaq na npa'auec ana laua qalaq da'aichiguilo ana l'aitepi, qataq na pa'auo. Qaq soomayi nachi quetro'ot yi na'a'q qataq yi pe da 'eetra': 'Am mayi ÿataqta 'am qui'itta, 'am qadataxala' Dios mayi qaica ca 'auqalanapec, 'am mayi nachi 'eetai' da 'am huo'o, qataq nachi'am mayi 'au'onataxaatac nagui, qataq 'auanaÿa'cna.

⁹ Qaq naxa da se'esoua shiguiÿac da ÿi'oxode'n, ÿi'oxodeetrac, qataq ÿanoto da ntonaxa'c som nso'ootangui aso so'onaxaqui mayi chochaq tateec da nachaalataxac,

¹⁰ nachi se'eso veinticuatro nquedoxonecpi i'alyiñi naua l-llicte da ÿi'oxoden som chochaq tateec da nachaalataxac. Nachi nqa't naua nado'ol da ÿacho'oto aso nso'onaxaqui. Ime, qaq 'eeta':

¹¹ 'Am qadataxala' Dios, 'itchiguiñi da 'am qoÿanot da 'ayi'oxoyic, 'ad'amaqchic, qataq da 'ad'añaxac; cha'ayi 'am 'ad'onatac 'enauacna, maichi 'am chigoqchigui, qaq ÿoqo'oyi yi'oq 'enauac namayipi.