Apocalipsis 3 - Nuevo Testamento Toba Sur

Da n'aqtac mayi qaÿamaxa so netaña yi Sardes

¹ Nataq'en 'auamaxa qome aca 'ede ñi namaxashic piguem l'ec mayi ilotague' na 'amqajnataxanaxaicpi mayi netaña yi Sardes. Qoneta': “'Eeta' da l'aqtac nam lasoqta'a so siete saq cha'api mayi chigoqo'ot ñi Dios qataq soua siete huaqajñi: Aÿim saÿaten 'enauac nam 'au'ottacpi, qataq saÿaten da 'am leuaxaic, nai'ctaxa da huo'o da 'an'aqtaguec da 'am 'anca'altauec.

² Qaq 'anlouec qome, nachi 'au'añaqchit dam ñaq huo'o 'ad'onataxanaxac mayi mashi huotaique da imeuo. Cha'ayi aÿim sela'a da sa ishit da nalochiguiñi da 'ad'onataxanaxac da imeteetac ñi ita'a Dios.

³ Qaq 'auennate qome da napaxaguenataxanaxac mayi 'auaconguet co'ollaxa. Qaq nachida qoquegue, qataq qoca'aisalo naua 'an'onataxaco. Qaq da sa ishit da 'auatom, nachi 'am ñoqo'ona qome, qalaxayi se'enaxatteguem ca cachaxaic mayi sa ishit da qaÿaÿaten ca laloqo' da nvi'.

⁴ Qalaxayi huo'o na shiÿaxauapi na netaña na Sardes na sa ishit da ishipaxanaqchi't na alogo. Qaq namayipi aÿim hueta'aguet qome, ÿaatrañi caua lapagaxaiqa alogo, cha'ayi nachi lataxac.

⁵ Qaq cam dauegaxan qome, nachi qoÿanaxanaxaanguilo caua anogo lapagaxaiqa. Nachi sa ishit da sapalaxat ca l'enaxat da qoÿittau'a aca nanedaxalate na nca'aleec. Qataq sa'axateu'a ñi ita'a qataq na lamaxashic piguem l'ecpi.

⁶ Qaq cam ÿaÿaten da n'axaÿaxanaxac, qaq no'on da n'axaÿaxana da l'aqtac so Espíritu Santo da 'enapega na 'amqajnataxanaxaicpi.”

Da n'aqtac mayi qaÿamaxa na netaña yi Filadelfia

⁷ Nataq'en 'auamaxa aca 'ede ñi namaxashic piguem l'ec mayi ilotague' na 'amqajnataxanaxaicpi mayi netaña yi Filadelfia. Qoneta': “'Eeta' da l'aqtac nam ÿataqta qui'itta qataq 'eesa, nam hueto'ot ana lvinaqte ca lma' so nta'a David, nam da ÿauatoigui ca lasom qalaq sa ishit da huo'o ca ishit da ÿapogui, qataq da ÿapogui ca lasom qalaq sa ishit da huo'o ca ishit da ÿauatoigui:

⁸ Aÿim saÿaten 'enauac nam 'au'ottacpi. Qaq aÿim 'am sanem ñi 'ico' lasom ÿauattaigui mayi sa ishit da huo'o ca ÿapogui. Cha'ayi nai'ctaxa da saqalligueme da 'ad'añaxac, qalaxayi ÿataqta 'aualaxalec da i'aqtac, qataq sa ishit da aÿim 'ancoqtapeguelec.

⁹ Qaq ÿoqo'oyi aÿim so'otec qome da i'adoto naua l-llicte da qoneta nam quetague' so Satanás, nam shipecaicpi mayi 'eetega da judiopi qalaxayi sa ishit da 'eesa, da yaqto' namayipi ÿaÿateeta da aÿim ÿataqta 'am sauotec.

¹⁰ Cha'ayi 'am ÿataqta 'au'ot da i'aqtac da ÿataqta 'anhualaxauen. Qaq ÿoqo'oyi aÿim 'am ñipaxatalec qom ivita ca laloqo' ca ñi'iguenataxanaxac mayi naguelec 'enauacna, da qaÿi'iguen 'enauac na netalec ana 'alhua.

¹¹ Qaq aÿim saqaÿaloq da ñanac. Qaq ÿoqo'oyi 'auaÿamaxattec qome ca 'am hueto'ot, yaqto' sa ishit da huo'o ca ÿacona ca 'anshiitenaxat.

¹² Qaq cam dauegaxan qome, nachi aÿim sanagui da 'ico' aca nhuoqte mayi nllañi aca l'onaxanaxaqui ñi ita'a Dios, nachi camayipi sa ishit da nauane' da pa'auec. Qaq camayipi sedelec da l'enaxat ñi ita'a Dios qataq ca l'enaxat cam lma' ñimayi, cam dalaxaic Jerusalén mayi chigoqo'ot na piguem, chigoqtot ñi ita'a Dios. Nataq'en sedelec camayipi ca dalaxaic i'enaxat.

¹³ Qaq cam ÿaÿaten da n'axaÿaxanaxac, qaq no'on da n'axaÿaxana da l'aqtac so Espíritu Santo da 'enapega na 'amqajnataxanaxaicpi.”

Da n'aqtac mayi qaÿamaxa so netaña yi Laodicea

¹⁴ Qataq nataq'en 'auamaxa qome aca 'ede ñi namaxashic piguem l'ec mayi ilotague' na 'amqajnataxanaxaicpi mayi netaña yi Laodicea. Qoneta': “'Eeta' da l'aqtac nam ÿataqta 'eesa, nam sa ishit da napacalec ca l'aqtac, nam chigoqchigui 'enauac nam i'otpi co'ollaxa ñi Dios. 'Eeta':

¹⁵ Aÿim saÿaten 'enauac nam 'au'ottacpi. Qataq saÿaten da sa ishit da 'am tomta, qataq sa ishit da 'am dapaqa. Qaq ¡'onaxáictaxa da chochi 'am tomta, huo'otaq da 'am dapaqa!

¹⁶ Qalaxayi sa ishit da chochi 'am dapaqtai'. Qaq cha'ayi sa ishit da 'am tomta, qataq sa ishit da 'am dapaqa, qaq ÿoqo'oyi ishit da 'am sanolec.

¹⁷ Cha'ayi 'am qonetega da 'am sallaxanec qataq ÿataqta 'auaÿamaqchiguiñi, qaica ca 'aueetac. Qaq sa ishit da 'aula'a da 'am ÿataqta qaica ca 'adama'. 'Am choxodaicolec, qaica ca yi, 'am qanamaic, qataq qouetauec.

¹⁸ Qaq ÿoqo'oyi nagui 'am saqata da aÿim 'auachigoxoto'ot qome da 'aushijnaxana ca ndoteec oro mayi nqachilguishic, da yaqto' ÿataqta 'am sallaxanec, qataq da 'auashijnaxanalo caua 'ogo lapagaxaiqa, da yaqto' 'auapolec da 'adsalhuaxa mayi i'ot da n'agaxa, qataq da 'aushijnaxana ca lata'q naua 'ad'ai'te, da yaqto' 'anauaañi.

¹⁹ Cha'ayi aÿim ÿataqta sevidaxato'ot, qataq saÿamaxajñi ca lasouaxashit cam ÿataqta sauotec. Qaq ÿoqo'oyi 'an'añaxat qome, qataq 'ai'axaadeec naua 'an'onataxaco.

²⁰ Qaq ña 'aula'a da aÿim sootaigui na lasom, seÿaxaatac. Qaq da huo'o ca hua'axaÿa da iÿaxanaxac, qaq da aÿim nauateguet, nachi aÿim senoxonoigui ca lma'. Ime, qaq qomi' nqui'axa'u.

²¹ Qaq cam dauegaxan qome, nachi camayi sanem da huo'o aca nso'onaxaqui ca ñiso'onqa' da aÿim nta'a, da yaqto' 'eeta'am co'ollaq aÿim sauegaxan, nachi ñiso'ona'ai' ñi ita'a Dios.

²² Qaq cam ÿaÿaten da n'axaÿaxanaxac, qaq no'on da n'axaÿaxana da l'aqtac so Espíritu Santo da 'enapega na 'amqajnataxanaxaicpi.”