Apocalipsis 22 - Nuevo Testamento Toba Sur

¹ Nachi so namaxashic aÿim ÿachaxana so tala mayi chigoqtapoigui da nca'alaxa na l'ec 'etaxat. Somayi 'eeta'am na chauec, ÿataqta yi'oqchiguiñi. Qaq somayi chigoqteu'a ca nso'onqa' ñi Dios qataq so qagueta llalec.

² Qaq nam laiñi so nqa'aic mayi lainguishic se'eso la ciudad, nachi nacchiguingui se'eso tala. Qaq naua loiguiyi se'eso tala nachi queteguelo ana qo'ipaq mayi chigoqtapoigui da nca'alaxa. Qaq ana'ana qo'ipaq da inoxoneec ñi ca'agoxoic, qataq huo'o ana ala. Qaq doce da ÿi'iguelaxalec da huo'o ana ala ñi 'oonolec vi'i. Qaq ana laue ana'ana qo'ipaq taiguet da latannaxanaqte na ÿotta'a't shiÿaxauapi.

³ Huaña yimayi, nachi sa ishit da huo'o ca qaÿauo'o ca nhuaxanaguec. Qaq aca nso'onaxaqui ñi Dios qataq so qagueta llalec nachi netaña yimayi. Nachi nam lamaxashicpi ñimayi nachi ÿi'oxodeetac.

⁴ Huaña, nachi qanma'ai' da qanauane' ñimayi. Nachi na lata'pi namayipi, nachi nanettalguete ca l'enaxat.

⁵ Huaña, nachi sa ishit da huo'o ca pe. Qaq nam netaña yimayi sa ishit da iuen ca l'edaxa aca ncoÿadaxanaxaqui qataq nam l'edaxa aso nala', cha'ayi ñim Dios mayi qadataxala' icoÿattalec. Qaq namayipi nachi chochaq tatreec naua na'axa'te da nta'alpi.

Ca lli'iguelaxasoxoc so Jesucristo mashi sa qaÿapeque

⁶ Ime, nachi so namaxashic aÿim 'enapega, 'eeta': –Ne'ena n'aqtacpi ÿataqta 'eesa, qaq namayipi ishit da qaipi'iÿa'a. Qaq ñim qadataxala' Dios mayi nachiñi ñi i'añaqchit nam l'aqtaxanaxanecpi, ñimayi namaq na lamaxashic, da yaqto' ÿachaxana na do'onataxaatacotpi ñimayi dam saqaÿaloq da yi'oq.

⁷ –¡Saqaÿaloq da ñanac! ¡Qaq ÿataqta machiguiñi qome ca ÿalaxalec de'eda l'aqtaxanaxac ñi Dios mayi nanettalec ana'ana nede!

⁸ Qaq aÿim Juan sa'aqchigui qataq sauaachigui 'enauac ne'enapi. Qaq can ime da sa'aqchigui qataq sauaachigui, nachi aÿim sa'adoto naua illicte so namaxashic piguem l'ec mayi aÿim ÿachaxaatega 'enauac ne'ena, da sauotaique da ñatomnot.

⁹ Qalaxayi somayi aÿim 'enapega, 'eeta': –Sa ishit da nachi qonetec de'eda, cha'ayi chochi aÿim lamaxashic ñi Dios. Shiita'am 'am qataq nam 'adqaÿañicpi mayi l'aqtaxanaxanecpi ñi Dios, qataq 'enauac nam ÿataqta ÿalaxalguete naua nanettalguete ana'ana nede. Qaq nachiñita ñi Dios 'anatamnot.

¹⁰ Qataq aÿim 'enapega, 'eeta': –Sa ishit qome da 'oxojñi de'eda l'aqtaxanaxac ñi Dios mayi nanettalec ana'ana nede. Cha'ayi mashi sa qaÿapeque yi laloqo' da ipacchiguilo naua qai'axa't.

¹¹ Qaq ÿoqo'oyi nagui cam i'ottac ca sa ÿaÿamaxañi, qalaq qaÿauaqta'a da i'ot. Qataq cam nshipaxan da nachaalataxac, qalaq ña nshipaxanaqchit. Qaq cam i'ottac ca ÿaÿamaqchiguiñi, qaq no'on da i'ot. Qataq cam nañanot da quetague' ñi Dios, qalaq no'on da ÿataqta quetelec ñimayi.

¹² –Aja', aÿim saqaÿaloq da ñanac. Qaq ñachitac ca ishiitenaxanaxat, da yaqto' seshiiten ñi 'oonolec cam l'onataxanaxac.

¹³ Qaq aÿim mayi nachaÿim l'auaxanec, qataq sepa'ateec, nachaÿim l'atchiguiñi, qataq aÿim loga't 'enauacna, shiita'am aca l'auaxana ana leetrapi qataq aca pa'ateec.

¹⁴ Qaq ÿataqta machiguiñi qome ca iÿoi' naua alogo, yaqto' ishit da nhuaatau'a aca qo'ipaq mayi chigaqaigui da nca'alaxa, qataq da yaqto' ishit da inoxoneu'a ñi lasom yi'iyi la ciudad.

¹⁵ Qalaxayi pa'atauec qome na i'otta'pe naua qauema, qataq na i'ottac da n'enaxanaxac, qataq nam quishiguetaxaicpi, laataxanaxaicpi, qataq nam natameetacot na nqolacpi, qataq 'enauac nam nqopita da i'ot da latenataxanaxac.

¹⁶ –Qaq nachaÿim Jesús mayi ñamaq so ÿamaxashic, da yaqto' i'axatem 'enauac de'eda nam aÿim i'amaqteetac. Qaq nachaÿim mayi aÿim chigoxoguet so nta'a David qataq nachi sachigoxoguet somayi. Qataq aÿim mayi nachaÿim huaqajñi yi'oxoñi lalaqte.

¹⁷ Qaq so Espíritu Santo qataq aso huotaique da lhua so qagueta llalec 'eeta': –Ña 'auanac. Qaq cam hua'axaÿa de'eda n'aqtac, qaq nataq'en 'eeta': –'Auanac. Qaq cam ilem na laquip, qaq da nshapeque da nÿom, qaq no'on da anac, nachi nÿomgui ca 'etaxat mayi chigaqaigui da nca'alaxa. Qaq camayi chochi qoÿaachi'.

¹⁸ Qaq 'enauac qome na hua'aqchigui de'eda l'aqtaxanaxac ñi Dios mayi nanettalec ana'ana nede, aÿim saqata namayipi, shiita': Da huo'o ca chochi ÿoqotteneu'a ne'enapi ca sa lataxac, nachi camayi ÿacteec da iuaxanque ñi Dios naua napaxaco mayi nanettalguete ana'ana nede.

¹⁹ Qataq da huo'o ca nqat ca 'oonolec ne'ena l'aqtaxanaxacpi ñi Dios mayi nanettalec ana'ana nede, nachi ñi Dios nqateeguesop camayi ca l'enaxat aso nanedaxalate nam qanca'alaxateec qataq yim la ciudad mayi ÿataqta qui'itta, nam qoÿittalguete ana'ana nede.

²⁰ Qaq som i'axattac de'eda 'eeta': –Aja', aÿim saqaÿaloq da ñanac. Aja', nachi 'eetec. ¡Ña 'auanac, 'am qadataxala' Jesús!

²¹ Qaq som qadataxala' Jesucristo ÿanem qome 'enauac da qoñiita ca qanchoxonnataguiiqui. Aja', nachi 'eetec.