Apocalipsis 21 - Nuevo Testamento Toba Sur

So dalaxaic piguem qataq aso 'alhua dalaxai

¹ Ime, nachi sela'a so piguem dalaxaic qataq aso 'alhua dalaxai, cha'ayi so hua'auchiguiñi piguem qataq aso hua'auchiguiñi 'alhua mashi imeuo. Qataq aso auaxai nataq'en mashi imeuo.

² Qaq aÿim Juan sela'aguet so dalaxaic la ciudad Jerusalén. Somayi ÿataqta qui'itta, chigaqshiguem, chigoqo'ot ñi Dios. Mashi sogote da 'enauac imeta, 'eeta'am da n'otaxac aca qa'añole da mashi huotaique da huadonguet ca nauonaxaua.

³ Nachi sa'axaÿa so n'aqtac ÿataqta alam, chimqot na piguem, 'eeta': –Ña 'aula'a, ñi Dios netangui nagui na shiÿaxauapi, ÿataqta lauodeuapi. Namayipi ÿataqta lauo' l'ecpi. Ñimayi ÿalecta'aguet na shiÿaxauapi, qaq nachiñi ñi lta'a Dios namayipi.

⁴ Nachi ñimayi iÿodeec 'enauaque naua lachi' namayipi. Huaña, nachi sa ishit da ileu ca shiÿaxaua, qataq sa ishit da noÿiitac, huo'otaq da n'alaqtapiguiñi, huo'otaq da huo'o da nqui'ic. Cha'ayi 'enauac na seloqtaigui nagui 'enauac imeuo.

⁵ Nachi som nso'ootangui asom nso'onaxaqui na nta'a 'eeta': –Ña 'aula'a, nagui aÿim ñadalaxat 'enauacna. Nataq'en 'eeta': –'Iyiñi qome ne'enapi, cha'ayi ne'ena n'aqtacpi ÿataqta 'eesa qataq ishit da qaipi'iÿa'a.

⁶ Qataq aÿim 'enapega, 'eeta': –Mashi sogote da ime. Aÿim mayi nachaÿim l'atchiguiñi qataq sepa'ateec, shiita'am aca l'auaxana ana leetrapi qataq aca pa'ateec. Qaq cam ilem na laquip, qaq aÿim sanem ca 'etaxat mayi chigaqaigui da nca'alaxa mayi chigaqangui acam npaxaatashiguem na l'ec. Qaq camayi chochi qoÿaachi'.

⁷ Qaq cam dauegaxan qome, nachi qoÿami' 'enauac ne'ena, 'eeta'am da nshiitenaxat qanqoÿin. Nachi camayi aÿim lta'a Dios, qaq camayi ÿalec.

⁸ Qaq nam shiÿaxauapi mayi colanqaic, qataq nam sa da'amqajnataxan, qataq nam nqaigaxatpi, laataxanaxaicpi, qataq nam quishiguetaxaicpi, qataq nam ÿi'en ca lÿa, qataq nam natameetacot ca nqolac, qataq 'enauac nam tenataxanaxaicpi, qaq 'enauac qome namayipi qoÿami' da qaÿasaxangui ca lta'adaic nodec mayi huaña da ÿavictaigui na quiquiaxadaic. Mayi nachica ca ÿaqa'aguet nleuaxa.

So dalaxaic Jerusalén

⁹ Nachi anac so 'oonolec so siete namaxashicpi mayi lasoqta'a asom huetaguipi som pa'ateec nhuaxanaxanaxacpi. Nachi aÿim 'enapega, 'eeta': –Ña 'ayala, ñaq 'am sachaxana añim nauonaxaua mayi huotaique da lhua ñim qagueta llalec.

¹⁰ Qaq can ñaq sootaigui se'eso ÿauanaqchic mayi aÿim ÿachaxana so Espíritu Santo, nachi som namaxashic aÿim ÿaviguishiguemec aso qaÿoqotchiguemec qasoxonaxa. Nachi aÿim ÿachaxana so lta'adaic la ciudad Jerusalén, ÿataqta qui'itta. Somayi chigoqto'ot na piguem, chigoqtot ñi Dios.

¹¹ Qaq se'eso la ciudad nachi huetaigui na l'edaxa ñi Dios. Qaq ne'ena l'edaxa 'eeta'am na ÿataqta no'on coma' l'enaxat jaspe mayi ÿataqta qashilec qataq chauec.

¹² Qaq ne'enaua laÿil se'eso la ciudad, qalaq huo'o so lta'adaic lcopaqtaxat ÿataqta qaÿoqotchiguemec, qataq ivi' doce naua laso'mi, qataq 'oonolec ñi namaxashic nam huetaigui na lasompi da ilotague'. Qataq nam l'enaxatpi so doce llalaqpi so Israel nachi nanettalguete naua laso'mi.

¹³ Qaq tres soua laso'mi pa'adegue da yi'oxoñi, qataq tres soua pa'adegue da shi'u, qataq tres soua pa'adegue da taguiñi, qataq tres soua pa'adegue da avit.

¹⁴ Qaq se'eso lcopaqtaxat se'eso la ciudad, qalaq somayi n'oxootalguete qanqoÿin soua doce coma'yi. Qaq soomayi nachi nanettalguete naua l'enqa'te soua doce lamaxa'shi so qagueta llalec.

¹⁵ Qaq som namaxashic mayi aÿim da'aqtaxaatapeguem, somayi nasoqta'a so laloqnaxanaxat mayi chigaqaigui na oro, da yaqto' naloqten se'eso la ciudad, qataq naua laso'mi, qataq som lcopaqtaxat.

¹⁶ Qaq se'eso la ciudad, somayi cuatro naua laÿil, qaq yi lalogaxa nachi 'eeta'am yi lcachiguiñi. Nachi se'eso namaxashic nachi naloqten se'eso la ciudad, idolec som laloqnaxanaxat. Qaq ivi' dos mil doscientos kilómetros yi locta, qataq yi lcachiguiñi, qataq yi lalogaxa na pa'ashiguem.

¹⁷ Ime, qataq naloqten so lcopaqtaxat. Qaq somayi ivi' sesenta y cuatro metros yi locta na pa'ashiguem. Qaq yi'iyi ivi', nachiyi yi laloqñiguishic som laloqnaxanaxat na shiÿaxauapi mayi daloqnaxaatega so namaxashic.

¹⁸ Qaq se'eso ncopaqtaxanaxat, somayi l'oxonaxat na coma' l'enaxat jaspe. Qaq so la ciudad, qalaq ndoteec na oro na l'oxonaxat. Qaq namayi 'eeta'am na chauec, ÿataqta yi'oqtelec.

¹⁹ Qaq na coma' mayi lli'oxodaxat se'eso ncopaqtaxanaxat, namayipi ÿataqta ÿotta'a't na l'oguiaxacpi. Qaq so hua'auchiguiñi l'oxonaxat na coma' l'enaxat jaspe, qaq so lÿa l'oxonaxat na zafiro, qaq so lÿa l'oxonaxat na ágata, qaq so lÿa l'oxonaxat na esmeralda,

²⁰ qaq so lÿa l'oxonaxat na ónice, qaq so lÿa l'oxonaxat na cornalina, qaq so lÿa l'oxonaxat na crisólito, qaq so lÿa l'oxonaxat na berilo, qaq so lÿa l'oxonaxat na topacio, qaq so lÿa l'oxonaxat na crisoprasa, qaq so lÿa l'oxonaxat na jacinto, qaq so pa'ateec amatista.

²¹ Qaq soua doce laso'me, qalaq ndoteec na perla. Ñi 'oonolec lasom, nachi n'onataxat na perla. Qaq so nqa'aic mayi lainguishic, qalaq ndoteec na oro, 'eeta'am na chauec mayi ÿataqta yi'oqtelec.

²² Qalaxayi sa ishit da huo'o aca sela'a n'onaxanaxaqui se'eso la ciudad, cha'ayi ñi qadataxala' Dios mayi qaica ca ÿaqalanapec, ñimayi nachiñi ñi 'ico' n'onaxanaxaqui, nataq'en som qagueta llale.

²³ Qataq se'eso la ciudad, somayi sa ishit da iuen aso nala' qataq so ca'agoxoic, da huo'otaq icoÿadelec. Cha'ayi na maichi l'edaxa ñi Dios qataq so qagueta llalec nachi icoÿattalec.

²⁴ Qaq nam ÿotta'a't shiÿaxauapi mayi qanca'alaxateec nachi nachattaigui na l'edaxa yi'iyi la ciudad. Qaq nam nta'alpi mayi huetalec ana 'alhua nachi ndotega da l'amaqchic qataq da lli'oxoyic yimayi.

²⁵ Qataq naua laso'mi yimayi sa ishit da ÿapotaguilo yi na'a'q, qataq sa ishit da huo'o ca pe.

²⁶ Qaq nachi ndotega yimayi da l'amaqchic qataq da lli'oxoyic nam ÿotta'a't shiÿaxauapi.

²⁷ Qalaxayi sa ishit da inoxoneu'a yimayi ca nshipaxan, huo'otaq ca ncocatapiguilo naua n'onataxaco, huo'otaq ca datenataxan, chaqcata ca qoÿittau'a ca l'enaxat aso lede so qagueta llalec asom nanedaxalate nam chochaq tateec da lca'alaxa.