Apocalipsis 20 - Nuevo Testamento Toba Sur

Soua mil vi'iyi

¹ Qaq can ime de'eda, nachi sauaateguet so namaxashic chigoqtot na piguem, lasoqta'a aso lvinaqte cam laponqa' na leuaxaicpi qataq so lta'adaic ncoñitaxanaxat.

² Qaq se'eso namaxashic, somayi ÿaconeu'a so 'ico' da'ail'oc som l'atchiguiñi n'adaxanaq mayi nachiso so shiÿaxaua lma'na, l'enaxat Satanás, nachi icoñidai' mil vi'iyi.

³ Nachi ÿasaxaña cam laponqa' na leuaxaicpi. Nachi ÿapou'a, qataq itoqoolec aso l'anaxanaqte, da yaqto' sa ishit da qaltaq ÿatenachit na ÿotta'a't shiÿaxauapi, to' qom mashi inoxoodeec ca mil vi'iyi. Qaq qom mashi inoxoodeec que'ecaua vi'iyi, nachi somayi cada'ac da qaisouec.

⁴ Qaq can ime, nachi sela'a aso nso'onaxaquipi na nta'a. Qaq asomayipi nachi nso'ootangui som qoÿanem da nmit na nasouaxashitpi. Nataq'en sela'a na lqui'ipi nam qaipeteguec na lqaic co'ollaxa souaxat da i'axattac da l'aqtac ñi Dios mayi 'itchiguiñi naq'en so Jesús. Somayipi nachiso so sa ishit da ÿi'oxoden so shiguiÿac qataq som n'enaqtac lqui'i, qataq sa ishit da nashinguet aso l'anaxanaqte da yaqto' qai'an na latap, huo'otaq na lhuaq. Qaq sela'a somayipi da qaltaq qanca'alaxateec, nachi ltaua so Cristo da nta'alpi que'ecaua mil vi'iyi.

⁵ Qaq 'eso som hua'auchiguiñi da qanca'alaxateeguesop na leuaxaicpi. Qaq som laÿipi leuaxaicpi, qalaq sa ishit da qaltaq qanca'alaxateec to' qom ivildeec caua mil vi'iyi.

⁶ Qaq ¡ÿataqta machiguiñi qataq lalamaxatpi qome ñi Dios nam ÿalectau'a cam hua'auchiguiñi da qanca'alaxateeguesop nam leuaxaicpi! Qaq cam ÿaqa'aguet nleuaxa, nachi sa ishit da huo'o ca 'en'ac namayipi. Cha'ayi namayipi ltaxaÿaxanaxanecpi na lalamaxatpi ñi Dios qataq so Cristo. Huaña, nachi ltaua somayi da nta'a caua mil vi'iyi.

⁷ Qaq qom mashi inoxoodeec caua mil vi'iyi, nachi so Satanás qaltaq qaisouec.

⁸ Nachi nnoxooshiguem da qaltaq ÿatenachit 'enauac nam ÿotta'a't shiÿaxauapi mayi huetalec ana 'alhua. Nachi nqo'ona da ÿatenachit ñi Gog qataq Magog. Nachi laÿona't na nallippi naamayi, da yaqto' deloqui. Qaq namayipi qalota, 'eeta'am na lsochi na coma' mayi hueto'ot na loigue aso auaxai.

⁹ Huaña, somayipi, nachi ÿataqta imattalec ana 'alhua. Nachi qaicoleesop som lma' nam lalamaxatpi ñi Dios qataq so la ciudad mayi lauotaxat ñimayi. Qalaxayi ñi Dios namaq so nodec, chigoqo'ot na piguem. Nachi ÿavigaxat 'enauac somayipi.

¹⁰ Qaq som shiÿaxaua lma'na mayi ÿatenachit somayipi, qaÿasaxangui so lta'adaic nodec mayi huaña da ÿavictac na quiquiaxadaic, som huaña da qaÿasaxangui co'ollaxa so shiguiÿac qataq so 'eetega da l'aqtaxanaxanec ñi Dios. Huangui se'eso nodec, nachi huo'o da nque'ejnaxac chochaq tatreec 'enauaque naua na'axa'te.

Da 'eetec da qanmit na shiÿaxauapi ca pa'ateec na'a'q

¹¹ Nachi sela'a aso late'edai so'onaxaqui lapagaxai qataq som nso'ootangui asomayi. Huaña, nachi ana 'alhua qataq na piguem ÿataqta nlagaxatapec, ÿataqta sa ishit da huo'o ca chapegue' namayipi.

¹² Nachi nam leuaxaicpi 'amaqtaqaicpi qataq nam saq 'amaqtaq nachattañi, datato'ot ñi Dios. Huaña, nachi qaÿauachigui aso nedepi qataq asom lÿa nede mayi nanedaxalate nam qanca'alaxateecpi. Nachi na leuaxaicpi qanmit ñi 'oonolec na i'otpi mayi qoÿittalec asa'aso nedepi, da yaqto' qaishiiten.

¹³ Nachi aso auaxai ÿaneuo nam leuaxaicpi mayi huetangui. Qataq so nleuaxa qataq som laponqa' na leuaxaicpi, soomayi ÿaadeuo nam hueto'oto. Nachi 'enauac somayipi qanmit ñi 'oonolec na i'otpi, da yaqto' qaishiiten.

¹⁴ Ime, nachi so nleuaxa qataq som laponqa' na leuaxaicpi, soomayi qaÿasaxayingui so lta'adaic nodec. Qaq se'eso lta'adaic nodec, somayi nachiso so ÿaqa'aguet nleuaxa.

¹⁵ Nachi somayi qaÿasaxangui nam sa ishit da qoÿittau'a aso nanedaxalate nam qanca'alaxateecpi.