Apocalipsis 2 - Nuevo Testamento Toba Sur

Da n'aqtac mayi qaÿamaxa so 'amqajnataxanaxaicpi mayi netalguete soua siete 'ale'u. Da n'aqtac mayi qaÿamaxa yi Éfeso

¹ 'Auamaxa qome aca 'ede ñi namaxashic piguem l'ec mayi ilotague' na 'amqajnataxanaxaicpi mayi netaña yi Éfeso. Qoneta': “'Eeta' da l'aqtac na huetaiguilo na lhuaq ana siete huaqajñi, qataq huetangui na laiñi ana siete ncoÿadaxanaxaquipi mayi chigaqaigui na oro, 'eeta':

² Aÿim saÿaten 'enauac nam 'au'ottacpi, qataq saÿateeta da lta'adaic 'ad'onataxanaxac qataq da 'adhualaxavic. Qataq saÿaten da 'am sa ishit da 'anque'etaxaatapegue' da lataxac na qauemaicpi. Qataq aÿim saÿaten da 'am ÿataqta 'avi'iguen na 'eetega da lamaxashicpi so Jesús, qalaxayi saq 'en, qaq 'am 'aulalec namayipi da chochi tenataxanaxaicpi.

³ Qaq ÿataqta huo'o da 'anhualaxaunaxac, qataq da 'anque'ejnaxac, qataq qalota da 'ad'onataxanaxac souaxat aÿim, qalaxayi sa ishit da 'anasamtapiguiñi.

⁴ Qalaxayi aÿim huo'o da sa saÿamaxaden da qoneta, cha'ayi ¿tá'ainco'? Yi sa ishit da natenguet som hua'auchiguiñi lataxac da 'adauotaxanaqtaic.

⁵ Qaq ÿoqo'oyi 'auennate qome cam huaña da 'am 'auanajñi. Ime, qaq 'anadalaxat ca 'adataxac, nachi 'au'ot som hua'auchiguiñi co'ollaxa da 'au'ottac. Ten, qom saqaÿaloq da 'am ñoqo'ona, nachi seuotaxanec añi 'adcoÿadaxanaxaqui. Qalaxayi qom 'anadalaxat da 'adataxac, qaq sa ishit da seuotaxanec.

⁶ Qalaxayi huo'o da ÿaÿamaxannataxanaxa da qoneta. Cha'ayi ÿataqta 'adquiÿa nam i'ottacpi nam quetague' da lapaxaguenataxanaxac so Nicolás, nam nataq'en aÿim iquiÿaxat.

⁷ Qaq cam ÿaÿaten da n'axaÿaxanaxac, qaq no'on da n'axaÿaxana da l'aqtac so Espíritu Santo da 'enapega na 'amqajnataxanaxaicpi, 'eeta': Cam dauegaxan qome, qaq aÿim sanem da chic ana ala ada qo'ipaq mayi chigaqaigui da nca'alaxa mayi netangui na laiñi yi lanaxanqa' ñi Dios.”

Da n'aqtac mayi qaÿamaxa so netaña yi Esmirna

⁸ Nataq'en 'auamaxa aca 'ede ñi namaxashic piguem l'ec mayi ilotague' na 'amqajnataxanaxaicpi mayi netaña yi Esmirna. Qoneta': “'Eeta' da l'aqtac na l'auaxanec co'ollaxa da huo'o, qataq nachina na pa'ateec, nam qaÿalauat co'ollaxa, qaltaq ÿi'iguelaxalec da nca'aleec, 'eeta':

⁹ Aÿim saÿaten 'enauac nam 'au'ottacpi qataq 'enauac na 'anque'ejnaxaguesat qataq dam 'adachoxoyic, nai'ctaxa da ÿataqta 'am sallaxanec. Qataq saÿaten da ÿataqta qauema naua ltaxaÿaxaco da 'am detaxaÿa nam 'eetega da judiopi, qalaxayi sa ishit da 'en. Chaqdata da namayipi i'amaqteetac so Satanás.

¹⁰ Qaq sa ishit qome da 'ayi'iÿa cam 'anque'ejnaxac. Cha'ayi so shiÿaxaua lma'na huo'o qome ca ÿamaxaigui añi ncoñitaxanaxaqui da qoñiita, da yaqto' 'enauac da qoñiita qaÿauo'o ca qañi'iguenaguiiqui. Nachi ÿataqta huo'o ca qanque'ejnaxaqui, ivittreec caua diez na'axa'te. Qalaxayi qoquiitot da qadpi'iÿaxaqui, chochi ivitta'a da qami' qadellivi. Nachi aÿim qami' sanema da achaalataxac, 'eeta'am aca qanshiitenaqchi.

¹¹ Qaq cam ÿaÿaten da n'axaÿaxanaxac, qaq no'on da n'axaÿaxana da l'aqtac so Espíritu Santo da 'enapega na 'amqajnataxanaxaicpi, 'eeta': Cam dauegaxan qome, nachi camayi sa ishit da nque'etaxangui da lqui'ic ca ÿaqa'aguet nleuaxa.”

Da n'aqtac mayi qaÿamaxa so netaña yi Pérgamo

¹² Nataq'en 'auamaxa qome aca 'ede ñi namaxashic piguem l'ec mayi ilotague' na 'amqajnataxanaxaicpi mayi netaña yi Pérgamo. Qoneta': “'Eeta' da l'aqtac na huo'o na lainec mayi ÿataqta ÿaxadaic qataq dos naua ala'pi, 'eeta':

¹³ Aÿim ÿataqta saÿateeta 'enauac nam 'au'ottacpi, qataq saÿaten da qonetangui nam ilotague' so Satanás. Qalaxayi ñaqaiyita 'am ÿataqta aÿim qoquetelec, qaq ÿataqta sa ishit da 'axaañi da aÿim 'au'amaqteetac, nai'ctaxa da co'ollaq qaÿalauat so i'aqtaxanaxanec Antipas, som 'oonolec da qoñiita, mayi huaña yim hueta'a so Satanás.

¹⁴ Qalaxayi aÿim huo'o na sa saÿamaxadenpi da qoneta, yi ¿tá'ainco' yi huo'o na netaña na Pérgamo da sa ishit da ÿaxaneec da lapaxaguenataxanaxac so Balaam? Cha'ayi somayi ÿapaxaguenec co'olloxochiyi so Balac, da yaqto' ÿayina'a so Israel llalaqpi da chic nam nachitaqtaxanaxat mayi qaÿavigaxat da qoÿanot ca nqolac, qataq da taigui naq'en da quishishaxac, da yaqto' huo'o ca lasouaxashit.

¹⁵ Nataq'en huo'o na netaña namayi nam sa ishit da ÿaxaneec da lapaxaguenataxanaxac so Nicolás mayi iquiÿaxat.

¹⁶ Qaq ÿoqo'oyi 'ai'axaadeec qome naua 'an'onataxaco. Ten, qom saqaÿaloq da 'am ñoqo'ona, nachi selogui' namayipi, sedolec na ÿainec mayi netaigui na aÿap.

¹⁷ Qaq ÿoqo'oyi ca ÿaÿaten da n'axaÿaxanaxac, qaq no'on da n'axaÿaxana da l'aqtac so Espíritu Santo da 'enapega na 'amqajnataxanaxaicpi, 'eeta': Cam dauegaxan qome, nachi aÿim sanem da chic ca nallic saq cha'a mayi chigoqo'ot ñi Dios, qataq nataq'en sami' ca coma' lapagaxaic. Qaq que'eca coma' nanettalec ca dalaxaic l'enaxat mayi sa ishit da huo'o ca ÿaÿaten, chaqcata cam ÿaconguet mayi ÿaÿaten.”

Da n'aqtac mayi qaÿamaxa so netaña yi Tiatira

¹⁸ Nataq'en 'auamaxa qome aca 'ede ñi namaxashic piguem l'ec mayi ilotague' na 'amqajnataxanaxaicpi mayi netaña yi Tiatira. Qoneta': “'Eeta' da l'aqtac na llalec ñi Dios, nam 'eeta'am na nodec l'edaxa naua l'ai'te, qataq naua lchil 'eeta'ama na nqashilgaqtac lcat l'enaxat bronce, 'eeta':

¹⁹ Aÿim saÿaten 'enauac na 'au'ottacpi, qataq sauattoota da 'adauotaxanaqtaic, qataq da 'adpi'iÿaxac, 'ad'onataxanaxac, qataq da 'adhualaxavic. Qataq saÿaten da ÿataqta ÿacteec nagui da 'ad'onataxanaxac, qaq saq 'en'am so hua'auchiguiñi.

²⁰ Qalaxayi huo'o da sa saÿamaxaden da qoneta. Cha'ayi 'am ÿataqta 'anashiiteguet añi 'alo l'enaxat Jezabel mayi 'eetega da l'aqtaxanaxana ñi Dios. Qalaxayi de'eda lapaxaguenataxanaxac isomaxanapec na ÿamaxashicpi da ÿaueca'aguet da nquishishaxac qataq da chic naq'en na nachitaqtaxanaxat mayi qaÿavigaxat da qoÿanot na nqolacpi.

²¹ Qaq aÿim mashi sami' da ldaqa' añimayi, da yaqto' ÿaxaadeec naua n'onataxaco. Qalaxayi sa ishit da ÿaxaadeec, qataq sa ishit da ÿaxaañi da nquishishaxac.

²² Qaq ÿoqo'oyi nagui da sa ishit da ÿaxaneec namayipi dam i'ottac añimayi, nachi sa no'on qome ñaq'en añimayi, yaqto' nnaatai', qaq yaqto' ÿataqta huo'o da nque'ejnaxac nam nquishistague'pi añimayi.

²³ Qataq salauat qome 'enauac na llalaqpi, yaqto' 'enauac na 'amqajnataxanaxaicpi ishit da ÿaÿaten da aÿim 'eesa da saÿateetac cam saq cha'a nhuennataxac qataq da nquiyaqteÿaxac. Qataq ñi 'oonolec da qoñiita seshiitenguet cam naigui ca i'ottac.

²⁴ Qalaxayi qami' mayi qoñiitaña na Tiatira mayi sa ishit da qoquiigue de'eda napaxaguenataxanaxac qataq sa ishit da qavichiÿa da qauauattoñi dam qoÿiitega saq cha'a lataxac so Satanás, qaq aÿim qami' shinapegalo da sa ishit da qaltaq sauo'o ca lÿa qami' sachilguete.

²⁵ Qalaxayi qauaÿamaxachiitec qome dam mashi qami' hueto'oto, chochi ivitta'a ca na'a'q qom ñi'iguelaq.

²⁶ Qaq cam dauegaxan, qataq ividaxatta'a ca loga'tna da i'ottac cam saÿamaxadeeta, qaq camayi sanem da ÿamaqpec na ÿotta'a't shiÿaxauapi,

²⁷ da yaqto' 'eeta'am da 'eetec ñi ita'a da aÿim ÿanem da samaxasoxonapec. Nachi camayi ilo'ogue na ÿotta'a't shiÿaxauapi, huota'a ca npon lcat. Qaq ilaxachigui namayipi, 'eeta'am naq'en aca naco'oña 'alhua da ilaxachigui.

²⁸ Qataq sanem nataq'en aca huaqajñi mayi yi'oxoñi lalaqte.

²⁹ Qaq cam ÿaÿaten da n'axaÿaxanaxac, qaq no'on da n'axaÿaxana da l'aqtac so Espíritu Santo da 'enapega na 'amqajnataxanaxaicpi.”