Apocalipsis 19 - Nuevo Testamento Toba Sur

¹ Qaq can ime de'eda, nachi sa'axaÿa da lavilÿaxac so ÿataqta saq llalcolec shiÿaxauapi, chimqot na piguem, 'eeta': ¡Shi'oxodenaq ñi qadta'a Dios! Cha'ayi da nca'alaxa, ñi'oxoyic, qataq da n'añaxac lalamaxat ñimayi.

² Cha'ayi ñimayi ÿataqta n'oiteguelo naua lhuaxanaxanaxaco qataq 'eesoda. Cha'ayi ñimayi ÿauo'o da nhuaxanaguec aso quishiguetaxai mayi n'aqchit 'enauac na huetalec ana 'alhua da nquishishaxac, qataq ishiitenguet asomayi souaxat da nalaataguec nam lamaxashicpi ñimayi.

³ Ime, qataq ñi'iguelaxashiguem se'eso nvilÿaxac, 'eeta': –¡Shi'oxodenaq qome ñi Dios! Cha'ayi na lmala'q da navigaqtaguec yi'iyi la ciudad, damayi chochaq tateec da nchitapiguishiguem.

⁴ Nachi so veinticuatro nquedoxonecpi qataq soua cuatro shiguiÿac, soomayi nqapaxangueta ana 'alhua. Nachi ÿi'oxode'n ñi Dios mayi nso'ootangui aso nso'onaxaqui da nta'a, 'eeta': –¡Aja', nachi 'eetec! ¡Shi'oxodenaq ñi Dios!

⁵ Nachi sa'axaÿa so nvilÿaxac chimaqtelec so so'onqa', 'eeta': Qavi'oxoyiñi qome ñi qadta'a Dios, 'enauac da qoñiita mayi qau'onataxañiitacot qataq ÿataqta qaualaqaiguet ñimayi, 'enauac da qoñiita nam qapi'olecpi qataq nam 'amaqtaqaicpi.

Da 'eetec da ladonaxac so qagueta llalec

⁶ Qaq nataq'en sa'aqchigui na l'aqtacpi na 'eeta'am na qalota shiÿaxauapi, qataq 'eeta'am da l-lamaxa na lta'adaic l'auaxac qataq na lta'adaic nalataxa, 'eeta': ¡Shi'oxonnataxanaq! Cha'ayi ivita yi laloqo' da ilo'ogue 'enauacna ñim qadataxala' Dios mayi qaica ca ÿaqalanapec.

⁷ Ÿataqta samaqchiguiñi, ñitonaqtapigui', qataq shi'oxodenaq ñimayi, cha'ayi mashi ivita yi laloqo' da huadon ñi qagueta llalec. Añi lhua mashi sogote da naÿamaxattai',

⁸ qaq añimayi qaÿashiitem da n'ot da ÿaayiñi naua no'o'n alogo chigaqaiguilo na lino. Naamayi qui'itte' qataq qashile'c. Cha'ayi na nogoxot mayi chigaqaigui na lino, namayi nachi naigui dam nachaalataxac qui'itta nam lalamaxatpi ñi Dios.

⁹ Nachi som namaxashic aÿim 'enapega, 'eeta': –'Iyiñi qome da 'eeta': “Ÿataqta machiguiñi qome na qaiÿaxana da ÿalectau'a ca ladonaxac so qagueta llalec.” Nachi qaltaq aÿim 'enapega, 'eeta': –De'eda l'aqtac ñi Dios, damayi ÿataqta 'eesa.

¹⁰ Nachi aÿim sa'adoto naua illicte, da yaqto' shi'oxoden som namaxashic. Qalaxayi somayi aÿim 'enapega, 'eeta': –Sa ishit da nachi qonetec de'eda. Cha'ayi aÿim chochi aÿim lamaxashic ñi Dios. Nachi 'am shiita'am, qataq 'enauac nam 'adqaÿañicpi mayi ÿataqta quetelguete nam l'aqtaxanaxaco mayi 'eesoda so Jesús. Qaq ñim Dios mayi 'avi'oxoden. Cha'ayi de'eda l'aqtaxanaxac so Jesús, damayi nachida da i'añaqchit nam i'axatta'pe naua l'aqtaqa ñi Dios.

Som netalec so caaÿo lapagaxaic

¹¹ Huaña, nachi sela'a na piguem da nauatoigui, nachi nachaxan so caaÿo lapagaxaic. Qaq som netalec l'enaxat ipacchiguilo naua l'aqtaqa qataq 'eesoda. Qaq da nloquiaxac ÿaÿamaqchiguiñi da nta'a qataq da nmit na shiÿaxauapi.

¹² Qaq naua l'ai'te ÿataqta 'edoiguilo, 'eeta'ama na nodec l'edaxa. Qaq na lqaic netagui ana ÿataqta qalota nado'o na nta'a. Qaq som l'enaxat mayi nanettañi, chaqsota somayi ÿaÿaten.

¹³ Qaq somayi soua ÿaatrañi alogo ÿataqta huaguilo na ntago'q. Qaq da l'enaxat somayi, 'eeta': L'aqtac ñi Dios.

¹⁴ Qaq somayi nachi ca'attague' na allippi piguem l'ecpi. Namayipi ÿaatrañi naua alogo mayi chigaqaiguilo na lino, ÿataqta ÿapaga'q qataq qui'itte'. Qaq netalec na caaÿo lapagaxaicpi.

¹⁵ Qaq na alap somayi netaigui so ÿiilonec ÿataqta ÿaxadaic, da yaqto' idolec na ÿotta'a't shiÿaxauapi da ique'emaqchit. Qataq da yaqto' nta'a, huota'a ca npon lcat. Qaq somayi 'eeta'am ca nlom na lli'i ana uva da ÿauo'o ca nhuaxanaguecna, qataq da deÿomaxanataxangui cam 'eeta'am na ndoteec lataxa mayi nachida dam qaica ca 'en'am da lchiquiaxac layiloxo ñi Dios mayi qaica ca ÿaqalanapec.

¹⁶ Qataq somayi so lapo' qataq na ltele'ta nachi nanettalec so l'enaxat, 'eeta': Lta'a na nta'alpi qataq lataxala' na nataxala'pi.

¹⁷ Ime, qaq sela'a so namaxashic piguem l'ec petalec aso nala'. Nachi ÿataqta n'axannec da lÿaxanaxac da iÿaxana 'enauac na maÿopi mayi huaÿotac, hueto'ot na piguem, 'eeta': –Qayalaÿi, qalopoñiÿa't, da yaqto' qaualliquiitau'a ca lta'adaic nqui'axac mayi ÿaqataxanai' ñi Dios,

¹⁸ da yaqto' qolliqui na lapat na nta'alpi, qataq na huataxanaq lta'alpi, qataq nam 'añaxaicpi, qataq na lapat na caipi, qataq nam netalecpi, qataq 'enauac na shiÿaxauapi, nai'ctaxa ca nlatac, huo'otaq sa nlatac, nai'ctaxa ca 'amaqtaqaic, huo'otaq saq 'amaqtaq.

¹⁹ Nachi sela'a som 'ico' da'ail'oc qataq na nta'alpi mayi huetalec ana 'alhua qataq 'enauac na nallippi. Qaq namayipi lapona't, da yaqto' qailogui' som netalec so caaÿo qataq so nallippi.

²⁰ Qaq se'eso shiguiÿac, qalaq qaicoñi', nataq'en so 'eetega l'aqtaxanaxanec ñi Dios mayi i'ottac na n'anecpi mayi sa qaÿauanapega da yaqto' qai'amaqten so shiguiÿac. Qaq chigoqchigui ne'ena n'anecpi se'eso 'eetega da n'aqtaxanaxanec da ÿatenachit nam nashiiteguet aso l'anaxanaqte so shiguiÿac, qataq da ÿi'oxoden so n'enaqtac lqui'i. Qaq se'eso shiguiÿac qataq som 'eetega da n'aqtaxanaxanec, soomayi nachi nca'altrauec qanqoÿin da qaÿasaxayingui so lta'adaic nodec mayi huaña da ÿavictac na quiquiaxadaic.

²¹ Qaq so laÿipi, qalaq 'enauac qaÿalauat, qaidolec so ÿiilonec mayi netaigui na alap som netalec so caaÿo. Nachi 'enauac nam maÿopi ÿataqta comadaxaicpi, souaxat na lapat somayipi.