Apocalipsis 18 - Nuevo Testamento Toba Sur

Da noxonaguec so Babilonia

¹ Qaq can ime de'eda, nachi qaltaq sela'a so lÿa namaxashic piguem l'ec, chigoqtot na piguem. Qaq somayi ÿataqta lta'adaic da l'añaxac. Nachi 'enauac ana 'alhua ÿataqta yi'oqtelec naq'en na l'edaxa.

² Qataq ÿataqta alam da lavilÿaxac, detaqtac, 'eeta': –Mashi noxonec yim lta'adaic la ciudad l'enaxat Babilonia. Mashi noxonec. Qaq yimayi lma' nagui na lamaxashicpi so shiÿaxaua lma'na, qataq nqañoxotaqa' 'enauac na saq cha'a qauemaicpi, qataq laÿoqo' nam maÿopi mayi nshipaxan qataq nqaigaxatpi.

³ Cha'ayi 'enauac nam ÿotta'a't shiÿaxauapi ÿataqta quichigui da nquishishaxac, 'eeta'am da huo'otaq qanÿomaxangui na lataxa. Qataq 'enauac nam nta'alpi mayi ilotague' nam huetalec ana 'alhua ÿataqta nquishistapegue' yimayi, 'eeta'am aca 'alo. Qataq 'enauac nam nmenaxaicpi mayi huetalec ana 'alhua ÿataqta isallaqchit nam qalota lqopitaxanaqtaic yimayi.

⁴ Qataq sa'axaÿa so lÿa n'aqtac, chimqot na piguem, 'eeta': –Qoquiÿa'ai qome ne'ena la ciudad, qami' mayi qami' ÿalamaxatpi, yaqto' sa ishit da qau'ochi nam lli'itaxaloxopi, qataq yaqto' sa ishit da qami' ividaugalo ca nhuaxanaguec.

⁵ Cha'ayi na lli'itaxaloxopi yimayi ÿataqta loguishiguem, ivido'ot na piguem. Qaq ñi Dios mashi tachigui lauel nam qauemsat mayi i'ot yimayi.

⁶ Qaq qaushiichiñiÿa'aguet qome yimayi, ÿataqta qau'enaxachiiteguet da 'eetec naq'en nam laÿipi. Qalaxayi ÿataqta ÿacteec qanqashiñi cam qai'añiim yimayi, 'eeta'am da 'eetec da ÿataqta qauallicñiÿa't na ÿotta'a't qui'aq lataxa, da yaqto' qai'añiim.

⁷ Qataq qauauo'oi qome da nqui'ic qataq da nque'ejnaxac yimayi, ÿataqta qau'enaxachiichigui da 'eetec da ñi'oxonnaxac qataq na qalota lqopitaxanaqtaic. Cha'ayi da lquiyaqteÿaxac naxa yimayi 'eeta': “Aÿim ñiso'ootaña ne'ena, aÿim nate'e. Qaq sa ishit da aÿim pa'ai, qataq sa ishit da huo'o ca ñique'ejnaxac.”

⁸ Qaq nachida da huo'o mshi 'eeta'am da 'oonolec na'a'q qanqoÿin na nhuaxanaguecpi, 'eeta': l-leuaxa, nque'ejnaxac, lqouaxa, qataq qaidolec ca nodec da qaÿavigaxat. Cha'ayi ÿataqta qaica ca ÿaqalanapec ñim qadataxala' Dios mayi ÿauo'o da nhuaxanaguec.

⁹ Qaq nam nta'alpi mayi 'ico' nquishistapegue' yimayi, qataq nhuanau'a nam qalota lqopitaxanaqtaiguesat, namayipi qome ÿataqta noÿiitac, qataq n'alaqtapiguiñi qom ÿauaachigui na lmala'q da navigaqtaguec yimayi.

¹⁰ Qaq ÿataqta qaÿoqteuga qome namayipi, souaxat da ñi'iÿa da nhuaxanaguec yimayi. Nachi namayipi 'eeta': –¡'Agai! ¡Ÿataqta 'am choxodaxaso', 'am mayi ÿataqta 'am lta'adaic Babilonia, 'am mayi qaica ca 'auqalanapec! Cha'ayi ÿataqta qaica ca queuoigui da 'anhuaxanaguec.

¹¹ Qataq nam nmenaxaicpi mayi huetalec ana 'alhua nataq'en ÿataqta noÿiitac, qataq n'alaqtapiguiñi souaxat yi'iyi la ciudad. Cha'ayi nachi qaica ca ishit da deshijnaxana nam lmenec mayi ndotai'.

¹² Nam lli'acpi mayi huo'o na chigaqaigui na oro, plata, qashilgaxadaic coma', perla, qataq na no'on hualoq mayi chigaqaigui na lino, qataq na seda, qataq na imalaqlec da ltogaxa, qataq na togaxadaic; nataq'en 'enauac na ÿotta'a't qo'ipaq ama na laita, qataq nam n'onatac mayi chigaqaigui na marfil, qataq na no'on qo'ipaq, qataq na lcat l'enaxat bronce, hierro, qataq na coma' mármol;

¹³ qataq nam laÿi lli'ac canela, qataq nam ÿotta'a't ama na laita, nchinaxanaxat, qataq na qo'ipaq lcha'q l'enaxat mirra, qataq na codaxat, lataxa, aceite, 'ayiiña, qataq na trigo; nataq'en na shiguiÿacpi mayi nauegaxanaxala', qaguetapi, caipi, naigonapi, qataq na nlatacpi mayi yi'oqchigui shiÿaxauapi.

¹⁴ Qaq da qaitaxaÿa qome yi'iyi la ciudad, qalaq qoÿiita': –¡Qachi mashi imeuo 'enauac na 'adamanecpi, qataq imauec da daqat 'enauac dam 'adsallaxa qataq dam 'adyaquiaxac mayi 'am hueto'ot!

¹⁵ Qaq nam shiÿaxauapi mayi lmenec ne'enapi qataq ÿachigoxotchigui da lsallaxa yi'iyi la ciudad, namayipi ÿataqta qaÿoqteuga, souaxat da ñi'iÿa da nhuaxanaguec yimayi. Nachi ÿataqta noÿiitac qataq n'alaqtapiguiñi.

¹⁶ Nachi 'eeta': –¡Ÿataqta 'am choxodaxaso', 'am mayi 'am lta'adaic la ciudad! 'Am mayi qoneta'am aca 'alo mayi n'otaxat na no'on hualoq. Naua alogo tocalguete na lmalaxa qataq na togaxadaic, qataq na n'otaxat chigaqaigui na oro qataq na qashilgaxadaic coma' qataq ana perlas.

¹⁷ ¡Ÿataqta qaica ca queuoigui da imeuo qanqoÿin dam lta'adaic lsallaxa! Qaq 'enauac na l'opi ana barco, qataq nam nqottauo, qataq nam 'etaxat l'opi, qataq 'enauac nam do'onataxaatac mayi huetangui na 'etaxat, namayipi ÿataqta qaÿoqteuga.

¹⁸ Qaq da ila'a na lmala'q da navigaqtaguec yi'iyi la ciudad, nachi i'alaq, 'eeta': –¿Negue'tom ca lÿa la ciudad da huo'otaq 'eeta'am yim ya' la ciudad?

¹⁹ Nachi namayipi imejleguete naua lqaigo na 'alhua, nachi noÿiitac, qataq n'alaqtapiguiñi, 'eeta': –¡Ÿataqta choxodaxaso' yi'iyi lta'adaic la ciudad! Cha'ayi da lsallaxa nachida da isallaqchit 'enauac nam huo'o ana nbarco. ¡Qalaxayi ÿataqta qaica ca queuoigui da 'am qanlaxajñi!

²⁰ Qalaxayi ÿataqta 'antonec qome yi'iyi la ciudad, 'am piguem, qataq qami' lamaxa'shi so Jesús, qataq qami' l'aqtaxanaxanecpi ñi Dios, qataq 'enauac qami' lalamaxatpi ñimayi. Cha'ayi ñi Dios i'ot da nhuaxanaguec yimayi, souaxat da qoñiita.

²¹ Nachi so 'oonolec namaxashic piguem l'ec mayi ÿataqta qaica ca 'en'am da l'añaxac, somayi ÿacoosop so coma' lta'adaic mayi 'eeta'am na namaicnaxanaxat. Nachi ÿasaxangui aso auaxai, nachi 'eeta': –'Eda qome da 'eetec da qaÿasaxañi yi Babilonia, yim ÿataqta lta'adaic la ciudad. Nachi sa ishit qome da qanauanapegue' da qaltaq qailogui.

²² Huaña qome, nachi sa ishit da qai'axaÿapega da huetangui na 'anqa'aicpi aca nvique arpa qataq ana nashiide l'enaxat flauta qataq ana trompeta. Nachi sa ishit da huo'o ca camachaqca 'onataxanaxaic, qataq sa ishit da qai'axaÿapega ca l-lamaxa aca namaicnaxanaqte coma'.

²³ Qataq sa ishit da 'edoigui ana 'adcoÿadaxanaxaquipi, qataq nachi sa ishit da qai'axaÿa ca laÿac cam huadona't, qaq nai'ctaxa da na 'admenaxanaxanecpi co'ollaxa ndoteec na 'añaxaicpi mayi huetalec ana 'alhua, qataq ÿataqta 'auatenachit 'enauac co'ollaxa na ÿotta'a't shiÿaxauapi da 'audolec da 'ayi'iyaqnataxanaxac.

²⁴ Cha'ayi yi'iyi la ciudad nachi huaña da qailalec na ltago'q nam i'axatta'pe co'ollaxa na l'aqtaqa ñi Dios, qataq nam lalamaxatpi ñimayi, qataq 'enauac nam qaÿalauatpi mayi hualec ana 'alhua.