Apocalipsis 17 - Nuevo Testamento Toba Sur

Da nhuaxanaguec aso 'alo mayi ÿataqta quishiguetaxai

¹ Nachi so 'oonolec soua siete namaxa'shi piguem lashi' mayi lasoqta'alo soua siete ÿomaxaqui', somayi anac. Nachi aÿim 'enapega, 'eeta': –'Ayala, ñaq 'am sachaxana da nhuaxanaguec añim 'alo mayi ÿataqta quishiguetaxai mayi nso'ootalec na qalota 'etaxat.

² Qaq na nta'alpi mayi ilotague' nam huetalec ana 'alhua, namayipi ÿataqta nquishistague' añimayi. Qaq nam huetalec ana 'alhua, qalaq ÿataqta quichigui da nquishishaxac, 'eeta'am da huo'otaq qanÿomaxangui na lataxa.

³ Qaq can ñaq sootaigui se'eso ÿauanaqchic mayi aÿim ÿanem so Espíritu Santo, nachi se'eso namaxashic aÿim ÿauega so tojlec 'alhua. Huaña somayi, nachi sela'a aso 'alo netalec so shiguiÿac togaxadaic mayi nanettalec 'enauac na l'oc na n'enaxatpi mayi ÿataqta npa'aguene' ñi Dios. Qaq somayi siete na lqaicpi, qataq diez ana lcouepi.

⁴ Qaq asa'aso 'alo da l'oguiaxac naua alogo, qalaq tocalec na lmalaqa' qataq na togaxadaic. Qataq na n'otaxatpi ndoteec na chigaqaigui na oro qataq na qashilgaxadaic coma' qataq ana perla. Qaq asomayi lasoqta'a aso ÿomaxaqui mayi chigaqaigui na oro. Qaq asa'aso ÿomaxaqui ÿataqta nlaqchigui nam i'ot da nqaigaxa qataq nam 'ico' lshipaxanaxa dam nquishishaxac.

⁵ Qataq asomayi nanettalec na latap so n'enaxat mayi saq cha'a ca naigui. 'Eeta': “Nam ÿataqta 'amaqtaqaic Babilonia, nachana ana late'e ana quishiguetaxaipi qataq 'enauac nam i'ot da nqaigaxa mayi huetalec ana 'alhua.”

⁶ Qaq can ime, nachi aÿim ñanoma da asa'aso 'alo taxai. Asomayi itaqchit na ltago'q nam lalamaxatpi ñi Dios qataq nam qaÿalauatpi souaxat da i'axattac so Jesús. Qaq can sauaachigui de'eda, nachi ÿataqta huo'o da i'aalaxa.

⁷ Nachi som namaxashic aÿim 'enapega, 'eeta': –¿Tá'ainco' yi ÿataqta huo'o da 'ad'aalaxa? Nagui 'am sa'axatem dam naigui saq cha'a añi'añi 'alo qataq yim shiguiÿac mayi netalec, yim siete na lqaicpi qataq diez ana lcouepi.

⁸ Yi'iyi shiguiÿac mayi 'auauaachigui, yimayi co'ollaxa nca'altauec, qalaxayi nagui mashi saqca. Qalaxayi yimayi qaltaq nnoxooshiguem qome da chigaqaña cam laponqa' na leuaxaicpi, qom mashi yaqta'a da ivita ca ÿoqta loga't. Huaña qome, nachi nam huetalec ana 'alhua nam sa ishit da qoÿittau'a acam lmalate nam qanca'alaxateecpi co'ollaq saxanaqaca ana 'alhua, nachi namayipi ÿataqta huo'o da l'aalaxa qom ÿauaachigui se'eso shiguiÿac mayi nca'altauec co'ollaxa, qalaxayi mashi saqca, qalaxayi qaltaq ÿi'iguelaxalec qome da nca'aleec.

⁹ Qaq de'eda sa'axat nagui, damayi iuen ca naÿajnec, da yaqto' qaÿaÿaten: Da ne'enaua siete lqaigo, naamayi naiguilo naua siete lcomadaxalatel mayi nso'ootalguete añi'añi 'alo.

¹⁰ Qataq nataq'en ne'enaua nqaigo, naamayi nachi naiguilo naua siete nta'al. Qaq cinco soua mashi qaicaua ne'ena nta'alpi. Qaq 'oonolec nagui ñi ña do'onataxaatac. Qaq que'eca lÿa, qalaq ñaq natai'. Qaq qom nvi' cam pa'ateec, qalaq saqaÿaloq qome da imeuo.

¹¹ Qaq se'eso shiguiÿac mayi nca'altauec co'ollaxa, qalaxayi mashi saqca somayi, nachiso som pa'ateec qominchiyi nam nta'alpi. Qalaxayi somayi nachiso som maichi 'oonolec nam siete nta'al. Qaq qom ime, nachi somayi ivita ca ÿataqta loga't.

¹² Qaq se'esoua diez lcoue mayi 'auauaachiguilo, soomayi naiguilo caua diez nta'al mayi saxanaxa da do'onataxa'n da nta'al. Qalaxayi caamayi ÿacongueta qome da lamaxasoxonaxa'c da nta'al, nataq'en so shiguiÿac, qalaxayi ivi' una hora.

¹³ Qaq que'eca diez nta'alpi ÿataqta 'oonolec qome da lhuennataxa, nachi ÿanem da l'añaxac qataq da lamaxasoxonaxac da yaqto' lataxala' ca shiguiÿac.

¹⁴ Qaq namayipi delogui' qome so qagueta llalec. Qalaxayi somayi loxonec qome namayipi, cha'ayi somayi nachiso so lataxala' na nataxala'pi qataq lta'a na nta'alpi. Qataq na hueta'aguetpi somayi nachina nam ÿataqta qaiÿaxana qataq lca'aguishicpi ñi Dios. Qataq namayipi quetague' somayi.

¹⁵ Nachi so namaxashic qataq aÿim 'enapega, 'eeta': –Ne'ena qalota 'etaxat mayi 'aulota'a, nam nso'ootelec añi'añi 'alo mayi quishiguetaxai, namayi nachina na ÿotta'a't shiÿaxauapi mayi ÿotta'a't na l'aqtacpi.

¹⁶ Qaq ana'ana diez lcouepi mayi 'auaachigui se'eso shiguiÿac, anamayipi qome ÿataqta nquiÿa qome añi'añi quishiguetaxai. Nachi ÿataqta qaÿalata'a't, qataq qaÿachitauec, qataq qanallic na lapat, qataq qaÿasaxangui ca nodec da qaÿavigaxat.

¹⁷ Qaq nachiñi ñi Dios ñi ÿachanguita naua lquiyaqte namayipi da i'ot cam 'eetapeguec ñimayi, da namayipi 'oonolec naq'en lhuennataxac, da yaqto' ÿanagui da lamaxasoxonaxac da nta'a som shiguiÿac, chochi ivitta'a da ipacchigui 'enauac nam detaxaÿa ñi Dios.

¹⁸ Qaq asa'aso 'alo mayi 'auauaachigui, nachiyi yim la ciudad lta'adaic mayi ilo'ogue 'enauac nam nta'alpi mayi huetalec ana 'alhua.