Apocalipsis 16 - Nuevo Testamento Toba Sur

Asom 'ico' ÿomaxaquipi mayi huetaguilo naua lhuaxanaxanaxaco ñi Dios

¹ Nachi sa'axaÿa so nvilÿaxac ÿataqta alam, chigoqtoigui aso n'onaxanaxaqui da 'eetega som siete namaxashic piguem l'ecpi, 'eeta': –Qauesomiÿa qome, qaucoyiilec ana 'alhua nam siete 'ico' ÿomaxaqui' mayi huetaguilo nam qaica ca 'en'am da lchiquiaxac lhuaxanaxanaxaco ñi Dios.

² Nachi jec som hua'auchiguiñi namaxashic da icodelec ana 'alhua. Nachi 'enauac na shiÿaxauapi mayi huo'o ana n'anaqte mayi chigoqo'ot so shiguiÿac qataq natameetacot som n'enaqtac lqui'i, nachi namayipi nashiguem na l'oc na ÿataqta saq maxata lquesaxa qataq ÿataqta qui'aq.

³ Qataq jec so lÿa namaxashic da icodelec aso auaxai. Nachi nam l'ec 'etaxat aso auaxai, nachi nañigui na 'eeta'am na ltago'q na leuaxaic. Nachi ileu 'enauac nam huo'o da lca'alaxa mayi huetaigui na 'etaxat.

⁴ Qataq jec so lÿa namaxashic da icodelec anam talapi qataq anam npaxaatashiguem na l'ec. Nachi nataq'en na 'etaxat nañigui na ntago'q.

⁵ Ime, qaq sa'axaÿa som namaxashic mayi ilotague' na 'etaxat, 'eeta': –Ÿataqta ÿaÿamaqchiguiñi de'eda 'au'ot 'adhuaxanaxanaxac, 'am qadataxala' Dios mayi 'am qui'itta, 'am mayi 'au'onataxaatac nagui qataq nachi'am l'atchiguiñi.

⁶ Cha'ayi 'anÿomaxangui na ntago'q namayipi, qaq damayi ÿataqta 'itchiguiñi, cha'ayi namayipi icodaxatreec co'ollaxa naua ltago'q nam 'adalamaxatpi qataq nam i'axatta'pe naua 'ad'aqtaqa.

⁷ Nataq'en huo'o so sa'axaÿa chimaqteu'a aso nca'atoxonaxalate, 'eeta': –Aja', 'am qadataxala' Dios mayi qaica ca 'auqalanapec, 'am ÿataqta 'eesoda naua 'adhuaxanaxanaxaco qataq n'oiteguelo.

⁸ Qataq jec so lÿa namaxashic piguem l'ec da icodelec aso nala'. Nachi qoÿami' aso nala' da l'añaxac, da yaqto' na l'edaxa ishit da ÿavigaxat na shiÿaxauapi.

⁹ Nachi ÿataqta sa l'axaic da ÿavic 'enauac na shiÿaxauapi. Qalaxayi namayipi sa ishit da ÿaxaadeec naua n'onataxaco, qataq sa ishit da ÿi'oxoden ñi Dios. Chaqdata da ÿataqta ishiueetac ñimayi, ñim ishit da ÿamaqa'pe ne'enaua napaxaco.

¹⁰ Qataq jec so lÿa namaxashic da icodelec so nso'onqa' so shiguiÿac, nachi 'enauac nam ilotague' somayi ÿataqta napanñi. Nachi na shiÿaxauapi ÿataqta inaiguilo naua lachaqa'te, souaxat da nqui'ic.

¹¹ Qalaxayi namayipi nachi 'en'am sa ishit da ÿaxaañi na qauempi mayi i'ottac. Nachaqdata da ÿataqta ishiueetac ñi Dios mayi neto'ot na piguem, souaxat da nqui'ic qataq na lquesaxa.

¹² Qataq jec so lÿa namaxashic da icodelec so lta'adaic tala, l'enaxat Éufrates. Huaña, nachi 'im na l'ec 'etaxat se'eso tala, da yaqto' ÿauategue na llic so nta'alpi mayi chigaqa'ague da nala' lliguishiguem.

¹³ Huaña, nachi sauaachigui na alap so 'ico' da'ail'oc, qataq som shiguiÿac, qataq som 'eetega da l'aqtaxanaxanec ñi Dios, da chigoqtoiguilo soua n'eco leguemaxaiqa, 'eeta'ama ana miÿo.

¹⁴ Qaq soomayi nachisoua soua lamaxa'shi so Satanás mayi i'ottac na n'anecpi mayi i'ot da n'aalaxa. Qaq soomayi huenoxoodeec, da yaqto' laÿona't 'enauac na nta'alpi mayi huetalec ana 'alhua, da ÿaqataxaatai' da deloqui que'eca na'a'q mayi lvidaxaqui da ÿauo'o ca nhuaxanaguecna ñim Dios mayi qaica ca ÿaqalanapec.

¹⁵ “Qaq ña qauloÿa, aÿim ñanac qom sa ishit da aÿim qaÿauotaique, shiita'am ca cachaxaic. Qaq ÿataqta machiguiñi qome cam nlotauec qataq cam ntela'alo caua alogo, da yaqto' sa ishit da huetauec, nachi na shiÿaxauapi ishit da ilogui da l'oquiaxac.”

¹⁶ Nachi se'esoua n'eco leguemaxaiqa lapona't na nta'alpi da laponqa' naq'en so 'alhua mayi na hebreo l'aqtaqa l'enaxat Harmagedón.

¹⁷ Qataq jec so pa'ateec soua siete namaxa'shi piguem lashi' da icodelec na pa'ashiguem. Huaña, nachi chigoqtoigui aso n'onaxanaxaqui piguem lashi so n'aqtac, ÿataqta alam, chigoqchiguiña so so'onqa', 'eeta': –Mashi sogote da ime.

¹⁸ Nachi huo'o so nqashilgaxa, nlamaxa, qataq so nalataxa. Nachi ana 'alhua ÿataqta cholaxan, huo'o so lta'adaic nacholaxanaxa. Qaq somayi ÿataqta napacalec 'enauac nam nacholaxanaxapi mayi huo'o co'ollaq chita'ague da huo'o na shiÿaxauapi ana 'alhua.

¹⁹ Nachi so lta'adaic la ciudad colaxagui, somayi tres soua lpoxoÿaqa'te. Nachi 'enauac nam la ciudatpi mayi huetalec ana 'alhua hualolaguiñi. Huaña, nachi ñi Dios iuennate som lta'adaic la ciudad Babilonia, da yaqto' nÿomaxangui dam qaica ca 'en'am da lchiquiaxac lhuaxanaxanaxac mayi ÿaqataxaatapigui' da icodeec layiloxo.

²⁰ Nachi 'enauac ana delecpi qataq ana comadelecpi imeuo.

²¹ Nataq'en anac aso late'edai lachi da talec na shiÿaxauapi. Añi 'oonole asomayi ivi' cuarenta kilos. Qalaxayi so shiÿaxauapi ÿataqta ishiueetac ñi Dios, souaxat aso lachi, cha'ayi ÿataqta lta'adaic de'eda nhuaxanaxanaxac.