Apocalipsis 15 - Nuevo Testamento Toba Sur

Som siete namaxashicpi mayi ÿachitac soua pa'atreec napaxaco

¹ Qataq sela'a so lÿa lta'adaic n'anec mayi ÿataqta i'ot da n'aalaxa, huo'ot na piguem. Somayi 'eeta': So siete namaxashic piguem l'ecpi ÿachita'pe soua pa'atreec napaxaco mayi ÿachaxan ca pa'ateec layiloxo ñi Dios.

² Nataq'en sela'a so 'eeta'am na 'etaxat ÿataqta chauec. Qaq somayi ÿalecta'aguet na nodec. Qataq som shiÿaxauapi mayi sa ishit da nañanot da ÿi'oxoden so shiguiÿac qataq som n'enaqtac lqui'i, qataq sa ishit da n'angui yim ivi' da l'enaxat, qaq somayipi nachattañi, hueto'ot na loigue se'eso 'etaxat mayi ÿataqta chauec. Qaq lasoqta'a ana lviquepi mayi ÿami' ñi Dios.

³ Nachi somayipi i'ootac som l'onec so Moisés som lamaxashic ñi Dios qataq som n'onec da qaÿi'oxoden so qagueta llalec mayi 'eeta': Ÿataqta lta'adaic qataq ÿi'oxodaq 'enauac nam 'au'otpi, 'am qadataxala' Dios mayi qaica ca 'auqalanapec. Ÿataqta ÿashictreec qataq 'eesoda nam 'anqa'aico, 'am mayi 'am lataxala' nam ÿotta'a't shiÿaxauapi.

⁴ Qaq ¿negue'tom cam sa ishit da saq huo'o ca 'enec naq'en 'am, 'am qadataxala'? Qataq ¿negue'tom ca saq 'am ÿi'oxoden? Cha'ayi nachaq'amta da 'am qui'itta, qaq 'enauac qome na ÿotta'a't shiÿaxauapi anac da 'am ÿi'oxoden. Cha'ayi ÿataqta qaÿauaachigui da sa ishit da 'anpe'enai' da 'anmit ca lataxac.

⁵ Qaq can ime de'eda, qaltaq ñamatashiguem. Nachi sela'a aso n'onaxanaxaqui piguem lashi da nauatoigui som huetaiguilo soua coma'yi mayi nanettalguete soua lqataxaco ñi Dios.

⁶ Qaq asa'aso n'onaxanaxaqui nachi chigoqtoiguilo soua siete namaxa'shi piguem lashi' mayi ÿachita'pe soua siete napaxaco. Qaq somayipi naua alogo chigaqaiguilo na lino, qataq ÿataqta qashile'c, qataq huo'oi naua lasot alaxa mayi chigaqaigui na oro, naguelguete naua ltogue.

⁷ Nachi so 'oonolec soua cuatro shiguiÿac, somayi ÿami' ñi 'oonolec somayipi ana 'ico' ÿomaxaqui mayi chigaqaigui na oro. Qaq asa'aso ÿomaxaquipi ÿataqta nlaqchigui nam qaica ca 'en'am da lchiquiaxac lhuaxanaxanaxac ñi Dios ñim chochaq tatreec naua na'axa'te da nachaalataxac.

⁸ Nachi se'eso lma' soua nqataxaco, somayi ÿataqta nlaqchigui na lmala'q mayi chigaqaigui dam l'amaqchic qataq da l'añaxac ñi Dios. Huaña, nachi sa ishit da huo'o ca ishit da inoxoneu'a se'eso ndaqa' da saxanaxa da imeueegue se'esoua siete napaxaco mayi ÿachitac soua siete namaxa'shi piguem lashi'.