Apocalipsis 14 - Nuevo Testamento Toba Sur

Da l'onec som 144,000 shiÿaxauapi

¹ Qaq can ime, nachi qaltaq ñamatashiguem, nachi sela'a so qagueta llalec petalec aso qasoxonaxa l'enaxat Sión. Qaq somayi nachi hueta'aguet som ciento cuarenta y cuatro mil shiÿaxauapi mayi qoÿittalec na latap da l'enaxat som qagueta llalec qataq da l'enaxat ñi lta'a Dios.

² Ime, qaq sa'axaÿa so nlamaxa chimqot na piguem. Somayi 'eeta'am na l-lamaxa na lta'adaic l'auaxac, qataq 'eeta'am na nalataxa, qataq 'eeta'am na l-lamaxa ana qalota nviquepi da qaivictapigui.

³ Nachi i'ootac somayipi so dalaxaic n'onec, datatau'a ca nso'onqa' ñi Dios, qataq soua cuatro shiguiÿac, qataq som nquedoxonecpi. Qaq qaica ca ishit da ÿaÿaten se'eso n'onec, nachaqsota se'eso ciento cuarenta y cuatro mil mayi qaÿachigoxottoigui co'ollaxa nam shiÿaxauapi mayi huetalec ana 'alhua da qanca'alaxateec.

⁴ Qaq somayipi nachiso som sa ishit da ÿauana aca 'alo, qaq ÿataqta qui'itta. Qataq somayipi nachi ca'attapiguiñi' som qagueta llalec cam dataigue. Somayipi qaÿachigoxottaigui co'ollaxa na shiÿaxauapi mayi huetalec ana 'alhua da qanca'alaxateec, 'eeta'am qanqoÿin aca l'auaxana nachitaqtaxanaqte da qoÿanot ñi Dios qataq so qagueta llalec.

⁵ Qataq somayipi ÿataqta sa ishit da nauane' da nauoigui na alap ca latenataxanaxac. Qaq ÿataqta qui'itta somayipi, ÿoqo'oyi hueta'a cam nso'onqa' ñi Dios.

Da l'aqtaxanaxa'c soua tres namaxa'shi piguem lashi'

⁶ Ime, qataq sela'a so lÿa namaxashic piguem l'ec, huaÿotac, hueto'ot na piguem, ÿachitac so n'aqtaxanaxac mayi qaica ca loga't mayi chigaqaigui da nca'alaxa, da yaqto' da'aqtaxanem 'enauac nam netalec ana 'alhua ÿotta'a't shiÿaxauapi mayi ÿotta'a't na l'aqtacpi.

⁷ Nachi somayi ÿataqta n'axannec da l'aqtac, 'eeta': –Ÿataqta huo'o naq 'enec qome qanqashiñi ñi Dios, qataq qavi'oxoyiñi, cha'ayi mashi ivita yi laloqo' da ñimayi nmit na nasouaxashitpi. Qaq qavi'oxoyiñi qome ñim l'onatac na piguem, qataq ana 'alhua, qataq aso auaxai, qataq anam lapelpi mayi npaxaatashiguem na l'ec.

⁸ Qataq ca'attaueegue so lÿa namaxashic, detaqtac, 'eeta': –Mashi noxonec yi lta'adaic la ciudad l'enaxat Babilonia, mashi noxonec, cha'ayi yimayi ÿaueeguet 'enauac nam ÿotta'a't shiÿaxauapi da nquishishaxac, 'eeta'am da huo'otaq nÿomaxangui na lataxa.

⁹ Qataq ca'attalec so lÿa namaxashic, nataq'en ÿataqta n'axannec da l'aqtac, 'eeta': –Ca ÿi'oxodeetac ñi shiguiÿac qataq so n'enaqtac lqui'i, qataq da huo'otaq ÿauo'o aca n'anaqte na latap, huo'otaq na lhuaq,

¹⁰ nachi camayi nÿomgui qome dam qaica ca 'en'am da lchiquiaxac lhuaxanaxanaxac ñi Dios, qom ivita da icodeec dam ÿaqataxaatapigui' layiloxo mayi 'eeta'am ca ndoteec lataxa. Nachi camayi ÿataqta nque'etaxangui qome da lqui'ic ca nodec qataq nam quiquiaxadaic mayi ÿavictaigui. Qaq ÿauaachigui qome nam lamaxashicpi ñi Dios qataq so qagueta llalec.

¹¹ Nachi chochaq tatreec naua na'axa'te qataq pesa'chi da nchitapiguishiguem da nhuaxanaguec nam ÿi'oxodeetac som shiguiÿac qataq som n'enaqtac lqui'i, huo'otaq da n'angui da l'enaxat. Nachi ÿataqta qaica ca nmataxac.

¹² Qaq ÿoqo'oyi iuen da ÿataqta ÿauo'o da lhualaxavic nam lalamaxatpi ñi Dios mayi ÿalaxalguete naua lqataxaco ñimayi qataq quetague' so Jesús.

¹³ Ime, nachi sa'axaÿa so n'aqtac chimqot na piguem, aÿim 'enapega, 'eeta': –'Iyiñi qome da 'eeta': “Ÿataqta machiguiñi qome nagui ca ileu da huo'otaq ileutañi' da l'amqajnataxanaxac so qadataxala'.” Nachi so Espíritu Santo 'enapec: “Aja', nachi 'eetec.” Cha'ayi camayi nmateeguesop nam l'onataxanaxacpi. Qaq da l'onataxanaxac, qalaxayi sa ishit qome da qaicoua'ai.

Da nqataxanaxac mayi hualec ana 'alhua

¹⁴ Ime, qaltaq ñamatashiguem, nachi sela'a so l'oc lapagaxaic, qaq se'eso l'oc nso'ootalec so 'eeta'am na llalec na shiÿaxaua. Somayi ÿaatañi aso nado'o nta'a mayi chigaqaigui na oro, qataq lasoqta'a so lpetegaxanaxat ÿataqta ÿaxadaic.

¹⁵ Qataq chigoqtoigui aso n'onaxanaxaqui so lÿa namaxashic piguem l'ec. Nachi ÿataqta n'axannec da lavilÿaxac da 'enapega som nso'ootalec so l'oc, 'eeta': –'Auquesoxoñi na 'adpetegaxanaxat. Ime, qaq 'auqataxan. Cha'ayi mashi ivita yi naloqnec da qanqat na nanguishic ala mayi huetalec ana 'alhua, cha'ayi mashi ÿi.

¹⁶ Nachi som nso'ootalec so l'oc nachi iquesoxoñi so lpetegaxanaxat, da yaqto' nqat ana ala na nanguishic mayi huetalec ana 'alhua.

¹⁷ Ime, qaltaq anac so lÿa namaxashic piguem l'ec, chigoqtoigui aso n'onaxanaxaqui piguem lashi. Qaq somayi nataq'en ÿachitac so lpetegaxanaxat ÿataqta ÿaxadaic.

¹⁸ Qataq nnoxoneec so lÿa namaxashic piguem l'ec chigoqtelec aso nca'atoxonaxalate. Somayi nachiso so ishit da ÿamaqpec na nodec. Qaq somayi ÿataqta n'axannec da l'aqtac da iÿaxana som lasoqta'a so lpetegaxanaxat, 'eeta': –Ña 'auquesoxoñi na 'adpetegaxanaxat mayi ÿataqta ÿaxadaic. Ime, qaq 'alapona't ana ltaxale ana uva mayi huetalec ana 'alhua. Cha'ayi mashi ivita yi laloqo' da qanqat, cha'ayi mashi ÿataqta ÿita.

¹⁹ Nachi se'eso namaxashic piguem l'ec, somayi iquesoxoñi so lpetegaxanaxat da nqat ana ala ana uva mayi huetalec ana 'alhua. Ime, nachi ÿasaxaigui so lta'adaic laponaxaqui, da yaqto' qanlom na lli'i. Qaq damayi nachi naigui dam qaica ca 'en'am da lchiquiaxac lhuaxanaxanaxac ñi Dios.

²⁰ Qaq asa'aso uva, can qanlom na lli'i, qalaq huaña qanqoÿin som pa'aueegue da laÿi yi la ciudad. Nachi se'eso naponaxanaxaqui chigoqtoigui na ntago'q. Qaq ne'ena ntago'q ividashiguemque naua lquejnaxanqa'te na caipi. Qaq yi lcachiguiñi se'eso ntago'q ivi' trescientos kilómetros.