Apocalipsis 13 - Nuevo Testamento Toba Sur

Soua dos shiguiÿac

¹ Ime, nachi aÿim sooto'ot na loigue aso auaxai. Nachi sauaateguet so shiguiÿac lta'adaic, chigoqchiguingui aso auaxai. Qaq somayi siete na lqaicpi, qataq diez ana lcouepi. Qaq añi 'oonole ana lcouepi ÿaatañi ana nado'o na nta'a. Qaq ñi 'oonolec naua lqaigo, qalaq huetalguete naua l'enqa'te mayi ÿataqta npa'agueneto ñi Dios.

² Qaq se'eso shiguiÿac mayi sauaachigui, somayi da lataxac 'eeta'am na quiyoc. Qaq naua lchil, qalaq 'eeta'am ana potai. Qaq na alap, qalaq 'eeta'am na león. Nachi se'eso shiguiÿac mayi 'ico' da'ail'oc ÿanem da l'añaxac somayi, qataq aso nso'onaxaqui na nta'a, qataq ÿataqta lta'adaic na namaxasoxonaxacpi ÿanem.

³ Qaq so 'oonolec nam lqaicpi se'eso shiguiÿac 'eeta'am da huo'o so lque'emaxa mayi ishit da qanlem. Qaq se'eso lque'emaxa qanataden, nachi 'enauac nam huetalec ana 'alhua ÿataqta huo'o da l'aalaxa. Huaña, nachi qanayiigue se'eso shiguiÿac.

⁴ Huaña, nachi qaÿi'oxoden se'eso shiguiÿac mayi 'ico' da'ail'oc, cha'ayi souaxat da ÿanem da damaxasoxonapec se'eso lÿa shiguiÿac. Qaq nataq'en qaÿi'oxoden se'eso shiguiÿac, qoÿiita': –¿Negue'tom ca ishit da 'en'am ñi'iñi shiguiÿac? qataq ¿negue'tom ca ishit da delogui' ñimayi?

⁵ Qaq nataq'en qaÿashiitem da se'eso shiguiÿac ishit da nasaxadeec naua n'aqtaqa mayi ÿataqta qauema qataq npa'agueneto ñi Dios. Qataq somayi qoÿanem da ividaxattreec caua cuarenta y dos ca'agoxoiqa da damaxasoxonapec.

⁶ Qaq 'eda da 'eetec somayi co'ollaq detaqa. Nachi ÿataqta ishiuen da l'enaxat ñi Dios, qataq ñi lauo', qataq 'enauac nam neto'ot na piguem.

⁷ Nataq'en qaÿashiitem se'eso shiguiÿac da yaqto' iloquiaxan 'enauac nam lalamaxatpi ñi Dios, ivitta'a da 'enauac loxonec, qataq da l'añaxac da yaqto' maichi ÿoiqueetac 'enauac nam ÿotta'a't shiÿaxauapi mayi ÿotta'a't na l'aqtacpi.

⁸ Nachi se'eso shiguiÿac ÿataqta ÿi'oxodeetac 'enauac nam huetalec ana 'alhua, nam sa ishit da nanettau'a aso nanedaxalate nam lca'alaxaicpi co'ollaq chita'ague da qai'ottac ana 'alhua, asom hueto'ot so qagueta llalec mayi qaÿalauat co'ollaxa.

⁹ Qaq ca ÿaÿaten da n'axaÿaxanaxac, qaq no'on da ÿataqta n'axaÿaxaachiguiñi.

¹⁰ Ca ÿauec ca lÿa da icoñi', qaq camayi nataq'en qaicoñi'. Qataq cam huota'a ca lainec da dalaataxan, qaq camayi nataq'en qaÿauota'a ÿiilonec da qaÿalauat. Qaq ÿoqo'oyi nam lalamaxatpi ñi Dios iuen da ÿauo'o da lhualaxavic qataq da lpi'iÿaxac.

¹¹ Ime, qataq sela'a so lÿa shiguiÿac. Somayi chigoqtoigui ana 'alhua. Qaq somayi dos soua lcoue, 'eeta'am na qagueta llalec. Qalaxayi naua l'aqtaqa 'eeta'am ca shiguiÿac mayi 'ico' da'ail'oc.

¹² Qaq somayi ÿataqta imatta't 'enauac da l'añaxac som hua'auchiguiñi shiguiÿac. Qaq imeteetac naq'en somayi. Huaña, nachi 'enauac ana 'alhua qataq na huetalec anamayi ÿi'oxoden naq'en som hua'auchiguiñi shiguiÿac mayi qanataden so lque'emaxa mayi ishit da qanlem.

¹³ Nataq'en i'ot na n'anecpi mayi i'ot da n'aalaxa, ivitta'a da chigoqo'ot naq'en na piguem na nodec da talec ana 'alhua. Qaq ÿauaachigui naq'en 'enauac na shiÿaxauapi.

¹⁴ Qaq chigoqchigui ne'ena i'ot n'anecpi mayi i'ot da n'aalaxa mayi qaÿashiitem da i'ot da ÿauaachigui naq'en som hua'auchiguiñi shiguiÿac, da yaqto' ÿatenachit 'enauac nam huetalec ana 'alhua. Nachi damaxasoxoolec da qai'ot ca n'enaqtac lqui'i se'eso shiguiÿac mayi huo'o co'ollaxa so lque'emaxa ÿiilonec lliguiñi, qalaxayi ñaqaiyita ishit da nca'aleec.

¹⁵ Nachi se'eso ÿaqa'aguet shiguiÿac, somayi qoÿanem da n'añaxac, da yaqto' ishit da nca'aleec naq'en som n'enaqtac lqui'i som hua'auchiguiñi shiguiÿac, da yaqto' se'eso n'enaqtac ishit da detaqa, qataq 'enauac nam sa ishit da ÿi'oxoden asomayi, qalaq ishit da qaÿalauat naq'en.

¹⁶ Qaq nataq'en sa ishit da nachaqdata de'eda. Cha'ayi asomayi nataq'en ÿamaxalec da 'enauac nam saq 'amaqtaqpiolec qataq nam 'amaqtaqaicpi, sallaxanecpi qataq nam choxodaqpi, qataq nam sa nlatacpi qataq nam nlatacpi, da yaqto' qaÿauo'o aca n'anaqte na lhuaq aloic, huo'otaq na latap.

¹⁷ Huaña, nachi sa ishit da huo'o ca deshijnaxana qataq da huo'o ca imen cam sa ishit da huo'o aca n'anaqte, huo'otaq cam l'enaxat som shiguiÿac, huo'otaq yi ivi' so l'enaxat.

¹⁸ Qaq de'eda iuen ca naÿajnec. Qaq ÿoqo'oyi cam huo'o na ÿaÿaten, qaq no'on da naloqna't yi lcata ca naigui da l'enaxat se'eso shiguiÿac. Cha'ayi damayi naigui da l'enaxat ñi shiÿaxaua. Qaq yi lcata de'eda n'enaxat ivi' seiscientos sesenta y seis.