Apocalipsis 12 - Nuevo Testamento Toba Sur

Aso 'alo qataq so shiguiÿac 'ico' da'ail'oc

¹ Nachi qaltaq yi'oq so lÿa n'anec, hueto'ot na piguem, 'eeta': Aso 'alo nachattaigui aso nala', 'eeta'am da lapo'. Qaq so ca'agoxoic, qalaq petalec. Qaq asomayi ÿaatañi aso nado'o na nta'a. Qaq asa'aso ado'o netaguilo soua doce huaqajñi.

² Qaq asa'aso 'alo, asomayi hualaxai. Qaq ÿataqta dachitattac, nachi i'alaqtac, souaxat da huotaique da deco'o.

³ Ime, qataq yi'oq so lÿa n'anec, huo'ot na piguem, 'eeta': Sa lta'adaic shiguiÿac 'ico' na da'ail'oc da lataxac. Qaq somayi togaxadaic, qataq siete na lqaicpi, qataq diez aso lcouepi. Qaq ñi 'oonolec nam lqaicpi ÿaatañi ana nado'o na nta'a.

⁴ Qaq na l'adaxashit somayi ÿaualgaxaalec ana huaqajñipi mayi neto'ot na piguem. Nachi ÿanataxajlec naq'en ana 'alhua añi 'oonole naua tres anam huaqajñipi. Qaq se'eso shiguiÿac 'ico' da'ail'oc, somayi nachattot asa'aso 'alo mayi huotaique da deco'o, da nshitaique da chic se'eso llalec da chochi ñiguiñi.

⁵ Qaq asa'aso 'alo ñiguiñi so llalec ÿale, som qaÿauotaique da nta'a, da yaqto' ilo'ogue 'enauac nam ÿotta'a't shiÿaxauapi, huota'a ca lamaxasoxonaxat lcat. Qalaxayi se'eso llalec, somayi qaiuotaxanec, nachi qaida'a ca nso'onqa' ñi Dios.

⁶ Qaq asa'aso 'alo, qalaq datauec, taÿa cam tojlec 'alhua, cam ÿaqataxaatapigui' ñi Dios da huotaique lma' asomayi, da yaqto' asomayi qaiqui'axaatac, chochi ivittraue'c caua mil doscientos sesenta na'axa'te.

⁷ Ime, nachi huo'o so lta'adaic loquiaxac, huo'ot na piguem, cha'ayi so lataxala' na namaxashic piguem l'ecpi, l'enaxat Miguel, qataq 'enauac so nallippi, qailoctague' so shiguiÿac mayi 'ico' da'ail'oc. Qaq se'eso shiguiÿac qataq na nallippi ÿataqta deloctac,

⁸ qalaxayi somayi sa ishit da dauegaxan. Nachi somayi qataq so nallippi qaica ca lma' na piguem.

⁹ Qaq 'eda da 'eetec co'ollaq qaÿamaqhuec se'eso 'ico' da'ail'oc. Qaq somayi nachiso so n'adaxanaq mayi l'atchiguiñi da datenataxan, l'enaxat Satanás, som shiÿaxaua mayi lma'na. Qaq somayi qataq 'enauac so nallippi qai'odalec ana 'alhua.

¹⁰ Nachi sa'axaÿa so n'aqtac ÿataqta alam, chimqot na piguem, 'eeta': –Mashi nvi' da nca'alaxa, qataq da n'añaxac, qataq da l'onataxanaxac da ilo'ogue 'enauacna ñi qadta'a Dios, qataq da lamaxasoxonaxac som namaq nta'a nca'alaxaqui. Cha'ayi mashi qaÿamaqhuec som ÿasaqtapeguelec na lasouaxashit na qadqaÿañicpi som na'axa'tesa'chi qataq pesa'chi da ÿi'iguelaqtau'a ca netaña ñi qadta'a Dios.

¹¹ Cha'ayi na qadqaÿañicpi loxonec somayi, qaÿachigoqchiguilo naua ltago'q so qagueta llalec, qataq souaxat da n'aqtac mayi i'axattac. Cha'ayi namayipi ÿataqta sa ishit da ñi'itac, qataq qaica ca ÿictega da nai'ctaxa da ileutalec damayi.

¹² Qaq ÿoqo'oyi 'am piguem, qataq 'enauac na 'am netalec, ÿataqta qauamaichiguiñi qome. Qalaxayi ÿataqta choxodaicpiolec qome na netalec ana 'alhua qataq asom auaxai. Cha'ayi so shiÿaxaua lma'na ÿataqta dalemata. Qaq somayi qami' huenoteeguesopa, cha'ayi somayi ÿaÿateeta'a da mashi sa qaÿapeque ca laloqo'.

¹³ Qaq se'eso 'ico' da'ail'oc, can ila'a da mashi qaÿamaqña ana 'alhua, nachi icanapec asa'aso 'alo mayi huo'o so llalec.

¹⁴ Qalaxayi asa'aso 'alo qoÿanema soua dos late'el laua na vi'ic, da yaqto' ishit da huaÿa'a cam tojlec 'alhua, da yaqto' qaÿoqtaique naq'en se'eso n'adaxanaq, cam huaña da asomayi qaiqui'axaatac, chochi ividaxattreec caua tres vi'iyi, qataq ca laiñi ca lÿa vi'i.

¹⁵ Nachi se'eso n'adaxanaq ncosaueegue so 'etaxat, nauoigui naq'en na alap, da ÿauotaique ca l'auaxac, da yaqto' huaÿoxon naq'en asa'aso 'alo.

¹⁶ Qalaxayi ana 'alhua itauan asa'aso 'alo. Cha'ayi ana 'alhua ÿauachigui na alap, nachi cañi naq'en se'eso 'etaxat mayi ncosaueegue so shiguiÿac.

¹⁷ Huaña, nachi se'eso shiguiÿac ÿataqta dalemataÿa asa'aso 'alo. Nachi somayi jec da iloquiaxan na n'onañi llalaqpi asomayi, nam ÿataqta ÿalaxalguete naua lqataxaco ñi Dios, qataq ÿataqta quetelguete naua 'eesoda lataxaco mayi i'axa't co'ollaxa so Jesucristo.