Apocalipsis 11 - Nuevo Testamento Toba Sur

Soua dos l'aqtaxanaxanqa ñi Dios

¹ Nachi aÿim qoÿami' so coqta mayi 'eeta'am na naloqnaxanaxat. Qaq aÿim qoÿinapega, qoÿiita': –Qoñishiguem qome, nachi 'analoqten yi lalogaxa añi l'onaxanaxaqui ñi Dios qataq añim nca'atoxonaxalate. Qataq 'analoqten yi lcata nam yi'oxonnataxaatacpi mayi hueta'a yimayi.

² Qalaxayi sa ishit qome da 'analoqten yi nqasoxoc añi n'onaxanaxaqui, cha'ayi yimayi qoÿanem nam ÿaqa'a ca chigaqa'ague. Qaq namayipi ÿataqta ÿi'inai' qome yi'iyi la ciudad mayi lalamaxat ñi Dios. Qaq ividaxattreec caua cuarenta y dos ca'agoxoiqa.

³ Nachi aÿim qome sama'q caua dos ÿamaxa'shi, da yaqto' i'axa't naua i'aqtaqa, ÿataqta ividaxattreec caua mil doscientos sesenta na'axa'te. Qaq caamayi ÿaatrañi caua alogo lasouaxaqui'.

⁴ Qaq se'esoua dos n'aqtaxanaxanqa, nachisoua soua dos nanguishi olivos qataq soua dos ncoÿadaxanaxaqui' mayi qoÿaatraña ca netaña ñim lataxala' 'enauac nam huetalec ana 'alhua.

⁵ Qaq da huo'otaq huo'o ca nshitaique da ÿauo'o ca 'en'ac, nachi soomayi ishit da ncosaueegue na nodec, nachi ishit da ÿataqta nmatchiguiñi da ÿavigaxat 'enauac na npa'aguenaxauapi. Qaq 'eda da 'eetec da nalaataguec da huo'otaq huo'o ca nshitaique da huo'o ca 'en'aque soomayi.

⁶ Cha'ayi se'esoua n'aqtaxanaxanqa huo'o da l'añaxa'c, da yaqto' ÿapoyigui na piguem da sa ishit da huo'o ca auot da huo'otaq ña i'axatta'pe naua l'aqtaqa ñi Dios. Qataq nataq'en huo'o da l'añaxa'c da nañigui naq'en na 'etaxat na ntago'q, qataq da ÿauo'o da nque'ejnaxac 'enauac nam huetalec ana 'alhua, da nque'etaxangui naq'en na ÿotta'a't napaxaco. Qaq ÿataqta maichi ÿoiqueeta'pe da ÿi'iguelaqtalguete cam i'oteque naq'en namayipi.

⁷ Qalaxayi qom mashi ima't nam i'o'tpi, nachi so shiguiÿac mayi chigaqaña som laponqa' nam leuaxaicpi, somayi iloquiaxa'n soomayi. Ime, qaq loxonqa, nachi ÿalaua't.

⁸ Nachi da l'oquiaxa'c soomayi qaÿachitrangui na laiñi so nqa'aic yim lta'adaic la ciudad mayi huaña co'ollaq qaiuaxanguet so qo'ipaq so qadataxala', yim chochi qaÿamata'ac da l'enaxat Sodoma qataq Egipto.

⁹ Qaq ivi' qome caua tres na'axa'te qataq ca laiñi ca lÿa na'a'q da imeteetac da l'oquiaxa'c soomayi na ÿotta'a't shiÿaxauapi mayi ÿotta'a't na l'aqtacpi. Qaq sa ishit qome da qaÿashin da qailalyiñi.

¹⁰ Qaq 'enauac qome nam shiÿaxauapi mayi huetalec ana 'alhua ÿataqta ntootapeguec da nalaatague'c soomayi. Qaq souaxat de'eda ntonaxac, nachi ñi 'oonolec ÿamaxa ca lachitaqtaxanaxat ca lÿa. Cha'ayi se'esoua dos l'aqtaxanaxanqa ñi Dios, soomayi ÿataqta huo'o naq'en da nque'ejnaxac namayipi.

¹¹ Qalaxayi qom inoxoodeec caua tres na'axa'te qataq ca laiñi ca lÿa na'a'q, nachi ñi Dios qaltaq nca'alaxatreec, nachi qaltaq nca'aldeec. Nachi 'enauac nam ÿauaachiguilo soomayi ÿataqta huo'o da lcolanaxa.

¹² Ime, qaq se'esoua dos n'aqtaxanaxanqa, soomayi hua'axaÿalo so lta'adaic nvilÿaxac chimqot na piguem, 'eeta': –Qauanaishiguemec ne'ena pa'ashiguem. Nachi soomayi tadegue da piguem, quedoigui so l'oc. Qaq nam ipa'agueeta'pe soomayi, nachi ÿauaachiguilo.

¹³ Huaña, nachi huo'o so nacholaxanaxa, nachi nlaguiñi ñi 'oonolec nam diez noÿicpi se'eso la ciudad. Qataq ivi' na siete mil so ileu souaxat se'eso nacholaxanaxa. Qaq nam n'onañi na shiÿaxauapi ÿataqta huo'o da lcolanaxa, nachi ÿi'oxodeetac ñi Dios mayi neto'ot na piguem.

¹⁴ Qaq inoxoneec se'eso nca'ataxanauo nqui'ic, qalaxayi saqaÿaloq da nvi' cam lÿa mayi pa'ateec naua tres.

Aso pa'ateec soua siete nashiide

¹⁵ Nachi so pa'ateec soua siete namaxa'shi, somayi ÿashiiyigui aso lashiide. Nachi qai'axaÿa so lta'adaic nvilÿaxacpi mayi chimqot na piguem, 'eeta': Da l'onataxanaxac na nta'alpi da ilo'ogue nam huetalec ana 'alhua, damayi nagui lalamaxat ñi qadataxala' qataq som namaq nta'a qadca'alaxaqui; nachi somayi chochi tateec nagui da ilo'ogue 'enauac namayipi.

¹⁶ Nachi som veinticuatro nquedoxonecpi mayi datato'ot ca nso'onqa' ñi Dios, somayipi i'alyiñi naua l-llicte, ÿataqta ividaxata'agueta naq'en na latap na 'alhua. Nachi qaÿi'oxoden ñi Dios,

¹⁷ qoÿiita': 'Am sanaxam da qan'achiquiaxac, 'am qadataxala' Dios mayi qaica ca 'auqalanapec, 'am mayi nachi 'eetai' da 'am huo'o, qataq nachi'am mayi 'au'onataxaatac nagui, qataq 'auanaÿa'cna, cha'ayi 'am 'au'ogoxona dam qaica ca 'en'am 'ad'añaxac, da yaqto' 'aulo'ogue 'enauac nam huetalecna.

¹⁸ Qaq nam ÿotta'a't shiÿaxauapi ÿataqta dalemata, qalaxayi mashi ivita yi laloqo' da 'am 'auauo'o ca nhuaxanaguec 'enauac namayipi. Qataq nataq'en mashi ivita yi laloqo' da 'am 'anmit 'enauac nam leuaxaicpi, qataq da 'auauo'o ca nshiitenaguec nam 'adamaxashicpi mayi i'axatta'pe naua 'ad'aqtaqa, qataq nam nañanot da 'am quetague', qataq na 'am ÿi'oxodeetac, nai'ctaxa da huo'otaq 'amaqtaqaic, huo'otaq da saq 'amaqtaq. Qataq nataq'en mashi ivita yi laloqo' da 'am 'aulaxachigui nam nlaxattapiguiñi 'enauac nam huetalec ana 'alhua.

¹⁹ Huaña, nachi qaÿauatoigui aso l'onaxanaxaqui ñi Dios mayi neta'ague da piguem. Nachi ÿataqta yi'oqta aso laÿi' soua diez lqataxaco ñi Dios. Nachi huo'o so nqashilgaxa, nlamaxa, qataq so nalataxa, qataq so nacholaxanaxa, qataq aso late'edai lachi.