Apocalipsis 10 - Nuevo Testamento Toba Sur

Som namaxashic piguem l'ec qataq aso nedole

¹ Ime, nachi sela'a so lÿa namaxashic piguem l'ec ÿataqta 'añaxaic, chigoqo'ot na piguem, huetaigui so l'oc, qataq so qomoxonalo coleesop na lqaic. Qataq na lashic, qalaq 'eeta'am na l'edaxa añi nala'. Qataq naua lchil 'eeta'am na nodec l'edaxa.

² Nataq'en lasoqta'a aso nedole ÿauattagui. Nachi na lapia' mayi aloic petalec naq'en aso auaxai, qataq na n'emaq, qalaq petalec naq'en na 'alhua.

³ Nachi n'axannec da lavilÿaxac da detaqa. Qaq de'eda lavilÿaxac 'eeta'am da huo'otaq desoqo na león. Qaq can i'alaq, nachi soua siete qasoxonaxa nachi detaxai'.

⁴ Qaq can ime da ltaxaÿaxa'c soua siete qasoxonaxa, nachi aÿim sauotaique shiyiñi. Qalaxayi aÿim sa'axaÿa so n'aqtac, chimqot na piguem, aÿim 'eetega, 'eeta': –Sa ishit qome da 'iyiñi da l'aqta'c soua siete qasoxonaxa, yaqto' sa ishit da huo'o ca ÿaÿaten.

⁵ Ime, nachi som namaxashic piguem l'ec mayi selota'a petalec na 'etaxat qataq na 'alhua, somayi ÿachaxanot na piguem na lhuaq aloic.

⁶ Nachi ÿanot da l'aqtac ñim nachi 'eetai' da nca'altauec, ñim l'onatac na piguem, qataq ana 'alhua, auaxai, qataq 'enauac nam huetalecna, 'eeta': –Nagui mashi sa ishit da qaltaq huo'o ca qaiuatta'a.

⁷ Cha'ayi qom ivita ca laloqo' da ÿashiiyigui aca lashiide ca pa'ateec soua siete namaxa'shi piguem lashi', huaña, nachi ipacchigui 'enauac nam saq cha'api mayi detaxaÿa co'ollaxa ñi Dios. Huaña, nachi ipacchigui da i'aqtaxanaxanec ñimayi nam lamaxashicpi l'aqtaxanaxanecpi.

⁸ Nachi so n'aqtac mayi sa'aqtega chimaqtacot na piguem qaltaq ÿi'iguelaxalec da aÿim 'enapega, 'eeta': –'Asoma qome, 'auacona ada nedole ÿauattagui mayi huetaigui na lhuaq lauel dam namaxashic piguem l'ec mayi petalec ana auaxai qataq ana 'alhua.

⁹ Ime, nachi ashic, nachi seÿaxanot so namaxashic, da yaqto' aÿim ÿami' aso nedole. Nachi somayi aÿim 'enapega, 'eeta': –Na', nachi 'amatauo qome da qollic. Nachi na 'ap qome ÿataqta ama, 'eeta'am na dapic lli'i. Qaq na 'adhuel qome, qalaq ÿataqta chimigui.

¹⁰ Nachi sacona aso nedole mayi huetaigui na lhuaq so namaxashic. Ime, qaq sachic. Huaña, nachi na aÿap ÿataqta ama, 'eeta'am na dapic lli'i na lamaic. Qalaxayi can lcopaguingui da sachic, nachi ÿataqta chimigui naq'en na iuel.

¹¹ Ime, qaq aÿim qoÿinapega, qoÿiita': –'Am qataq 'avi'iguelaxalec qome da 'au'aqtaxanem da l'aqtac ñi Dios na ÿotta'a't shiÿaxauapi mayi nataq'en ÿotta'a't na l'aqtacpi, nataq'en na qalota nta'alpi.