Apocalipsis 1 - Nuevo Testamento Toba Sur

Da 'eetec da lauanaqchic so Jesucristo

¹ Qaq 'eda da 'eetec da nauanaqchic mayi ÿami' ñi Dios so Jesucristo, da yaqto' somayi ishit da ÿaÿajnaxanaxanec na lamaxashicpi dam saqaÿaloq da yi'oq. Qaq so Jesucristo ÿachigoxotchigui so lamaxashic piguem l'ec da ÿaÿajnaxanaxan so lamaxashic Juan.

² Qaq ÿoqo'oyi somayi ÿataqta 'eesa de'eda l'aqtaxanaxac 'enauac nam ÿauaachigui, da ÿataqta 'eesa da l'aqtacpi ñi Dios dam qomi' nda'alo so Jesucristo.

³ Qaq ÿataqta machiguiñi qome ca itaxaÿaxan ana'ana nede, qataq machiguiñi nataq'en ca n'axaÿaxaatega qom qaitaxaÿaxan de'eda n'aqtaxanaxac mayi chigoqo'ot ñi Dios, qataq da ÿataqta ÿalaxaguet de'eda qoÿittalec ana'ana nede, cha'ayi mashi sa qaÿapeque ca loga't da yi'oq 'enauac ne'ena.

So Juan ÿamaxa aso lede soua siete 'ale'u mayi netalguete na 'amqajnataxanaxaicpi

⁴ Aÿim Juan, samaxa ana ÿide naua siete 'ale'u mayi netalguete na 'amqajnataxanaxaicpi mayi netaigui yi 'alhua Asia. Qami' ÿaqaÿañicpi, ñishitaique da qami' qauacoñiiguet da nqouagaxanaqtaic qataq da nlagaxayic mayi chigoqo'ot ñi Dios, ñim nachi 'eetai' da huo'o, qataq ñim do'onataxaatac nagui, qataq naÿa'cna. Qataq nataq'en chigoqo'ot nam siete saq cha'api mayi datatau'a ca nso'onqa' ñimayi.

⁵ Qataq chigoqo'ot so Jesucristo som ÿataqta ipacchiguilo naua l'aqtaqa ñi Dios, qataq nachiso so l'auaxanec da qanca'alaxateeguesop na leuaxaicpi, qataq nachiso so lataxala' na nta'alpi mayi huetalec ana 'alhua. Qaq somayi ÿataqta qomi' ÿauoteque, qataq iÿouec na qadasouaxashitpi, deÿoxonalo naua ltago'q,

⁶ qataq ÿanaguilo da qomi' nta'al qataq da qomi' ltaxaÿaxanaxanqa naq'en na shiÿaxauapi, da yaqto' so'onataxanqot ñim lta'a Dios. ¡Qaq somayi nachi 'eetai' qome da lli'oxoyic qataq da l'añaxac! Aja', nachi 'eetec.

⁷ Qaq ¡ña qauloÿa, na Cristo nactaigui na l'oc! Qaq 'enauac qome da qaila'aguet, qaq ivida'a qome nam ique'emaqchit ishit da ila'a namayi. Qaq 'enauac qome na ÿotta'a't shiÿaxauapi mayi huetalec ana 'alhua ÿataqta noÿiitagui qome qaila'aguet. Aja', nachi 'eetec.

⁸ Qaq 'enapec ñi qadataxala' Dios: “Aÿim mayi nachaÿim l'atchiguiñi, qataq nachaÿim pa'ateec, shiita'am aca l'auaxana ana leetrapi qataq aca pa'ateec.” Qaq 'eda da 'enapec ñim qaica ca ÿaqalanapec, ñim nachi 'eetai' da huo'o, qataq ñim do'onataxaatac nagui, qataq naÿa'cna.

Da nmejnaguec da lli'oxoyic so Cristo

⁹ Qaq aÿim Juan mayi maichi aÿim qadqaÿai qataq qami' shiita'ama da huo'o da ñique'ejnaxac qataq da sa'axattac da l'onataxanaxac da ilo'ogue 'enauacna ñi Dios qataq da huo'o da ñiualaunaxac mayi chigoqo'ot so Jesucristo. Qaq aÿim qaicoñittai', sootaña añi delec, l'enaxat da Patmos, souaxat da aÿim sa'axattac da l'aqtac ñi Dios mayi qomi' nda'alo so Jesucristo.

¹⁰ Qaq huetoigui so na'a'q mayi laloxoqui da qaÿi'oxoden so qadataxala', co'ollaq aÿim nvita da sootaigui da l'añaxac so Espíritu Santo. Nachi sa'axaÿa co'ollaxa so lta'adaic nvilÿaxac, chimaxague na ilaq, 'eeta'am na l-lamaxa ana nashiide.

¹¹ Qaq aÿim 'enapega, 'eeta': –Nachaÿim mayi aÿim l'auaxanec qataq nachaÿim mayi sepa'ateec, shiita'am aca l'auaxana ana leetrapi qataq aca pa'ateec. Qaq 'am 'edelec qome aca nede 'enauac na 'auauaachigui. Ime, qaq 'auamaxalo qome naua siete 'ale'u mayi netalguete na 'amqajnataxanaxaicpi mayi netaigui yi 'alhua Asia: yim Éfeso, Esmirna, Pérgamo, Tiatira, Sardes, Filadelfia, qataq yi Laodicea.

¹² Ime, nachi ñoqoilec co'ollaxa da samata'a som aÿim detaqtega. Qaq can ñamatashiguem, nachi sela'a aso siete ncoÿadaxanaxaquipi, ndoteec ana chigaqaigui na oro.

¹³ Qaq na laiñi se'esoua siete ncoÿadaxanaxaqui' sela'a so 'oonolec 'eeta'am na shiÿaxaua llalec. Qaq soua alogo ÿataqta ivildañi, qataq so lasot alaxa naguelec ana ltogue, somayi chigaqaigui na oro.

¹⁴ Qaq na laue ÿataqta lapagaxaic, 'eeta'am da lapagaxa na qagueta laue, huo'otaq ana aloñi. Qaq naua l'ai'te qalaq 'eeta'am na l'edaxa na nodec.

¹⁵ Qaq naua lchil ÿataqta qashilectrapiguiñi, 'eeta'am na nqashilgaqtac lcat l'enaxat bronce mayi qaÿasaxangui na nodec. Qaq da lavilÿaxac 'eeta'am da l-lamaxa ana lapaxa aso auaxai.

¹⁶ Qaq na lhuaq mayi aloic huetaiguilo soua siete huaqajñi. Qaq na alap netaigui so ÿiilonec ÿataqta ÿaxadaic, dos naua ala'pi. Qaq na lashic ÿataqta 'eeta'am añi nala' da ivita da 'edoigui.

¹⁷ Qaq co'ollaq sela'a, nachi souañi, 'eeta'am da seleu. Qalaxayi somayi ÿauota'a na lhuaq aloic da aÿim ipoteu'a. Nachi aÿim 'enapega, 'eeta': –Sa ishit qome da 'ayi'i. Aÿim mayi nachaÿim l'auaxanec, qataq aÿim mayi nachaÿim sepa'ateec.

¹⁸ Qaq aÿim mayi nachaÿim ñica'alapeguec. Aÿim co'ollaxa seleu, qalaxayi nagui qaltaq ñica'altauec, qanachi sa lÿa da seleu. Qaq nagui aÿim hueto'ot da l'añaxac da nleuaxa qataq cam laponqa' na leuaxaicpi.

¹⁹ Qaq 'iyiñi qome 'enauac na 'auauaachigui, qataq 'enauac nam nagui yi'oq, qataq cam ñaq taÿa'a da yi'oq.

²⁰ Qaq 'eda dam saq cha'a n'aqtaguec asom siete huaqajñi mayi 'auauaachigui da huetaigui na iuaq qataq asom siete ncoÿadaxanaxaqui mayi chigaqaigui na oro, 'eeta': asom siete huaqajñipi, naigui ñi 'oonolec na namaxashic piguem l'ecpi mayi ilotague' na 'amqajnataxanaxaicpi mayi netalguete naua siete 'ale'u. Qaq aso siete ncoÿadaxanaxaqui naigui na 'amqajnataxanaxaicpi mayi netalguete se'esoua siete 'ale'u.