3 Juan 1 - Nuevo Testamento Toba Sur

Da no'on n'aqtaguec so Gayo

¹ Aÿim mayi aÿim nquedoxonec, 'am samaxa ana ÿide, 'am ñauochaxaua ÿaqaÿa Gayo, cha'ayi ÿataqta 'eesa da 'am ÿauotaxat.

² 'Am ñauochaxaua ÿaqaÿa, da ñoqouagaxaunaxac, ñishitaique da ÿaÿamaqchiguiñi 'enauac cam 'au'ot, qataq saqca ca da da 'anachaalataxac, da yaqto' 'eeta'am da 'adquiyaqteÿaxac mayi ÿaÿamaqchiguiñi.

³ Cha'ayi aÿim ÿataqta qalota da ÿamaiquiaxac co'ollaq huo'o na nvi' qadqaÿañicpi, nachi aÿim i'axattapeguem da ÿataqta 'aupacchigui da 'adpi'iÿaxac, cha'ayi nachi qouetaigui dam n'aqtac mayi ÿataqta 'eesa.

⁴ Qaica ca lÿa ÿacteec naq'en da ñitonaxac da huo'otaq aÿim saÿaten da na ÿalaqpi huetaigui da i'ottac da n'aqtac mayi ÿataqta 'eesa.

⁵ 'Am ñauochaxaua ÿaqaÿa, ÿataqta ÿaÿamaqchiguiñi da 'adataxac, yi 'aupacchigui da qouetapegue' na qadqaÿañicpi, lamaaxa nam ÿaqa'a ca chigaqa'ague.

⁶ Cha'ayi namayipi da'aqtaxaatapeguem 'enauac na 'amqajnataxanaxaicpi ne'ena soota'a, i'axattac da 'adauotaxanaqtaic. Qaq ÿoqo'oyi aÿim 'anqouaguec qome da 'autaunec namayipi ca lhuenaxanaxa, yaqto' ishit da qaltaq cot da lliquiaxac. Qalaxayi ca 'adtaunaxanaxac ÿataqta ÿaÿamaxadeeta 'anqa'en ñi qadta'a Dios.

⁷ Cha'ayi namayipi cot da lliquiaxac da do'onataxanot so Jesucristo, qataq sa ishit da ÿaconguet da ltaunaxanaxac cam sa ishit da ÿauatton ñi Dios.

⁸ Qaq ÿoqo'oyi qomi' ishit da ñachoxola't da seloxoguet namayipi da setauanaxac da l'aqtaxanaxac da i'axat da n'aqtac mayi 'eesa.

Da qauem lataxac so Diótrefes

⁹ Qaq aÿim shiyiñi co'ollaxa aso ÿide da samaxa na 'amqajnataxanaxaicpi. Qalaxayi ca Diótrefes sa ishit da ÿaconguet da qadamaxasoxonaxac, cha'ayi camayi nshitaique da nachicata lataxala' namayipi.

¹⁰ Qaq ÿoqo'oyi da ivita da ashic, qaq ÿataqta ñi'axatshiguem damayi, souaxat da aÿim quetapeguelec camayi qataq souaxat da latenataxanaxac. Qataq saqdata de'eda i'ottac, nataq'en sa ishit da ÿaconguet na qadqaÿañicpi. Qataq nam huotaique da ÿaconguet namayipi ÿataqta sa ÿashinem qataq ÿamaqhuec da ca'ai naq'en na 'amqajnataxanaxaicpi.

¹¹ 'Am ñauochaxaua ÿaqaÿa, sa ishit qome da qoquegue ca qauem 'onataxac, chaqcata ca no'on. Cha'ayi cam i'ot ca ÿaÿamaqchiguiñi, camayi lalamaxat ñi Dios, qaq cam i'ot ca sa ÿaÿamaxañi, qachi sa ishit da ila'a ñi Dios.

Da no'on n'aqtaguec so Demetrio

¹² 'Enauac na shiÿaxauapi ÿataqta no'on da l'aqtaxanaxac da i'axattac ca Demetrio. Nataq'en da n'aqtac mayi ÿataqta 'eesa, damayi i'axat da no'on lataxac camayi. Qaq qomi' nataq'en sa'axataqtac, qataq qami' qauaÿajñiita da de'eda qad'aqtac ÿataqta 'eesa.

Da pa'ateec n'aqtac

¹³ Qaq aÿim ÿataqta qalota nam i'aqtacpi, qalaxayi sa ishit da sedelec ana ÿide da 'am samaxa.

¹⁴ Cha'ayi seuata'a qom huo'otaq saqaÿaloq da 'am ñauane', nachi ÿataqta ñima'ai' da 'am setaqtapegue'.

¹⁵ Qaq ñishitaique da 'aulacchiguiñi. Qaq 'enauac nam qadqaÿañicpi mayi aÿim hueta'aguet 'am ÿamaxa da lquinaxanaxac. Qaq aÿim 'anqouaguec, 'ai'anem qome da iquinaxanaxac ñi 'oonolec ca qadqaÿañicpi.