2 Ts 3 - Nuevo Testamento Toba Sur

Qanqouagaxauñiilguete qomi'

¹ Qaq da pa'ateec qad'aqtac, qami' qadqaÿa't, qanqouagaxauñiilguete qome qomi', yaqto' da l'aqtac so qadataxala' saqaÿaloq da ivideuga 'enauac na shiÿaxauapi da ÿi'oxoden. Nachi 'en'am co'olloxochiyi da qoñiita.

² Nataq'en qanqouagaxauñiilguete qomi' da ña qomi' qanca'alaxateeguesopa na shiÿaxauapi qauemaicpi mayi n'aqchittac da ÿaÿamaqchiguiñi, cha'ayi sa ishit da 'enauac na shiÿaxauasat da hueto'ot da npi'iÿaxac.

³ Qalaxayi so qadataxala' mayi sa ÿatenachit ca l'aqtac qami' itauanque da qami' 'añaxaiqa, qataq qami' ntelaqna'agueta na sa ÿaÿamaxañisat.

⁴ Qaq somayi mayi qomi' ÿanema da qanaquitaxac da qoñiita da qoquiitot da qau'ochi dam mashi qau'ochiitac mayi qami' samaxasoxolguete.

⁵ Qaq so qadataxala' qami' itauanque da ÿataqta qauanomiiteguet da lsoxoyic ñi Dios, qataq qami' itauanque da qanhualaxaunaxaqui mayi 'eeta'am da lhualaxavic so Cristo.

Qoÿinapega ca shiÿaxaua da do'onataxan

⁶ Qami' qadqaÿa't, qami' saqataxalo, cha'ayi qomi' lamaxa'shi so qadataxala' Jesucristo, da sa ishit da qanhuoquiiteguet ca camachaqca qadqaÿa da sa ishit da do'onataxan, qataq lamaaxa da sa ishit da quetegue da qadapaxaguenataxanaxac mayi qami' sanaxama.

⁷ Cha'ayi qami' mashi qauaÿajñiita da lataxac da qoquiitelec dam qami' sachaxanaxalo qadataxac. Co'ollaq qami' souaqta'agueta, qalaq sa ishit da sa so'onataxanaq,

⁸ qataq sa ishit da chochi sachiguenaqtac ca aloq ñi 'oonolec da qoñiita da huo'otaq sa seshiitenaq. Chaqdata da so'onataxanaqtac, ñasamaqtañi na na'axa'tesat qataq na pesa'chi, cha'ayi sauoqtaique da sa ishit da huo'o ca nsallaxaueetapegueto qomi' da qoñiita.

⁹ Nai'ctaxa da qomi' huo'o da qad'amaqchic da huo'otaq qami' seÿaxanaxaiguilo da qomi' qautauañi', qalaxayi qomi' ñaconaxala't da so'onataxanaqtac, cha'ayi sauoqtaique da qami' qoquiitelec da qadataxac.

¹⁰ Cha'ayi co'ollaq qami' souaqta'agueta, qalaq qami' sanaxama de'eda lataxac da ca shiÿaxaua da sa do'onataxan, qaq mashi deque'ectoxo'.

¹¹ Cha'ayi qomi' sa'axasoqtapeguelec da huo'o na sa ishit da do'onataxan da qoñiita. Chaqdata da nalamaqte' da lli'imaxa, sa ishit da do'onataxan.

¹² Que'eca shiÿaxaua samaxasoxonaxalec qataq saqataxa, cha'ayi qomi' lamaxa'shi so qadataxala' Jesucristo, da ÿataqta do'onataxan, saqca ca taÿapigui lauel, yaqto' ishit da nauec ca lhuenec.

¹³ Qami' qadqaÿa't, sa ishito' qome da qadasamiiñi da qau'ochi da ÿaÿamaqchiguiñi.

¹⁴ Da huo'o ca 'oonolec da qoñiita da sa ishit da ÿalaxalec da qad'aqtac mayi huetalec ana qodede, camayi ÿataqta qauauattoñiita. Nachi sa ishit da qaualliquiiguet, yaqto' camayi maichi n'aloxon.

¹⁵ Qalaxayi sa ishit da 'ico' qanpa'aguenaxauai. Chaqdata da ÿataqta qauqachiÿa, qoñiiteguem ca qadqaÿai.

So Pablo nshitaique da qoÿan ca no'on ñiquiaxac

¹⁶ Qaq so qadataxala' Jesús mayi chigoqo'ot da nlagaxayic, somayi qami' ÿanema qome da qadlagaxayiqui 'enauaque naua vi'iyi qataq 'enauac na sochaqna lataxaguesat. Qaq somayi hueta'agueta qome 'enauac da qoñiita.

¹⁷ Aÿim Pablo maichi semapegue' da shiyiñi da iquinaxanaxac. Qaq de'eda nachi shiita'ac 'enauac ana ÿidepi da maichi ñanedelec. Qaq 'eda da nedaguec ana ÿide.

¹⁸ Qaq so qadataxala' Jesucristo qami' ÿanema qome 'enauac da qoñiita ca no'on qoyiquiaxaqui. Aja', nachi 'eetec de'eda.