2 Ts 2 - Nuevo Testamento Toba Sur

Cam shiÿaxaua mayi 'itaxaloxoic

¹ Qaq nagui, qami' qadqaÿa't saxa da sa'axataq da lli'iguelaxasoxoc so qadataxala' Jesucristo, qom anac da qomi' laÿona't. Qami' saqataxalo

² da sa ishit qome da qalhuotta'a da qaÿashaxaneec da qadhuennataxaqui, qataq sa ishit da qami' icolanaqchi't da huo'otaq qoÿiitega da mashi ivita ca laloqo' da nvi' so qadataxala'. Cha'ayi sa iuena'a da huo'o ca n'enaqchingui da 'eetega 'ico' i'aqtaxanaxan so Espíritu, huo'otaq da huo'o ca n'aqtaxanaxac qau'aqÿapeguelec, huo'otaq qauacoñiiguet aca nede qoÿiitega qodede.

³ Qalaxayi sa ishit qome da huo'o ca qami' ÿatenachi't. Cha'ayi qom yaqta'a da ivita que'eca na'a'q, nachi hua'auñi da nachajñi ca shiÿaxauapi, ÿataqta npa'aguene' ñi Dios, nachi yi'oq que'eca shiÿaxaua 'itaxaloxoic cam taÿa'a da ÿataqta imeuo qanqoÿin.

⁴ 'Eca ca depa'aguenataxan mayi nachajñi da dataÿa'aguet 'enauac na ÿachitac da l'enaxat ñi Dios, huo'otaq nam qanatameetacotpi. Qataq ivitta'a da nso'oolec ca atamnaqa' da qanatamnot ñi Dios, nachi 'eetega da nachica ca Dios.

⁵ ¿Sa ishito' da qantouñiita'ac da sa'axattac de'eda co'ollaq aÿim qami' soota'agueta?

⁶ Cha'ayi qami' mashi qauaÿajñiita da nqanaxattac que'eca shiÿaxaua 'itaxaloxoic da huo'o mshi sa nachaxan nagui, to' qom ivita ca ÿoqta laloqo'.

⁷ Cha'ayi dam saq cha'a ñi'itaxaloxo mashi sogote da do'onataxaatac. Qalaxayi chochi iuatta'a da qanqat dam nllitañi.

⁸ Huaña qome, nachi nachaxan que'eca shiÿaxaua 'itaxaloxoic. Qalaxayi so qadataxala' Jesús ÿalauat qome, idolec na l'at qom ncosaueegue da iquetetot camayi. Nachi ileuaña naq'en souaxat na l'edaxa qom ñi'iguelaq.

⁹ Da lvidaxac que'eca 'itaxaloxoic nactaigui da l'onataxanaxac so shiÿaxaua lma'na, l'enaxat Satanás. Ÿataqta lta'adaic da l'añaxac, ishit da i'ot na n'anecpi qataq ca sa qaÿauanapigui mayi depi'itaqtaxan.

¹⁰ Do'onataxana 'enauac na ÿotta'a't sa ÿaÿamaxañisat da chochi ÿatenachit na shiÿaxauapi mayi taÿa'a da nhuaxanaguec chochi tateec, cha'ayi mashi sa ishit da ÿaconguet da 'eesa lataxac mayi ishit da qanca'algui.

¹¹ Ÿoqo'oyi ñi Dios ña ÿauaxaÿa'a da quegue naq'en da nsomaxac, yaqto' i'amaqten da chochi natenataxanaxac.

¹² Yaqto' ÿataqta lta'adaic da nhuaxanaguec 'enauac nam sa ishit da i'amaqten da 'eesa lataxac. Chaqdata da nqopita na sa ÿaÿamaxañisat.

Qami' qalca'au'alo da qami' qanca'alaxatreec

¹³ Qami' qadqaÿa't, mayi qami' nauochaxa'u so qadataxala', qomi' soqolaqtot da sanaqtacot da qan'achiquiaxac ñi Dios souaxat da qoñiita, cha'ayi ñimayi qami' lca'au'alo co'ollaq saxanaqaca ana 'alhua da qami' nca'alaxatreec. Qaq de'eda nca'alaxa chigoqo'ot so Espíritu mayi chigoqchigui da qami' lalamqa'te naq'en ñi Dios, nataq'en chigaqaigui da 'eesa lataxac mayi qau'amaqchiñi.

¹⁴ Qaq nachida da huo'o mshi qami' iÿaxanalo ñi Dios, nshitaique da qauacoñiiguet da nca'alaxa mayi chigaqaigui da n'aqtac dam sa'axataqtac. Nataq'en nshitaique da qanhuañiÿau'a da lli'oxoyic so qadataxala' Jesucristo.

¹⁵ Qaq ÿoqo'oyi qami' qadqaÿa't, saqco' qome ca qauqochiÿa, qataq qan'añaxachiitec da qadapaxaguenataxanaxac dam qami' sanaxama co'ollaq qami' souaqta'agueta, huo'otaq na huetalec ana qodede.

¹⁶ Qaq ñim qadataxala' Jesucristo qataq ñi qadta'a Dios ñim qouagaxanaqtaqaic mayi qomi' ÿauoteque, qataq qomi' ÿanema da qad'añaxac chochi tateec, qataq da ÿaÿamaqchiguiñi qanaquitaxac,

¹⁷ ñiimayi i'añaqchi't qome naua qadquiyaqchilli', qataq qami' itauanque da qami' 'añaxaiqa da qau'axachi qataq qau'ochi 'enauac na ÿaÿamaqchiguiñisat.