2 Timoteo 3 - Nuevo Testamento Toba Sur

Da n'onataxac na shiÿaxauapi qom nayiitrauec naua na'axa'te

¹ Nataq'en 'auaÿateeta de'eda qom mashi nayiita'a ca loga'tna, nachi nvildeuo caua na'axa'te ÿoqta huo'o da lqalai'c.

² Cha'ayi da n'onataxac na shiÿaxauapi 'eeta': maichi nauojla't, qataq quetague' da lqopitaxanaqtaic ana plata, qataq ñi'oxonnaxaic, qataq 'otanaxanaxaic. Namayipi sa iyacnapec ñi Dios, qataq sa ÿalaxalguete caua lta'al, qataq 'agaqaic, qataq qaica naq'en ca 'enec da n'amqajnataxanaxac.

³ Namayipi sa dechoxonnataxan, qataq sa nauote' ca lÿa, qataq n'aqtaqa l'o', sa ishit da maichi ntel-la't, qataq yiloxoic, qataq sa ishiteguet na ÿaÿamaqchiguiñi.

⁴ Namayipi que'elaqtaxanaxaic, qataq saq llivigui lauel, qataq ÿashittagui da ñi'oxonnaxac, qataq ÿagaqainapeguec ca maichi lqochoxo, qaq sa ÿoqochi'iguet ñi Dios.

⁵ Namayipi nachaxaata da 'eetega quetague' da n'amqajnataxanaxac, qalaxayi sa ishit da hueto'ot da l'añaxac da n'amqajnataxanaxac. Qaq 'ena qome na 'antela'aguet.

⁶ Cha'ayi namayipi huo'o na 'ico' nchittau'alo naua noiqa da ÿoiqueetac ana 'alo mayi sa naÿaten, qataq lqapalqa naua n'onataxaco. Ana'ana 'alo chochi quetague' na ÿotta'a't lqopitaxanaqtaiguesat,

⁷ qataq nshitaique da huo'o ca ÿaÿaten, qalaxayi sa ishit da ivideguet da ÿaÿaten da ÿoqta 'eesa lataxac.

⁸ Namayipi 'eeta'ama soua 'oiquiaxai Janes qataq so Jambrés mayi dataida'aguet co'olloxochiyi so Moisés. Qaq nataq'en 'eeta'am ne'ena shiÿaxauapi ÿataqta dataÿa'aguet da 'eesa lataxac. Namayipi mashi sotaq ÿaÿamaq da lauattonaxanaxac, qataq npe'eneueegue da lliquiaxac da npi'iÿaxac.

⁹ Qalaxayi namayipi sa qaÿa'ague qome da lliquiaxac, cha'ayi saqaÿaloq da qaÿauatton da qaica ca ÿaÿajnapec. Qaq namayipi nachi 'eeta'am da qoÿiiteque co'olloxochiyi se'esoua dos shiÿaxa'u mayi dataida'aguet so Moisés.

So pa'ateec lqataxac so Pablo mayi ÿami' so Timoteo

¹⁰ Qalaxayi 'am mashi 'auaÿateeta da ÿapaxaguenataxanaxac, qataq da ÿataxac ÿaÿamaqchiguiñi, qataq dam shiitapeguec, qataq da ipi'iÿaxac, iualaxavic, isoxoyic, qataq da ñi'añaxateguet 'enauac na chochina,

¹¹ qataq da ñicanaguec, qataq da ñique'ejnaxac. Qataq mashi 'auaÿateeta 'enauac na aÿim qai'otec co'ollaq soota'a yi la ciudad Antioquía, qataq yi Iconio, qataq yi Listra. Ñique'etaxangui 'enauac na ñicanagueguesat, qalaxayi so qadataxala' aÿim nca'alaxateeguesop 'enauac.

¹² Qaq ÿataqta 'eesa da 'enauac na nshitaique da nañanot da quetague' so Cristo Jesús, nataq'en nque'etaxangui qome da ncanaguec.

¹³ Qalaxayi na qauemaicpi qataq na tenataxanaxaicpi taÿañicda, nquicta'aguet 'enauac na sa ÿaÿamaxañisat. Namayipi datenataxaatac, qalaxayi nachi 'en'am natenatac.

¹⁴ Qalaxayi 'am qoquetelco' da 'anapaxaguenataguec mayi ÿoqta 'eesa naq'en. 'Am mashi 'auaÿateeta nam 'am ÿapaxaguenec de'eda,

¹⁵ cha'ayi nal'ena da 'ananacta'ai' da 'auauatton naua ñiyigui'shi l'aqtaqa ñi Dios mayi ishit da 'am ÿajnaxanaxaic naq'en, qataq ishit da 'am ÿaueca'aguet da nca'alaxa mayi chigaqaigui da qaipi'iÿa'a so Cristo Jesús.

¹⁶ 'Enauaque naua ñiyigui'shi l'aqtaqa ñi Dios, namayi ÿilyiñi naq'en co'ollaxa so l'aqtaxanaxanecpi. Qaq naamayi taiguet da qaÿapaxaguenataxanque, qataq da qaÿachaxanataxana ca lataxac, qataq da qaÿaÿamaxajñi ca nasouaxashit, qataq da qaÿachaxanataxana da llic da achaalataxac qui'itta,

¹⁷ yaqto' ca lamaxashic ñi Dios ÿataqta nalochiguiñi 'enauac na lhueneguesat, qataq taiguet da i'ot ca camachaqca n'onataxanaxac ÿaÿamaqchiguiñi.