2 Timoteo 2 - Nuevo Testamento Toba Sur

Ca nale so Jesucristo

¹ Qaq 'am ÿalec, 'auacongueto' qome da 'ad'añaxac mayi chigaqaigui da nqouagaxanaqtaic dam qomi' qoÿanema, cha'ayi ñi'adaqtau'a so Cristo Jesús.

² Qataq 'enauac na 'ad'axaÿaqtaguishic mayi aÿim 'auachigoxottot, nataq'en hua'aqchigui na saqalota shiÿaxauapi, nachina qome na 'aupataxalec na ÿallippi mayi ÿataqta 'adpe'et, qataq ishit da nalalec ca lÿa da ÿapaxaguen.

³ Qaq 'am ÿataqta 'an'añaxategueto' 'enauac na que'ejnaxaguesat, 'au'enaxatchiguio' ca laxadaic ale da 'am nale so Jesucristo.

⁴ Cha'ayi ca ale, da qaÿamaqtac, sa ishit da maichi ncoñida'aguet ca maichi l'onataxanaxac, cha'ayi mashi huetañot da lamaxasoxonaxac so huataxanaq lta'a.

⁵ Qaq nachi 'en'am ca shiÿaxaua da huo'otaq tau'a da qomitaxac, qaq da huo'otaq sa ipaguelec da ÿoqta lataxac, nachi sa ishit da ÿaconguet ca nshiitenaxac.

⁶ Nataq'en ca shiÿaxaua da huetauga ca nanaxanqa' da do'onataxaatac, camayi mayi hua'auñi ÿaconguet da alaÿaxac da l'onataxanaxac.

⁷ 'Auennataxaalco' qome de'eda shiitega, qaq so qadataxala' 'am ÿami' da 'auaÿaten 'enauac de'eda.

⁸ Sa ishito' qome da 'aucoua'ai so Jesucristo mayi chigoxoguet so nta'a David. Somayi Dios nca'aleec naq'en. Qaq 'eda da n'aqtac mayi chigaqaigui da nca'alaxa mayi sa'axattapeguec.

⁹ Qaq nachida da huo'o mshi huo'o da ñique'ejnaxac, chochi sovitta'a da aÿim qaicoñittai', shiita'am ca qalota na lasouaxashit. Qalaxayi da l'aqtac ñi Dios sa ishit da qaicoñittai'.

¹⁰ Ÿoqo'oyi ñi'añaxateguet 'enauac na chochina, cha'ayi ñishitaique da na Dios lca'aguishicpi ividauga da nca'alaxa mayi ÿapac da lyaquiaxac qataq chochi tateec. De'eda nca'alaxa qomi' taÿoto, cha'ayi mashi ñi'adaqtau'a so Cristo Jesús.

¹¹ Qaq de'eda ÿataqta 'eesa: Da seleuaqtañi' so Jesús, nachi 'en'am qanachaalataxaua;

¹² da huo'o da qanque'ejnaxac, nachi 'en'am ñiuanaqhua'a qome da qailo'ogue 'enauacna. Da shinaqpec sa sauattonaq somayi, nachi 'en'am somayi 'enapec qomi' sa ÿauatto'n.

¹³ Da ÿapagaqlec ca qad'aqtac, qalaxayi somayi sa ishit da napacalec ca l'aqtac, cha'ayi ñi Dios sa ishit da nqochin, qataq sa nadalaxat da lataxac.

Ca n'onataxanaxanec ÿataqta qaÿaÿamaxadeeta

¹⁴ Qoquetot da 'auennataxanaxanec na shiÿaxauapi de'eda shiitega. Qaq nagui 'am ÿauaachigui ñi qadataxala' Dios da 'auqata namayipi da nal'en ÿaxaañi da chochi ncotatapigui na n'aqtacpi. Cha'ayi de'eda cotaxac qaica ca naigui. Chaqdata da n'aqchit na n'axaÿaxaatega.

¹⁵ Ÿataqta 'an'añaxato' qome da 'anachaxanot ñi Dios, qoneta'amo' ca n'onataxanaxanec ÿataqta qaÿaÿamaxadeeta, qataq qaica ca ncoqtaique. Chaqdata da 'auloteueeguelo naua lataxaco ÿaÿamaqchiyiñi de'eda n'aqtac mayi 'eesa lataxac.

¹⁶ Qataq 'antela'agueto' na ntaxaÿaxacpi lma'na mayi qaica ca naigui. Cha'ayi na ltaxaÿaxaco ne'enaua ÿataqta taÿañicda, nquicta'aguet na 'enauac sa ÿaÿamaxañisat.

¹⁷ Qataq naua lapaxaguenataxanaxaco nquictrauec, 'en'am aca n'axaiste late'e. Qaq 'eda da 'eetec soua Himeneo qataq so Fileto.

¹⁸ Soomayi ilamaqdauec, queda'ai da 'eesa lataxac, 'eetrega da mashi 'ico' qanca'alaxateeguesop na leuaxaicpi na mashi da'amqajnataxan. Qaq nachida da huo'o mshi huo'o na n'aqchit naq'en da lpi'iÿaxac.

¹⁹ Qalaxayi ñi Dios mashi lapaxañi so 'ico' l'oxonaxala' da l'onataxanaxac mayi qaica ca idaxanapec. Qaq somayi nanettalec so nedec, 'eeta': “Ñi qadataxala' Dios ÿauatton ca mashi lalamaxat;” nataq'en 'eeta': “'Enauac na mashi ncosatapegueueegue da l'enaxat so Cristo, ÿataqta ca'ai qome 'enauac na sa ÿaÿamaxañisat.”

²⁰ Qaq ca noÿic lta'adaic saqcata ca nogoxoshit no'on mayi chigaqaigui na oro, huo'otaq plata da huetaigui. Nataq'en huetaigui na chigaqaigui na qo'ipaq, huo'otaq 'alhua. Ne'ena nogoxoshitpi huo'o na taiguet da ñi'oxoyic, qataq huo'o na taiguet da chochi nhuenec l'o.

²¹ Qaq da huo'o ca nshitaique da 'ico' nogoxoshit mayi taiguet da ñi'oxoyic, qataq nshitaique da qaiqui'itaxatta, qataq nshitaique da taiguet da l'onataxanaxanec so qadataxala', qaq camayi nal'en da iÿouec 'enauac na sa ÿaÿamaxañi, qanachi ÿataqta taiguet ca camachaqca n'onataxanaxac ÿaÿamaqchiguiñi.

²² 'Auataueguesopo' qome na lqopitaxanaqtaiguesat da nogotshic. Qoquetelco' da achaalataxac qui'itta, qataq da npi'iÿaxac, qataq da nsoxoyic. 'Anpogoxoinapegue' da qaica ca da 'enauac nam mashi qui'itte' naua lquiyaqte mayi iÿaxaatega da l'enaxat so qadataxala' Jesús da nqouagaxaunot.

²³ Qataq sa ishito' da 'auqocha'a na cotaxacpi mayi chochi n'ajnaxaic qataq qaica ca naigui, cha'ayi mashi 'auaÿateeta namayipi da naigui da napetaxac.

²⁴ Cha'ayi ca lamaxashic so qadataxala' sa ishit da quetaigui da petaxaic. Chaqdata da nauote' 'enauac na laÿipi, qataq ÿaÿaten da dapaxaguenataxan, qataq huo'o da lhualaxavic,

²⁵ qataq huosotta da lataxac da 'ico' nlaxaneec ca depa'aguenataxaatac. Cha'ayi sa iuena'a da ñi Dios ishit da ÿami' camayi da ÿaxaadeec naq'en naua n'onataxaco, qataq ÿami' da ÿaÿaten da 'eesa lataxac,

²⁶ yaqto' nal'en da ntouen, qataq ca'ai da lqoinaxanaxac so shiÿaxaua lma'na mayi lcoñitaguishic da i'ot naq'en ca maichi 'eetapeguec.