2 Timoteo 1 - Nuevo Testamento Toba Sur

So Pablo ÿamaxa aso lede so Timoteo

¹ Aÿim Pablo, aÿim ÿideuo ñi Dios da aÿim lamaxashic naq'en so Jesucristo, da sa'axateec da nca'alaxa mayi ÿachaxanapec co'olloxochiyi. Qaq de'eda nca'alaxa taÿot ca mashi n'attau'a so Cristo Jesús.

² 'Am ÿauotaxat Timoteo, 'ico' 'am ÿalec, 'am samaxa ana ÿide, cha'ayi ñishitaique da 'auaconguet da nqouagaxanaqtaic, nataq'en da nchoxonnataxanaxa, qataq da nlagaxayic mayi chigoqo'ot ñi qadta'a Dios nataq'en so qadataxala' Jesucristo.

Qai'axattapeguec so Cristo

³ Da ñoqouagaxaueetac yi na'a'q qataq yi pe, nachi tachigui iuel 'am. Qaltaq sanot da ñi'achic ñi Dios mayi so'otta'pe naua l'aqtaqa, qataq ñanomta da qaica ca hueto'ot ÿasouaxashit. Qaq de'eda nachida da 'eetec nataq'en so hua'au ita'alpi.

⁴ Qaq naxa da tachigui iuel da 'anneenaxac, nachi huo'o da iyaxa da 'am ñauane', yaqto' aÿim nlaqchigui da ñitonaxac.

⁵ Qataq naxa da tachigui iuel dam 'adpi'iÿaxac mayi huosota. De'eda huosota npi'iÿaxac mayi hua'auteguet aso 'adcote Loida qataq aso 'adate'e Eunice. Qaq nagui saÿateeta da nataq'en 'am hueto'ot de'eda npi'iÿaxac.

⁶ Ÿoqo'oyi nagui 'am saqata da 'au'edaxatoigui ñi 'anshitaxat mayi 'am ÿami' ñi Dios se'eso na'a'q co'ollaq 'am sashil-lec.

⁷ Cha'ayi ñi Dios sa ishit da ÿan ca colanqaic da nshitaxat naq'en ca shiÿaxaua. Chaqcata ca i'ot ca n'añaxac naq'en, qataq ca lsoxoyic, qataq ishit da ntel-la't.

⁸ Ÿoqo'oyi sa ishito' da 'ancoxolec da 'au'axateec so qadataxala' Jesús. Nataq'en sa ishito' da huo'o da 'adcoxo, souaxat da aÿim qaicoñittai', sasoilec somayi. Chaqdato' da 'anhuanau'a de'eda que'ejnaxac souaxat da n'aqtac mayi chigaqaigui da nca'alaxa, qaq ñi Dios 'am itaunec qome da 'ad'añaxac.

⁹ Ñim Dios mayi qomi' nca'alaxatreec, qataq iÿaxana da qanachaalataxac da yaqto' sanqot. Qaq de'eda qomi' i'oteque, damayi nachi 'eetai' da lhuennataxa. Sa ishit da huo'otaq chochi nqopita'a ca qadataxac no'on. Mayi souaxat da qomi' ÿauoteque, cha'ayi mashi ñi'adaqtau'a so Cristo Jesús. Qataq nal'eno' da qomi' ÿauoteque co'ollaq saxanaqaca ana 'alhua.

¹⁰ Qaq de'eda lsoxoyic ñi Dios ÿachaxan nagui, qalaxayi nactaigui naq'en da lliquiaxac so qadca'alaxaqui Jesucristo mayi deuotaxanec co'olloxochiyi da l'añaxac da nleuaxa, qataq damaxasoxoolec da qai'axat da n'aqtac mayi chigaqaigui da nca'alaxa. Qaq nachida da yi'oq naq'en da nca'alaxa mayi sa ishit da qanlaxajñi.

¹¹ Qaq ñi Dios ÿanagui da aÿim l'aqtaxanaxanec da sa'axat de'eda n'aqtac. Qataq aÿim ÿamaxalec da sapaxaguen na saq judiopi.

¹² Qaq nachida da huo'o mshi huo'o de'eda ñique'ejnaxac. Qalaxayi sa ishit da yicoqtac, cha'ayi aÿim saÿateeta so hueto'ot de'eda ñaquitaxac. Qataq qaica da saqca ñaqshin ca l'añaxac da ilo'ogue qataq ntela'a dam aÿim ÿachito'ot, chochi ividaxatta'a que'eca pa'ateec na'a'q.

¹³ Qoquetelco' da lliquiaxac da 'am sami' napaxaguenataxanaxac mayi no'on. Qouetaiguio' da npi'iÿaxac qataq da nsoxoyic mayi qomi' qoÿanema, cha'ayi mashi ñi'adaqtau'a so Cristo Jesús.

¹⁴ 'Antelo'o' da 'am ipataxalec ñi Dios da 'aulo'ogue, qaq 'am itauan so Espíritu Santo mayi qomi' hueta'agueta.

¹⁵ Qaq de'eda mashi 'auaÿateetac da aÿim ca'ai 'enauac na netaña yi 'alhua Asia, nataq'iñi soua Figelo qataq so Hermógenes.

¹⁶ Qaq ñi Dios talec qome naq'en da lchoxonnataxanaxa na lauo' l'ecpi so Onesíforo, cha'ayi somayi saqalota da aÿim i'añaqchit, qataq sa ishit da ncoxolec da aÿim ncoñitaguishic.

¹⁷ Chaqdata da aÿim nmittaique, chochi ivitta'a da aÿim ÿanata co'ollaq hueta'a na Roma.

¹⁸ Qaq ñi Dios itauan qome somayi que'eca pa'ateec na'a'q, da yaqto' ÿaconguet da lchoxonnataxanaxa. Qaq 'am mashi 'auaÿateeta somayi da ÿataqta saqalota da ltaunaxanaxac, co'ollaq 'am soota'aguet na Éfeso.