2 Pedro 3 - Nuevo Testamento Toba Sur

Ca lli'iguelaxasoxoc so qadataxala'

¹ Qami' ñauochaxa'u ÿaqaÿa't, qami' samaxalo ana lÿa ÿide. Qaq ne'enaua dos ÿide mayi qami' samaxalo, ñishitaique da sachigoxotchigui ne'ena ÿaqataxacpi da qami' ÿataqta seuennataxanaxa'n.

² Qami' qauennachiÿa'alo qome naua qami' i'axatema co'ollaxa som qui'itta l'aqtaxanaxanecpi ñi Dios qataq naua lapaxaguenataxanaxaco so qadataxala' qataq qadca'alaxaqui mayi qami' ÿapaxaguenque soua lamaxa'shi somayi.

³ Qataq qami' qauennachiÿa'a qome de'eda 'eeta': Caua pa'atreec na'axa'te, nachi huo'o qome ca shiÿaxauapi ÿataqta ÿi'inai' da qad'amqajnataxanaxaqui. Camayipi quetaiguilo naua n'onataxaco mayi qauema.

⁴ Nachi qami' ina't qome, 'eeta': “¿Huá'ague ca 'eetec cam qami' qaÿachaxanapecoto lli'iguelaxasoxoc so Cristo? Yi chochi ivitta'a co'ollaxa da ileu so hua'au qadta'alpi, qalaq nachi 'eetai' sa ishit da huo'o ca nqochin 'enauacna, chigoqta'a co'ollaq chita'ague da qai'ot ana 'alhua.”

⁵ Cha'ayi namayipi sa ishit da taÿapigui lauel da soua hua'a'u vi'iyi nachi 'eetai' da huo'o na piguem, qataq ana 'alhua chigoqchigui da l'aqtac ñi Dios co'ollaq nyiishiguem naq'en da chigoqchigui naq'en na 'etaxat.

⁶ Qataq chigoqchigui naq'en na 'etaxat co'ollaq npaxaashiguem naq'en ana 'alhua, nachi 'enauac nam huetalec anamayi nlaguiñi naq'en.

⁷ Qaq nachida qome de'eda l'aqtac ñi Dios da chigoqchigui da na piguem qataq ana 'alhua mayi ñaq huo'oi nagui da naamayi taÿa'alo naq'en ca nodec. Que'eca nodec nachica ca davigaqtaxan qom ivita da qanmit 'enauacna, qom ivita da qailaxachigui 'enauac nam qauemaicpi.

⁸ Qataq da lÿa, qami' ÿaqaÿadolqa, 'eeta': Sa ishit qome da sa qantouñiic da ñi qadataxala' yi 'oonolec na'a'q qalaq 'eeta'ama naq'en caua mil vi'iyi, qataq caua mil vi'iyi, qalaq 'eeta'am naq'en ca 'oonolec na'a'q.

⁹ Qataq ñi qadataxala' sa ishit da qaÿaloqteguet da huo'otaq sa ipaguelec ca ÿachaxanapec, cha'ayi huo'o na 'eetega da ñimayi qaÿaloqteguet. Chaqdata da ñimayi huo'o da lhualaxavic da qomi' iuatta'alo. Cha'ayi ñimayi sa ishit da ÿaÿamaxaden da huo'o ca daqat, chaqdata da iuatta'a da 'enauac na shiÿaxauapi ca'aisalo naua n'onataxaco.

¹⁰ Qalaxayi que'eca lli'iguelaxasoxoc so qadataxala' ivita qom sa qalligueme da taÿapigui yi nhuel, 'eeta'am ca cachaxaic da quetagui yi pe. Huaña, nachi na piguem nlaguiñi, ÿataqta qaica ca 'en'am ca l-lamaxa. Nachi nam hueto'ot na piguem ÿavigaxat que'eca nodec, nataq'en ana 'alhua, qataq 'enauac nam huetalec.

¹¹ Qaq nagui da saÿajnaq da qanlaxajñi 'enauacna, qaq ¿táloxochiyictoxo' da sa qui'itta qanqashiñi da qanachaalataxaqui da qoquiitague' ñi Dios?

¹² Qaq qauachiÿa'aguet qome que'eca na'a'q mayi lvidaxaqui da ñi Dios da nmit 'enauacna, qataq ÿataqta qauayiñiita'aguet qome que'eca na'a'q mayi huetoigui da na piguem ÿavigaxat ca nodec, qataq 'enauac nam hueto'ot namayi nlaguiñi souaxat na l'edaxa ca nodec.

¹³ Qalaxayi qomi' seuataqta'aguet ca dalaxaic piguem qataq aca dalaxai 'alhua mayi ÿachaxanapec co'olloxochiyi ñi Dios, cam huaña da 'enauac qome na shiÿaxauapi no'on da lataxac qataq soxodaicpi.

¹⁴ Qaq ÿoqo'oyi qami' ÿaqaÿadolqa, nagui da ña qauachiita'aguet 'enauac de'eda, qaq no'on qome da qanpogoxoiñiÿapegue' da qaulaquiichiguiñi qom qami' nvitalo ñi Dios, qataq qami' qui'itte', qataq qaica ca qadasouaxashichi.

¹⁵ Qataq qantouñiita'ac da lhualaxavic ñi Dios da qomi' iuatta'alo. Damayi naigui da qadca'alaxa. Qaq 'eeta'am nataq'en da 'eetec ana ledepi so qanauochaxaua qadqaÿa Pablo mayi qami' ÿamaxalo co'ollaq somayi ÿiyiñi da laÿajnec mayi ÿami' ñi Dios.

¹⁶ Qaq 'enauac ana ledepi somayi qami' i'axattapeguema de'eda, qalaxayi huo'oi naua huañalo da ÿataqta huo'o da lqalaic da qai'axateguelo naua llico. Qaq ÿoqo'oyi nam qaica ca ÿaÿajnapec qataq sa ishit da da'añi da lpi'iÿaxac nachi ishit da ÿaqa'a naq'en ca ÿanaigui. Huaña, nachi 'eeta'am naq'en da 'eetec nam laÿipi nanettañi l'aqtacpi ñi Dios da ÿashaxaneec, nachi ishit da maichi que'emaxam.

¹⁷ Qaq ÿoqo'oyi qami' ÿaqaÿadolqa, nagui da mashi qauaÿajñiitac de'eda, qaq no'on da ÿataqta qanchilliila't, da yaqto' sa ishit da chochi qami' ÿauecta'pe da latenataxanaxac na shiÿaxauapi qauemaicpi, nachi ishit da qoquiÿa'ai da qad'amqajnataxanaxaqui.

¹⁸ Qalaxayi nquictashiguem qanqashiñi qome da qadauattonaxanaxaqui so qadataxala' qataq qadca'alaxaqui Jesucristo, qataq da nauotaxanaqtaic mayi chigoqo'ot somayi. Qaq nachi 'eetai' qome da chochaq tateec da ñi'oxonnataguec somayi. Qaq nachi 'eetai' qome da chochaq tateec da ñi'oxonnataguec somayi. Aja', nachi 'eetec.