2 Pedro 2 - Nuevo Testamento Toba Sur

Nam dapaxaguenataxaatapeguec da sa lataxac

¹ Qalaxayi nataq'en som llalaqpi so Israel co'olloxochiyi huo'o so 'eetega da l'aqtaxanaxanecpi ñi Dios, qalaxayi saq 'en. Qaq nachi 'eetec nataq'en nagui da qoñiita huo'o na dapaxaguenataxaatapeguec da sa lataxac. Namayipi n'otaxaateuo na lapaxaguenataxanaxacpi mayi ishit da deque'emaqtaxan, ivida'a da nqolguete' so qadataxala' mayi nca'alaxateec namayipi. Nachi namayipi maichi quetau'a da saqaÿaloq ca nhuaxanaguec.

² Qaq ÿataqta qalota qome na quegue da qauem lataxac namayipi. Qaq souaxat namayipi nachi ÿataqta qauem da n'aqtaguec da llic da n'aqtac mayi ÿoqta 'eesa.

³ Qaq souaxat da lqopichi da nshiitenaguec, nachi namayipi qami' idolguete naua napaxaguenataxanaxaco saq 'en da yaqto' nqat añi qodomi. Qalaxayi namayipi sa ishit da ÿit de'eda nhuaxanaguec, cha'ayi mashi saqaÿoqtegue da qaÿaqataxaatapigui' damayi.

⁴ Cha'ayi ñi Dios sa ishit co'ollaxa da ichoxonnai' som lamaxashicpi mayi huo'o da lasouaxashit. Chaqdata da ÿamaxaña cam nhuaxanqa' naq'en, qataq icoñida'aguet na napalaxa, da yaqto' iuata'aguet naq'en ca na'a'q qom nmit 'enauacna.

⁵ Nataq'en sa ishit da ichoxonnai' ñi Dios som hua'au shiÿaxauapi. Chaqdata da npaxaashiguem naq'en so auot se'eso shiÿaxauapi mayi qauemaicpi. Qaq chaqsota so Noé nca'alaxateec, qataq soua lÿa't siete, cha'ayi somayi i'axattac da achaalataxac mayi qui'itta.

⁶ Ñi Dios nataq'en ilaxachiguilo soua la ciudad Sodoma qataq so Gomorra, ÿataqta dachipchiyiñi naq'en, ivida'a da ndoteec na alo naq'en, cha'ayi ÿauotaique da laloqnaxanaxat naq'en nam shiÿaxauapi mayi qauemaicpi mayi taÿa'a da qaltaq nalec ana 'alhua.

⁷ Qalaxayi nca'alaxateec co'ollaxa so Lot, cha'ayi somayi ÿataqta no'on da lataxac, qataq souaxat da ÿataqta qalota da nqui'ic co'ollaq imeteetac da qauem lataxac se'eso shiÿaxauapi mayi qauemaicpi.

⁸ Qaq ÿataqta 'enauaque naua na'axa'te se'eso shiÿaxaua mayi no'on da lataxac mayi netangui se'eso laÿipi ÿataqta huo'o da nqui'ic añi lquiyaqte souaxat da imeteetac qataq da hua'aqtega 'enauac nam qauem mayi i'ottac somayipi.

⁹ Qaq 'eda da 'eetec da ñi qadataxala' ishit da nca'alaxateeguesop da ñi'iguenataguec cam ÿataqta nañanot ñimayi, qataq da taÿa'a naq'en da nhuaxanaguec na qauemaicpi qom ivita da nmit 'enauacna.

¹⁰ Qalaxayi ñi Dios ÿauo'o qome da nhuaxanaguec na shiÿaxauapi, lamaaxa nam maichi quetague' nam 'eetapeguecpi mayi qauem, qataq sa ishit da ÿaconguet da lamaxasoxonaxac ñi qadataxala'. Namayipi ÿataqta sa ÿalaq, qataq saq llivigui yi lauel. Sa ishit da ñi'iÿa da ishiuen nam damaxasoxonapecpi saq cha'a.

¹¹ Qamaq na namaxashic piguem l'ecpi mayi ÿacteec da l'añaxac qataq da damaxasoxonapec, qalaq sa ishit da huo'otaq sa ÿadenalec da iuaxanque naua l'aqtaqa ne'ena damaxasoxonapecpi da huo'otaq ÿauaachigui naq'en ñi qadataxala'.

¹² Qalaxayi ne'ena shiÿaxauapi ÿataqta 'eeta'am na shiguiÿacpi mayi qaica ca ÿaÿajnapec. Chochi quetague' da lmejnaxanaxac, qataq ñiguiñi da yaqto' taÿa'a da qaÿaconeu'a qataq da qaÿalauat. Namayipi ÿataqta sa iyacnapec da detaxaÿa cam sa ishit da ÿaÿaten. Qalaxayi namayipi 'eeta'am qome da l-leuaxa na shiguiÿacpi,

¹³ qataq qaÿi'iguelaxateguet qome da nque'etaxangui 'enauac nam i'otec na laÿipi. Namayipi ipi'itaxano' da ÿataqta machiguiñi da quetaigui na lamanaxanaqtaiguesat mayi sa qaÿauec. Namayipi ÿataqta i'ot da n'aloxo, qataq da qai'ot ca sa ÿaÿamaxañi da huo'otaq qami' ÿalectaiguilo da qau'ochiitac na qadqui'axaqui. Nachi namayipi ÿataqta machiguiñi da chochi qami' ÿatenachitta'pe.

¹⁴ Namayipi nataq'en qaca aca 'alo da sa nqopitta'a da huo'otaq ilota'a. Ÿataqta sa ishit da nasamiisop da i'ottac da lli'itaxaloxo. Qataq chochi ÿayin da ÿashaxaneec ca shiÿaxaua mayi qaica ca l'añaxac, qataq ÿataqta sa ishit da nqalaate' da chochi nqat aca alom ca lÿa. Namayipi huetalec da lta'adaic nhuaxanaguec.

¹⁵ Qataq namayipi isomtac, cha'ayi maichi ca'ai da ñiquiaxac mayi ÿaÿamaqchiguiñi souaxat da quegue da lataxac so l'aqtaxanaxanec ñi Dios, l'enaxat Balaam, som llalec so Bosor, som i'ot co'ollaxa da sa ÿaÿamaxañi souaxat da nshitaique da nauec da nshiitenaguec.

¹⁶ Nachi qanlaqtega souaxat da lli'itaxaloxo, nlaqtega aso qaicaua l'aqtaqa 'ashina co'ollaq detaxaiguilo naua shiÿaxaua l'aqtaqa. Nachi sa ishit da ÿashinem da queto'ot da n'oopaxac somayi.

¹⁷ Ne'ena shiÿaxauapi 'eeta'am aca ñi'illoxoqui mayi qaica ca l'ec 'etaxat, qataq 'eeta'am ca l'oc mayi chochi ÿachitac na l'at. Namayipi taÿa'a da qaicoñida'aguet cam chochaq tateec napalaxa.

¹⁸ Cha'ayi naua l'aqtaqa qalaq ÿataqta ÿajnaxanaxaiqa, qalaxayi qaica ca naiguilo. Qataq ÿachigoxotchigui na namanaxanaqtaiguesat qataq nam 'eetapeguec da n'oquiaxac da ÿashaxaneec nam ÿoqta 'eesa da ca'ai na huetaiguilo naua lsomaxaco.

¹⁹ Namayipi 'eetega da i'axattac da lliquiaxac da achaalataxac mayi ÿataqta huesochiguiñi, qalaxayi namayipi l-latac naua 'onataxaco mayi deshipaxanaqtaxa'n. Cha'ayi ca shiÿaxaua 'eeta'am da l-latac cam loxonec camayi.

²⁰ Cha'ayi ca mashi ÿauatton so qadataxala' qataq qadca'alaxaqui Jesucristo, qataq mashi sogote da dataueguesop na qauem 'onataxacpi mayi huetalec ana 'alhua, da huo'otaq ÿi'iguelaxalec da ncoñida'aguet qataq ipactegue da loxonec camayi ne'ena 'onataxacpi, nachi camayi ÿataqta napacalec som hua'auchiguiñi qauem lataxac co'ollaxa.

²¹ Cha'ayi namayipi no'ónctaxa da sa ishit co'ollaxa da ÿauatton da lliquiaxac da achaalataxac mayi qui'itta. Cha'ayi l'axaso' da mashi ÿauatton damayi, ime, qataq ca'ai dam qoÿanem napaxaguenataxanaxac mayi qui'itta.

²² Qalaxayi tachigui namayipi da i'axat som naloqnaxanaxat mayi 'eeta': “Ca pioq maichi ipacta da chic ca alolaxat, qataq aca cos late'e mayi chita'ague da qaiÿotac, qalaq ipacta da ncogangui ca nshaxa.”