2 Pedro 1 - Nuevo Testamento Toba Sur

So Pedro ÿamaxa aso lede na 'amqajnataxanaxaicpi

¹ Aÿim mayi i'enaxat da Simón Pedro, aÿim l-latac qataq aÿim lamaxashic so Jesucristo. Aÿim shiyiñi ana ÿide da qami' samaxalo, qami' mayi qauacoñiiguet da n'amqajnataxanaxac qaica ca 'en'am mayi 'eeta'am da qomi' hueto'oto, cha'ayi so Jesucristo mayi qadta'a qataq qadca'alaxaqui ishit da i'ot ca ÿaÿamaqchiguiñi.

² Ñishitaique da qauacoñiiguet dam chochaq huañi nchoxonnataxanaxa qataq da nlagaxayic mayi chigoqchigui da qadauattonaxanaxaqui ñi Dios qataq so qadataxala' Jesús.

Da lataxac nam quetague' so Cristo

³ Ñi Dios maichi ÿachigoxotchigui da l'añaxac da qomi' ÿanema 'enauac nam iueetac da qanachaalataxac qataq da no'on qadataxac da qolaxague ñimayi co'ollaq qomi' ÿauattonaxanaxanque so Cristo mayi qomi' iÿaxanalo, ÿachigoxotchigui da l'amaqchic qataq dam l'onataxanaxac mayi qaica ca 'en'am da lli'oxoyic.

⁴ Qaq chigoqchigui damayi da huo'o mshi qami' ÿanema ñi Dios da ÿachaxanapec co'olloxochiyi mayi ÿataqta lta'adaic qataq qaica ca ivi' da lashiichiÿaxac, da yaqto' chigoqchigui de'eda ÿachaxanapec da qami' ishit da qanhuañiÿau'a da lataxac ñi Dios qataq ishit da qauataiueguesop na ishit da deshipaxanaqtaxan mayi chigaqaigui nam qauem nhuennataxacpi mayi huetalec ana 'alhua.

⁵ Qaq ÿoqo'oyi sa ishit qome da ndoteec da qadpi'iÿaxaqui. Nataq'en qanpogoxoiñiÿapegue' da huo'o ca no'on qadataxaqui, qataq ca qadauattonaxanaxaqui,

⁶ qataq da maichi ntel-la't ca shiÿaxaua, qataq qauauo'oi da qadhualaxaviqui, qataq da qoquiitegue ñi Dios,

⁷ qataq da qaÿauotec ca nÿa, qataq da qadsoxoyiqui.

⁸ Cha'ayi da qami' hueto'oto 'enauac ne'enapi, qataq da qanquigaxachiitashiguem, nachi da qanachaalataxaqui sa ishit da saqca ca naigui qataq sa ishit da chochi nalatta da qadauattonaxanaxaqui so qadataxala' Jesucristo.

⁹ Qaq cam sa ishit da hueto'ot 'enauac ne'enapi, nachi camayi 'eeta'am ca sa nauaañi, huo'otaq ca sa qaÿa'ague da lmejnaxanaxac. Qaq icoua'ai da sogote da qaiÿouec som hua'au lasouaxashitpi.

¹⁰ Qaq ÿoqo'oyi qami' ÿaqaÿañicpi, cha'ayi mashi ime da qami' iÿaxanalo ñi Dios qataq qami' lca'agui'shi, qaq ÿataqta qanpogoxoiñiÿapegue' de'eda da ÿataqta qami' ñaxatoiguilo. Cha'ayi da nachi qoñiitec de'eda, nachi sa ishit qome da qoviÿañi.

¹¹ Qaq yaqto' qami' qoÿanema da qaica ca qami' npaxategueta da qaunoxoñiu'a cam chochaq tateec l'onataxanaxac da ilo'ogue 'enauacna so qadataxala' qataq qadca'alaxaqui Jesucristo.

¹² Qaq ÿoqo'oyi aÿim shicto'ot da qami' seuennataxanaxaatapegueque de'eda, nai'ctaxa da qami' mashi qauaÿajñi damayi, qataq ÿataqta sa ishit da qoquiÿa'ai de'eda 'eesa lataxac mayi qami' hueto'oto nagui.

¹³ Cha'ayi sela'a da ÿaÿamaqchiguiñi ñaqshin damayi, llaxatemallaxa da aÿim ña ñica'altauec, nachi aÿim sa ishit da saxaatac de'eda ÿaqataxac.

¹⁴ Cha'ayi so qadataxala' Jesucristo mashi aÿim ÿaÿajnaxanaxanec da saqaÿaloq da shica'ai de'eda yi'oqchigui ñachaalataxac.

¹⁵ Qaq ÿoqo'oyi ÿataqta huo'o da iuogoxo nagui, yaqto' qom huo'otaq mashi aÿim saqca, qalaq qami' nachi 'eetai' qome da sa ishit da qaucouai'ai de'eda.

Nam ÿauaachigui co'ollaxa da l'amaqchic so Cristo

¹⁶ De'eda qadapaxaguenataxanaxac mayi qami' sanaxama da sa'axataqtac da l'añaxac qataq ca lli'iguelaxasoxoc so qadataxala' Jesucristo, damayi sa ishit da sachigoxotaqchigui ca chochi qaÿachigoxotchiiya' n'aqtaxanaxac. Cha'ayi qomi' ÿataqta ñimaqa'ai' co'ollaxa da sauanaqchigui da l'amaqchic somayi.

¹⁷ Qataq sauanaqchigui co'ollaq ñi qadta'a Dios ÿanem somayi da ñi'oxonnataguec qataq da lli'oxoyic. Qataq so l'aqtac mayi qaica ca 'en'am da lli'oxoyic 'eeta': “'Eda da ÿalec mayi ÿataqta ÿauotaxat, damayi ñitootapeguec.”

¹⁸ Qaq qomi' ÿataqta sa'axasoqchigui se'eso n'aqtac mayi chigoqo'ot na piguem, cha'ayi qomi' souaqta'aguet so qadataxala' co'ollaq huaña aso qasoxonaxa mayi sa qaishitapec.

¹⁹ Qalaxayi nataq'en huo'o da lÿa ÿataqta 'eesa, damayi nachida da l'aqtaxanaxac som l'aqtaxanaxanecpi ñi Dios mayi qoÿittañi. Qaq qami' no'on qom ÿataqta qauloiteguet de'eda n'aqtaxanaxac, nachi damayi 'eeta'am aca ncoÿadaxanaxaqui da icoÿadelec cam napalaxa, chochi ivitta'a da yaqta'a yi'oxoñi, nachi nnoxooshiguem aca yi'oxoñi lalaqte huaqajñi, nachi icoÿadelguete naua qadquiyaqchilli'.

²⁰ Qalaxayi hua'auñi qome da qauennachiÿa'a de'eda 'eeta': Sa ishit da huo'o ca 'oonolec nam l'aqtacpi ñi Dios mayi nanettañi da huo'otaq huo'o ca ishit da ndojlec da i'axategue ca llic.

²¹ Cha'ayi 'enauac som hua'au l'aqtaxanaxanecpi ñimayi sa ishit da huo'o ca 'oonolec da maichi nalligoxottela't ca l'aqtaxanaxac. Chaqdata da somayipi ÿataqta nañanot da quetague' ñi Dios, nachi i'axa't naua l'aqtaqa ñimayi, cha'ayi so Espíritu Santo i'aqtaxanaxan somayipi.