2 Juan 1 - Nuevo Testamento Toba Sur

Da n'aqtac mayi ÿataqta 'eesa qataq da nauotaxanaqtaic

¹ Aÿim mayi aÿim qadquedoxonqui, samaxa ana ÿide aca ÿaqaÿa mayi lca'aguishi ñi Dios qataq cam llalaqpi mayi ÿataqta ÿauotaxatpi. Qaq saqaÿimta da sauotec camayipi, cha'ayi nataq'en 'enauac nam ÿauattoota dam n'aqtac mayi ÿataqta 'eesa.

² Aÿim ÿataqta sauotec 'enauac da qoñiita souaxat dam n'aqtac mayi ÿataqta 'eesa, dam huetaiguilo naua qadquiyaqte, qataq nachi 'eetai' da qomi' hueta'agueta.

³ Qaq ñim qadta'a Dios qataq so qadataxala' Jesucristo som llalec ñimayi qami' ÿanema qome da lqouagaxanaqtaic qataq da lchoxonnataxanaxa qataq da l-lagaxayic. Qaq damayi qauacoñiiguet qami' mayi qauauattoñi da n'aqtac mayi 'eesa qataq da qanchoxonñiÿa't.

⁴ Ÿataqta lta'adaic da ñitonaxac da aÿim huo'o na selalec na 'ai'alaqpi da quetague' da n'aqtac mayi 'eesa, da 'eeta'am co'ollaq qomi' ÿanema de'eda lamaxasoxonaxac ñi qadta'a Dios.

⁵ Qaq nagui 'am ÿaqaÿa, 'am ñachoxonnot da ñi 'oonolec da shinaqta ÿataqta ÿauotec ca lÿa. Qaq de'eda shiyiñi da 'am samaxa sa ishit da huo'otaq dalaxaic namaxasoxonaxac, cha'ayi nachidatac da namaxasoxonaxac mayi saconaxaguet co'ollaq chita'ague da sa'amqajnataxanaq.

⁶ De'eda nauotaxanaqtaic naigui da qaÿalaxaguet na lamaxasoxonaxacpi ñi Dios. Qaq de'eda namaxasoxonaxac mayi qami' qau'aqaichigui co'olloxochiyi, damayi 'eetega da qoñiita'am ca shiÿaxaua dauotaxanaqta.

Nam tenataxanaxaicpi

⁷ Cha'ayi qalota nam huetalec ana 'alhua tenataxanaxaicpi mayi nqolguete' so Jesucristo da ÿoqta 'eesa shiÿaxaua. Qaq cam nachi 'eetec de'eda, qachi nachica ca tenataxanaxaic qataq npa'aguene' so Cristo.

⁸ Qaq maxatchaxa qome da qoñiita, yaqto' sa ishit da daqat cam naigui da qad'onataxanaxaqui. Chaqdata da qauacoñiiguet cam ÿataqta nalochiguiñi qanshiitenaguiiqui.

⁹ Cha'ayi ca camachaqcague't da huo'otaq hua'auapec, qaq sa ishit da n'onaigui dam dapaxaguenataxanec so Cristo, qachi camayi sa ishit da hueta'aguet ñi Dios. Qalaxayi cam nachi 'eetai' da huetaigui da lapaxaguenataxanaxac so Cristo, camayi hueta'aguet ñi qadta'a Dios qataq so llalec.

¹⁰ Qaq da huo'otaq huo'o ca qami' nqo'onalo da sa ishit da ÿachitac de'eda napaxaguenataxanaxac, nachi camayi sa ishit da qanashiñiiguet ca qadmayi, qataq sa ishit da qanquiñi'.

¹¹ Cha'ayi ca nquine' camayi, nachi 'eeta'am da nhuanau'a cam sa ÿaÿamaxañi mayi i'ottac.

Da pa'ateec n'aqtac

¹² Qaq ÿataqta qalota nam i'aqtacpi da qami' shinapegalo. Qalaxayi sa ishit da sedelec ana'ana ÿide da qami' samaxalo. Cha'ayi seuata'a qom qami' ñoqo'onalo mayi ÿataqta qami' ñima'ato da qami' shinapegalo, yaqto' da qantonaxac ÿataqta nalochiguiñi.

¹³ Qaq nam llalaqpi añi 'adqaÿa 'am ÿamaxa da lquinaxanaxac, añim nataq'en lca'aguishi ñi Dios. Aja', nachi 'eetec.