2 Corintios 8 - Nuevo Testamento Toba Sur

Da 'eetec da nachitaqtaxanaxac

¹ Qaq nagui qami' qadqaÿa't, sauoqtaique da qami' sa'aqtaxanaxama da 'eetec da lqouagaxanaqtaic ñi Dios mayi ÿanem nam 'amqajnataxanaxaicpi mayi netalec yi 'alhua Macedonia.

² Cha'ayi nai'ctaxa da lqalaic yimayipi souaxat da ñi'iguenataguec, qalaq nachi 'en'am ÿataqta machiguiñi. Qataq nai'ctaxa yimayipi da ÿataqta choxodaq, qalaxayi ÿataqta chitaqtaxanaxaicpi, 'eeta'am da sallaxanecpi.

³ Qaq aÿim ÿataqta sauaachigui yimayipi da ÿataqta huo'o da lyaxa da detaunaxan. Qaq ÿan 'enauac dam nalotau'a, ivida'a da ÿataqta ÿapacauec naq'en da lachitaqtaxanaxac.

⁴ Qataq ÿataqta qomi' nachoxodeetapoiguilo da sauaxasoqta'a da nhuanau'a de'eda ntaunaxanaxac da qaitauan ca qadqaÿañicpi.

⁵ Qataq yimayipi ivida'a da i'ot dam qaica da seuennaqtapega. Cha'ayi yimayipi i'auaxaañi da nañanot so qadataxala', ime, qataq jec qomi'. Qaq damayi chigoqchigui ñi Dios.

⁶ Qaq ÿoqo'oyi qomi' ñachoxodenaqtacot so Tito, da yaqto' nachi 'eetai' da quetot naq'en da qoñiita de'eda nachitaqtaxanaxac mayi sogote co'ollaxa da i'ottac can qami' huetaiguilo.

⁷ Cha'ayi qami' qaica 'enauac ca qanqalaachi': huo'o da qadpi'iÿaxaqui, qataq sa ishit da qanqalaachi da qauapaxaguenataxañi, qataq huo'o da qadauattonaxanaxaqui, qataq da qan'añaxataxaqui, qataq da qauauochi da shinaqta. Qaq ÿoqo'oyi no'on da sa ishit da huo'o ca qoue qanqashiñi nataq'en de'eda nachitaqtaxanaxac.

⁸ Qaq de'eda shinapec sa ishit da ÿamaxasoxonaxac. Chaqdata da ñishitaique da qami' qauaÿajñi da n'añaxataxac cam qadÿai, yaqto' ishit da qaila'a de'eda qadsoxoyiqui qom ÿoqta 'eesa da 'en.

⁹ Cha'ayi mashi qauauattoñi qami' da lqouagaxanaqtaic so qadataxala' Jesucristo, da somayi ÿataqta sallaxanec. Qalaxayi somayi ÿataqta nachoxoden, souaxat da lauotaxanaqtaic da qoñiita, yaqto' qami' ishit da qami' sallaxanqa, souaxat da lachoxoyic somayi.

¹⁰ Qaq qami' sanema de'eda iuennataxac, yaqto' saqca ca da da qoñiita. Qami' so lÿa vi'i sogote da qau'ochiitac de'eda. Qaq saqdata da qau'ochiitac damayi, cha'ayi ÿataqta huo'o da qadhuogoqoi.

¹¹ Qaq ÿoqo'oyi nagui no'on da qoquiitot da qau'ochi damayi, ivitta'a da qaumachi. Ÿataqta qau'enaxachiichigui da qadhuogoqoi can chita'ague da qauachitaqtaxañi, da qai'añi acam qanaloitau'a.

¹² Cha'ayi ca shiÿaxaua da ÿoqta 'eesa da lhuennataxa da huo'o aca ÿan, qalaq ñi Dios ÿataqta ÿaÿamaxadeeta acam nalotau'a da ÿan camayi. Cha'ayi ñimayi sa ishit da iÿaxanaique acam sa ishit da qanalou'a.

¹³ Qaq damayi sa ishit da naigui da yaqto' qami' huo'o da qadhuenaxanqai souaxat da qautauañi ca qadÿai.

¹⁴ Cha'ayi damayi naigui da yaqto' 'eeta'a't na shiÿaxauapi. Cha'ayi nagui qami' qautauañiic cam iueetaique yimayipi. Qaq qom huo'o ca na'a'q, qaq yimayipi ishit da qami' itauaneque cam qaviñiitaique. Qaq da qoñiitec de'eda, nachi ishit da 'eeta'a't na shiÿaxauapi.

¹⁵ Cha'ayi nachi 'enapec naua ñiyigui'shi l'aqtaqa ñi Dios, 'eeta': “Cam qalota na laponguishic, qalaq qaica ca lli'iÿoxot; qaq cam saq 'amaqtaq ca laponguishic, qalaq qaica cam iueetaique.”

So Tito qataq soua lÿata'pe

¹⁶ Qaq sanot da ñi'achiquiaxac ñi Dios, cha'ayi ñimayi ÿachanguit ana lquiyaqte so Tito da 'eeta'am naq'en aÿim da huo'o da lyaxa da qami' itaua'n.

¹⁷ Cha'ayi somayi ÿalaxaguet dam i'aqtac mayi sami', qataq somayi yi nachi 'eetai' da huo'o da lyaxa da qoñiita, qaq nagui maichi chigoqchigui da maichi qami' nqo'onalo.

¹⁸ Qaq sa ishit da chaqsota so Tito. Nataq'en huo'o so lÿa samaxasoq qadqaÿa som ÿataqta no'on da n'aqtaguec da n'aqtaxaatapigui 'enauac nam 'amqajnataxanaxaicpi ne'ena souaqta'a, souaxat da i'axattac da n'aqtac mayi chigaqaigui da nca'alaxa.

¹⁹ Qaq saqdata de'eda, cha'ayi 'enauac nam 'amqajnataxanaxaicpi qalca'ateu'a se'eso qadqaÿa, da yaqto' ñinaigaqtague', qataq da yaqto' qomi' itaua'n de'eda souaqtapegue' nachitaqtaxanaxac mayi so'otaqtac da yaqto' ÿi'oxodaq naq'en ñi qadataxala' qataq yaqto' ishit da qaila'a de'eda qan'añaxataxaqui.

²⁰ Qaq shinaqtec de'eda, cha'ayi huo'o da qadvitaxa da huo'otaq qomi' qanayictapeguelguete souaxat ana nachitaqtaxanaqte mayi llaÿonaqtac.

²¹ Cha'ayi qomi' ñipogoxoinaqtapegue' da so'otaq ca ÿaÿamaqchiguiñi, qaq sa ishit da sauoqtaique da nachaqñita ñi qadataxala' da qomi' ÿauaachiguilo, nataq'en 'enauac na shiÿaxauapi.

²² Qaq soomayi saqsouate'. Nataq'en samaxasoq so lÿa qadqaÿa mayi nataq'en qomi' saÿajnaqta da 'eetec da ltaunaxanaxac. Qaq nquicteec nagui da ltaunaxanaxac souaxat da lpe'e da qoñiita.

²³ Qaq da huo'otaq huo'o ca denataxanec so Tito, qaq qau'aqtaxañiim camayi da so Tito maichi itaua, aÿim itauaatac da qami' huetapegueto. Qaq da huo'otaq qainataxanec soua lÿa't qadqaÿa't, qalaq qau'axachi' sa soomayi maichi lamaxa'shi nam 'amqajnataxanaxaicpi mayi hueta'a ne'ena soota'a, qataq soomayi ÿi'oxodeetrac so Cristo.

²⁴ Qaq ÿoqo'oyi qami' no'on da ÿataqta qauachaxañiÿalo qome soomayi da qadsoxoyiqui, yaqto' ishit da ÿaÿateeta na 'amqajnataxanaxaicpi ne'ena soota'a da ÿoqta qomi' 'eesoda da qami' shi'oxodenaqta'pe.