2 Corintios 6 - Nuevo Testamento Toba Sur

¹ Cha'ayi qomi' lta'u ñi Dios dam l'onataxanaxac, qaq ÿoqo'oyi qami' ñachoxodenaqtoiguilo da sa ishit qome da saqca ca naigui qanqashiñi da lqouagaxanaqtaic mayi qami' ÿachaxanalo ñimayi.

² Cha'ayi ñimayi nam l'aqtaqa mayi nanettrañi 'eeta': So na'a'q mayi ichoxonnataxanaxaqui, qalaq 'am sa'aqtega; qataq so na'a'q mayi huetoigui da seca'alaqtaxan, qalaq 'am setauan. Qaq nachina na na'a'q nchoxonnataxanaxaqui; qataq nachina na na'a'q nca'alaqtaxanaxaqui.

³ Qaq sa ishit da huo'o ca 'ico' ñaqanaxataqtac, yaqto' sa ishit da qauem da n'aqtaguec da qad'onataxanaxac.

⁴ Chaqdata da sauoqtaique da 'enauac nam so'otaqpi ichoxot da qomi' l-lataqa ñi Dios, souaxat da qanhualaxaunaxac da ñi'añaxataxaguet 'enauac na qanque'ejnaxaguesat, qadhuenaxanaxa qataq nam qanqanaqtagueguesat.

⁵ Cha'ayi qomi' qaiuaxaata'pe, qomi' qaicoñi't, qomi' qaicogaxaata'pe, qataq ÿagueec da qad'onataxanaxac, sa ishit da so'ochaq, qataq soqouataq.

⁶ Nataq'en ichoxot da qomi' l-lataqa ñi Dios da no'on qadataxac, qataq da qadauattonaxanaxac mayi 'eesa, qataq da qadhualaxavic, qataq da qadauotaxanaqtaic, qataq da nachi 'eetai' da qomi' hueta'agueta so Espíritu Santo, qataq dam 'eesa qadsoxoyic,

⁷ qataq dam qad'aqtaxanaxac mayi 'eesa, qataq dam l'añaxac ñi Dios mayi qomi' hueta'agueta. Qataq so'ogoxonaxa da n'ogoxonaxat mayi chigaqaigui da qui'itta achaalataxac, da ivita da qomi' qaicogaxana'pe, huo'otaq da huo'o ca ñicotaqpegue'.

⁸ Qaq huo'o yi na'a'q qaq huo'o da qañi'oxonnataguec, qataq da qomi' sa qaiyacna'pe. Qataq huo'o da no'on da qan'aqtaguec, qataq da qauem da qan'aqtaguec. Qataq huo'o da qoÿiitega qomi' shipecaiqa, qataq huo'o da qoÿiitega da qomi' 'eesoda.

⁹ Qataq huo'o da qoÿiitega qomi' sa qaÿauatto'n, qataq huo'o da qoÿiitega da qomi' nauattonataqa. Qataq huo'o da souaqaigui da lchic da nleuaxa, qalaxayi ñaqaiyita ña yica'alaqtauec. Huo'o da qomi' qaiuaxaata'pe, qalaxayi sa ishit da qomi' qaÿalaua't.

¹⁰ Qaq nai'ctaxa da saquicoqta, qalaxayi nachi 'eetai' da samaqchiguiñi. Qataq qomi' choxoda'q, qalaxayi qalota na sesallaqchitaq. Nai'ctaxa da qaica ca yi da shinaqta, qalaxayi qaica 'enauac ca seuenaqtac.

¹¹ Qami' qadqaÿa't mayi qadmayi na Corinto, qomi' ÿataqta qaica ca sauoqtaique da qami' setaxasoxoiguilo, ÿataqta imauec da qadquiyaqteÿaxac da qaica ca 'oonolec soxotaqtapiguiñi.

¹² Qaq sa ishit da huo'o ca 'oonolec da qoñiita da huo'o ca 'ico' soxotaqtapiisop, qalaxayi qami' mayi huo'oi naua qomi' qai'oxochiitapiisopa.

¹³ Qaq nagui qami' ñachoxodeetoiguilo, shiita'am ca nta'a da nachoxodeetoigui ca llalaqpi, da ÿataqta qauauachiitoiguilo qome naua qadquiyaqchilli' da qoñiita'am aÿim da qaica ca sauotaique da qami' setaxaiguilo.

Qomi' shinaqta'am ca lauo' ñi Dios

¹⁴ Sa ishit qome da qauauaqaiguet ca shiÿaxaua mayi sa da'amqajnataxan. Cha'ayi da 'eetec de'eda, qaq ishit da qoÿiita'am cam qaÿauaxaÿaxana't mayi sa ishit da natena't. Cha'ayi ¿ishit peta'a da huaqta'aguet da achaalataxac qui'itta da achaalataxac qauem? huo'otaq ¿ishit peta'a na yi'oqchiguiñi da huaqta'ai' na napalaxa?

¹⁵ Qataq ¿ishit peta'a da nhuoteete' so Cristo so Satanás? qataq ¿ishit peta'a ca 'amqajnataxanaxaic da tatapegueu'a ca sa ishit da da'amqajnataxan?

¹⁶ Qataq ¿ishit peta'a da qaipa'axanoigui ca noÿic mayi huaigui da qanatamnot ñi Dios na nqolacpi? Cha'ayi qami' qoñiita'am cam lauo' ñi Dios mayi nca'altauec. Cha'ayi ñimayi nachi 'enapec, 'eeta': Sootaigui qataq salectaigui namayipi; aÿim mayi nachaÿim lta'a Dios, qaq namayipi nachi ÿalamaxatpi.

¹⁷ Qaq ÿoqo'oyi nataq'en ñi qadataxala' 'eeta': Qoquiÿa'ai qome na sa da'amqajnataxanpi, qataq qauÿochiilec; qataq sa ishit qome da qaupochiu'a ca ishit da deshipaxanaqtaxan. Yaqto' aÿim ishit da qami' sacongueta,

¹⁸ qataq yaqto' nachaÿim mayi aÿim qadta'ai. Qaq qami', qalaq qami' ÿalqa qataq qami' ÿalel, qaq 'eda da 'enapec ñim qadataxala' mayi qaica ca ÿaqalanapec.