2 Corintios 5 - Nuevo Testamento Toba Sur

¹ Qaq ÿoqo'oyi qomi' saÿajnaq da huo'otaq nlaguiñi de'eda qad'oquiaxac, mayi 'eeta'am ca noÿic mayi saq 'eetai', qalaxayi ñi Dios sogote da ÿaqataxaatai' ca qadma' mayi qaica ca loga't da piguem. Camayi sa ishit da chochi shiÿaxaua ca l'onatac.

² Qaq 'eesa da huo'otaq ña ñica'alaqtauec nagui da ña ñachaataqtaigui de'eda qad'oquiaxac, qalaq ÿataqta huo'o da qadachitataic, qataq huo'o da qadyaxa da ñoqochinaxa ca qadma' mayi na'ague da piguem,

³ cam ishit da qomi' napoxonaxanaxaayiñi, 'eeta'am ca nogoxot, da yaqto' sa ishit da souaqtauec.

⁴ Qaq ÿoqo'oyi nagui da ñaq sonaqtaigui ne'ena qadma' mayi nachida da qad'oquiaxac, qalaq ÿataqta huo'o da qadachitataic qataq da qadhuogoxo. Qalaxayi sa ishit da huo'otaq sauoqtaique da 'ico' ñisoxoñi dam toguishic qad'oquiaxac. Cha'ayi dam shinaqtapeguec, 'eeta': Sauoqtaique da sanaxañi cam dalaxaic qad'oquiaxac, qaq yaqto' dam qad'oquiaxac mayi huo'o ca loga't ishit da imeuo souaxat dam dalaxaic achaalataxac.

⁵ Qaq nachiñi ñim Dios mayi qomi' ÿaqataxaata'agueta 'enauac de'eda, qataq qomi' ÿanema so n'Espíritu Santo, qaq nachiso som ÿoqta 'itchiguiñi naq'en da saconaxaguet cam qomi' qoÿaatapigui'salo.

⁶ Qaq ÿoqo'oyi nachi 'eetai' qome da huo'o da qadpe'e. Saÿajnaqta da huo'otaq ña ñachaataqtaigui de'eda qad'oquiaxac, qaq 'eeta'am da ña sepa'aqtaueguesop que'eca qadma'. Qaq sa ishit da souaqta'aguet so qadataxala'.

⁷ Qaq soqolaqtelec qome da qadpi'iÿaxac, qaq sa ishit da nachica ca yi'oqchigui da seloqtagui.

⁸ Qaq ÿataqta huo'o de'eda qanaquitaxac. Qaq ÿoqo'oyi huo'o da qadyaxa da saxanaxauec da ñachaataqtaigui de'eda qad'oquiaxac, nachi qolaq da yaqto' souaqta'aguet so qadataxala'.

⁹ Qaq ÿoqo'oyi ñipogoxoinaqtapegue' da qomi' ÿaÿamaxadeete' so qadataxala', nagui da ña ñachaataqtaigui da qad'oquiaxac, huo'otaq da mashi sa ishit da ñachaataqtaigui.

¹⁰ Cha'ayi 'enauac qome qomi' ñachaataxau'a cam huaña da so Cristo nmit na nasouaxashitpi, da yaqto' ñi 'oonolec ishit da ÿaconguet cam naigui ca l'onataxanaxac co'ollaq ña nachattaigui da l'oquiaxac, no'on, huo'otaq qauem.

Da n'aqtaxanaxac mayi i'axat da qanmane' ñi Dios

¹¹ Qaq ÿoqo'oyi qomi' mayi mashi sauattonaqta da lataxac da shi'iÿaxa so qadataxala', qomi' huo'o da qanpogoxoinaxac da yaqto' ña da'amqajnataxan na shiÿaxauapi. Qalaxayi ñi Dios mashi sogote da qomi' ÿauattoote', qaq huo'o nataq'en da ñaquitaxac da qoñiita da qomi' qauauattoñiite'.

¹² Qaq sa ishit da qaltaq shi'iguelaxasoxolec da yaqto' qaltaq qomi' qavi'oxoyiñi'. Cha'ayi chaqdata da sauoqtaique da qomi' qauamaitegueta, yaqto' qami' ishit da qau'aqtaxañiim na shiÿaxauapi mayi ñi'oxodeetapigui da lataxac ca yi'oqchigui shiÿaxaua, qaq sa ishit da nachica cam huetaigui añi lquiyaqte camayi.

¹³ Cha'ayi qomi' da 'ico' sa saÿamaxasoq, qalaxayi souaxat ñi Dios; qaq da huo'otaq saÿamaxasoqta, qaq souaxat da qoñiita.

¹⁴ Da lsoxoyic so Cristo nachida da qomi' ÿama'q, cha'ayi qomi' saÿajnaqta da 'oonolec so ileualec 'enauac na shiÿaxauapi, qaq ÿoqo'oyi 'enauac namayipi nataq'en 'eeta'am da ileu.

¹⁵ So Cristo ileualec 'enauac na shiÿaxauapi, yaqto' cam ña nca'altauec, qalaq sa ishit da maichi lalamaxat da nachaalataxac. Chaqdata da lalamaxat som ileualec qataq nca'aleeguesop qanqoÿin.

¹⁶ Qaq ÿoqo'oyi qomi' nagui sa ishit da chochi seloqtapigui da lataxac ca shiÿaxaua da shinaqta'am nam huetalec ana 'alhua. Qaq nai'ctaxa da sogote co'ollaxa da seloqtapigui da lataxac so Cristo da shinaqta'am nam huetalecana, qalaxayi nagui sa ishit da nachi 'eetec da qadhuennataxac de'eda somayi.

¹⁷ Qaq ÿoqo'oyi da huo'o ca n'attau'a so Cristo, nachi camayi 'eeta'am ca dalaxaic shiÿaxaua. Qaq 'enauac da toguishic nachaalataxac imeuo, nachi qaltaq jec da dalaxaic nachaalataxac.

¹⁸ Qaq 'enauac de'eda chigoqchigui ñi Dios ñim chigoqchigui naq'en so Cristo da qaltaq ñimanaxai' naq'en ñimayi. Ime, qaq qomi' ÿanema da qad'onataxanaxac, da yaqto' nmane' ñaqashinaq 'enauac na shiÿaxauapi ñimayi.

¹⁹ Qaq da qad'aqtaxanaxac 'eeta': Ñi Dios nachi hueta'aguet so Cristo co'ollaq somayi nmane' naq'en ñimayi 'enauac na shiÿaxauapi, qaq ñimayi sa ishit da taÿapigui lauel dam lasouaxashit namayipi. Ime, qaq qomi' ÿanaguilo da qad'onataxanaxac, da yaqto' sa'axataq da n'aqtac mayi i'axat da qanmane' ñi Dios.

²⁰ Qaq ÿoqo'oyi nachiqomi' l'aqtaxanaxanqa so Cristo, qaq chigoqchiguilo naq'en qomi' ñi Dios da 'eeta'am da qami' nachoxodeetoiguilo. Qaq chigoqchigui so Cristo da qami' ñachoxodenaqtoiguilo, shinaqta': qanmañi' qome ñi Dios.

²¹ So Cristo ÿataqta qaica ca lasouaxashit. Qalaxayi souaxat qomi', nachi ñi Dios 'eeta'am naq'en somayi ca 'itaxaloxoic, yaqto' qomi' da mashi ñi'adaqtau'a somayi, nachi saxaigui dam achaalataxac qui'itta mayi ÿaÿamaxadeeta ñi Dios.