2 Corintios 3 - Nuevo Testamento Toba Sur

Da n'aqtaguec dam dalaxaic aÿamaxataxac

¹ Da qomi' shinaqpec de'eda, qaq ¿qaupi'itaxañiitega peta'a da qomi' qaltaq sauoqtaique da ñi'oxonnaqtapeguela't? ¿Huo'otaq da qami' sanaxama aca nede mayi qanpataxasoxolate? ¿Huo'otaq da qami' seÿaxanaxaiguilo da qau'ochi aca qad'onataxanaxac lmalate, da yaqto' se'enaxataq nam nachi 'eetecpi de'eda?

² 'A'i, sa ishit. Cha'ayi qami' mayi nachi qoñiita'am acam qad'onataxanaxac lmalate mayi seuenaqtac. Qoñiita'am acam nede da qoÿittalguete naua qadquiyaqte, da yaqto' 'enauac na shiÿaxauapi ishit da ÿauatton qataq da itaxaÿaxan.

³ Qami' qoñiita'am aca nede mayi nachiso so Cristo maichi ÿidelec, ime, qaq qomi' sanaxauec. Acam nede mayi sa ishit da chochi nedaxanaxat cam qaidolec, cha'ayi nachiso som n'Espíritu ñi Dios mayi nca'altauec som dedaxan. Aca nede mayi sa ishit da 'eeta'am da nedaguec da qoÿidelec ca coma', cha'ayi nachinaua naua lquiyaqtel na shiÿaxauapi.

⁴ Qaq ÿataqta saÿajnaqta de'eda, chigoqchigui so Cristo da qadpi'iÿaxac ñi Dios.

⁵ Qaq sa ishit da nachiqomi' chigoqchiguilo da maichi qad'añaxac da huo'otaq huo'o ca so'otaq, chaqdata da 'enauac nam ishit da so'otaq chigoqchigui ñi Dios.

⁶ Cha'ayi ñimayi maichi chigoqchigui da qomi' nalau'alo naq'en da so'onataxanaxau'a dam dalaxaic aÿamaxataxac mayi saq 'en'am da qaÿalaxaguet ca chochi ñiyiguishic, cha'ayi damayi nachida da dalaxaic achaalataxac mayi chigoqo'ot so Espíritu Santo. Na nqataxacpi mayi qoÿittañi, namayipi i'ot da nalaataguec ca shiÿaxaua, qaq so Espíritu Santo, qalaxayi ÿan da achaalataxac.

⁷ Ne'ena nqataxacpi mayi chigoqo'ot so Moisés, namayi qoÿittalecpi so coma', qataq ÿataqta lta'adaic co'ollaxa na l'edaxa. Qaq ÿoqo'oyi na Israel llalaqpi sa ishit da ÿamataigui na lashic so Moisés, cha'ayi na lashic somayi ÿataqta lta'adaic na l'edaxa. Qalaxayi se'eso n'edaxa nquictañi co'ollaxa, ivitta'a da 'om. Qalaxayi co'ollaq qananacot se'eso nqataxacpi mayi ishit da dalaataxan, qalaq qaica ca 'en'am da lli'oxoyic,

⁸ qaq ¡llóxochiyictoxo' da sa ÿapacteec da lli'oxoyic dam n'aqtac mayi qomi' nda'alo so Espíritu Santo!

⁹ Qaq nam nqataxacpi mayi ishit da i'ot cam qanhuaxanaguec, da ÿataqta huo'o da lli'oxoyic, qalaq ¡táloxochi sa ÿapacteectoxo' da lli'oxoyic da l'aqtac ñi Dios mayi i'axatema qomi' da mashi qaica ca qadasouaxashit!

¹⁰ Cha'ayi nam nqataxacpi mayi ÿataqta huo'o co'ollaxa da lli'oxoyic, qalaxayi nagui sa ishit da 'en'am de'eda mayi ÿataqta ÿacteec da lli'oxoyic.

¹¹ Qaq ÿoqo'oyi da huo'o da lli'oxoyic co'ollaxa dam cada'acolec da jec qataq imeuo, qaq nachi 'en'am ÿacteec da lli'oxoyic dam qaica ca loga't.

¹² Qaq ÿoqo'oyi ÿataqta huo'o da qanaquitaxac, ÿoqo'oyi sa ishit da huo'o ca qomi' nqanaxa't da sa'aqtaxanaq.

¹³ Qaq sa ishit da shinaqta'am so Moisés da ÿauota'a so lapoxot na lashic, da yaqto' na Israel llalaqpi sa ishit da ÿauangui da nquictaña da 'om se'eso n'edaxa mayi sa ishit da 'eetai'.

¹⁴ Qalaxayi somayipi qaica co'ollaxa ca lauattonaxanaxac. Qaq ñaq 'eetalec nagui naxa da qaitaxaÿaxan so hua'auchiguiñi aÿamaxataxac, qaq nachiso se'eso napoxonaxat som daqanaqtaxan da huo'o mshi sa ishit da huo'o ca qaÿaÿaten. Cha'ayi se'eso napoxonaxat sa ishit da qanqat, cha'ayi nachaqsota som Cristo mayi ishit da nqat.

¹⁵ Qaq ñaq 'eetalec nagui da ivita da qaitaxaÿaxan anam lliyiguishipi so Moisés, nachi huo'o so 'ico' napoxonaxat mayi ÿapotalec da nauattonaxanaxac.

¹⁶ Qalaxayi ca shiÿaxaua da huo'otaq quegue so Cristo, nachi qanqat se'eso napoxonaxat.

¹⁷ Cha'ayi so qadataxala' nachiso som Espíritu Santo, qaq ÿoqo'oyi cam hueta'ague so n'Espíritu so qadataxala', nachi qaica ca saq huesochiguiñi.

¹⁸ Qaq ÿoqo'oyi 'enauac da shinaqta mashi qaica som lapoxot na qadashic, nachi shinaqta'am aca tannaxai mayi 'edoigui naq'en da lli'oxoyic so qadataxala', qataq nachi ñiquigaqta'aguet da shinaqta'am so Cristo, cha'ayi dam lli'oxoyic somayi nachi qomi' nquigaxattrashigue'm. Qaq 'eda da 'eetec so qadataxala' da nachiso so Espíritu Santo.