2 Corintios 2 - Nuevo Testamento Toba Sur

¹ Qaq ÿoqo'oyi aÿim tachigui yi iuel da sa ishit da qaltaq qami' ñamaqtegalo da qami' sachita'alo ca naquicoxo.

² Cha'ayi da aÿim sauo'o ca qadaquicoqoi, qaq ¿negue'to' ca ishit da i'ot ca ÿamaiquiaxac? Taxaaso' nachiqami' mayi qami' saquicoqchitta'pe.

³ Qaq ÿoqo'oyi qami' samaxalo co'ollaxa aso ÿide, cha'ayi sa saÿamaxaden da qami' ñoqo'onalo da yaqto' aÿim qauaquicoqchichi, qamaq nachicatáctaxa ca ÿamaiquiaxac da qau'ochi. Qaq ÿoqo'oyi aÿim saÿateeta da huo'otaq aÿim samachiguiñi, qaq ÿoqta da 'enauac da qoñiita da qauamaichiguiñi.

⁴ Cha'ayi can settapiguiñi asa'aso ÿide, qala ÿataqta lta'adaic da shiita qataq huo'o da ÿaquicoxo, ivida'a da ñoÿiitac. Qalaxayi sa ishit da shiyiñi asomayi da yaqto' qami' ÿaquicoqchi't, qalaxayi chochi ñishitaique da qauaÿajñi da ÿataqta lta'adaic da ÿauotaxanaqtaic da qoñiita.

Da nchoxonnataguec cam huo'o ca ÿasouaxat

⁵ Qaq qom huo'otaq huo'o ca i'ot ca naquicoxo, qaq camayi sa ishit da nachaqaÿimta da aÿim ÿaquicoqchit. Cha'ayi nataq'en 'enauac da qoñiita, cada'ac da qami' ÿaquicoqchi't. Shinapec da “cada'ac da qami' ÿaquicoqchi't,” yaqto' sa ishit da ÿapacteec da huo'o ca 'ico' sa sechidapec.

⁶ Qami' co'ollaq qau'ochi so qalaponaxaqui da qau'ochi da nhuaxanaguec que'eca shiÿaxaua, qaq de'eda qau'ochi camayi nachi nalotañi.

⁷ Qaq ÿoqo'oyi nagui no'on da chaqdata da qauchoxoyiñi camayi, qataq qau'añaqchichi. Ten, qom huo'otaq ÿagueec da laquicoxo, nachi ishit da qaica ca naquitaxac.

⁸ Qaq ÿoqo'oyi qaltaq qami' ñachoxonnoiguilo da qaltaq qauachaxañiÿa da qadauotaxanaqtaiqui camayi.

⁹ Can qami' samaxalo aso ÿide, qaq nachi huetalec 'enauac de'eda. Qaq qami' samaxalo asomayi, cha'ayi ñishitaique da chochi qami' shi'igue'n, da yaqto' saÿaten da ÿoqta 'eesa da qaualaqailec nam ÿapaxaguenataxanaxacpi.

¹⁰ Qaq ÿoqo'oyi nagui cam qami' mashi qauchoxoyiñi souaxat da huo'o ca ÿasouaxat, qaq nataq'en aÿim sechoxoden camayi. Cha'ayi cam aÿim sechoxoden, da huo'otaq huo'o ca ÿasouaxat, qalaq camayi sechoxoden souaxat da qoñiita. Qaq damayi ÿauaachigui ñaq'en so Cristo,

¹¹ yaqto' so Satanás sa ishit da huo'o ca lligueuo da shinaqta, cha'ayi qomi' mashi saÿajnaqte' naua n'onataxaco.

Saq maguiñi so Pablo co'ollaq hueta'a yi Tróade

¹² Co'ollaq aÿim ñivita yi la ciudad Tróade da sa'axat da n'aqtaguec so Cristo, huaña yimayi, nachi ñatenalec da ÿataqta qaica ca aÿim nqanaxat da so'onataxanot so qadataxala'.

¹³ Qalaxayi da iquiyaqteÿaxac ÿataqta qaica ca lamaxayic souaxat da sa ñauane' so qadqaÿa Tito. Ÿoqo'oyi nachi ñicoyiguene' yimayipi da ñanaÿa na 'alhua Macedonia.

Qomi' 'añaxaiqa naq'en so Cristo

¹⁴ Qaq ÿoqo'oyi qomi' sanqot da qan'achic ñi Dios ñim chigoqchigui naq'en so Cristo Jesús da qomi' 'añaxaiqa, qataq chigoqchiguilo naq'en qomi' da qaÿaÿaten da n'aqtaguec somayi. Qaq damayi 'en'am da no'on alaitaÿaxac mayi huaÿoxoneec 'enauaque naua 'ale'u.

¹⁵ Cha'ayi qomi' shinaqta'am da alaitaÿaxac cam nchinaxanaxat mayi ÿanot ñi Dios so Cristo, qataq ÿataqta huaÿoxoneec da alaitaÿaxac, ividauga nam mashi qanca'alaxateec qataq nam ñaq huetaigui da lsomaxac.

¹⁶ Qalaxayi nam ñaq huetaigui da lsomaxac, de'eda 'ico' nchinaxanaxat, damayi da alaitaÿaxac 'eeta'am ca dalaataxanapec. Qalaxayi na mashi nca'aleec, damayi 'eeta'am naq'en cam ama na laita mayi chigaqaigui da achaalataxac. Qaq ¿chaq negue'to' ca ishit da nalotau'a de'eda n'onataxanaxac?

¹⁷ Qalaxayi qomi' sa ishit da 'ico' qomi' nmenaxaiqa da semenaqta'pe naua l'aqtaqa ñi Dios, da huo'otaq shinaqta'am nam qalota mayi ÿashaxaadeec naua n'aqtaqa. Chaqdata da ÿataqta qomi' 'eesoda da sa'aqtaxanaqtac, qaq qomi' ÿaÿate'n ñi Dios, cha'ayi maichi qomi' lamaxa'shi, qataq qomi' l-lataqa so Cristo.